Bawipa, na duh ahcun na ka damter khawh ko

Nihin ni i rel dingin Khrifa Bupi nih a kan timhpiakmi (Mt. 8:1-4), “Jesuh cu tlang cung khan a rung ṭum i mi tampi nih an zulh. Cun thinghmuipa pakhat kha a ra i a hmaiah khuk bil in a kun i, “Bawipa, na duh ahcun na ka damter khawh ko,” tiah a ti. Jesuh nih a hei banh i a tong i, “Ka duh, Thiang ko cang,” tiah a ti. Chikkhatte ah a zawtnak khan a thiang. Cun Jesuh nih amah cu a thawh i, “Ka bia ngai, ahohmanh chim hna hlah, sihmanhsehlaw tlangbawi sinah khan ding teomeo in va kal law rak in zoh seh. Cun mizapi sinah ka thiang cang, ti langhternak caah Moses nih tuah awk a timi raithawinak kha va tuah,” tiah a ti.

Thinghmui hmaa nih zeidah a chim duh? Kan cathiang chungah thinghmui hmaa voi tampi kan hmuh khawh i thinghmui hmaa cu damh khawh lomi hmaa a si i thinghmui hmaa in a zawmi hna cu an miphun hna hawi chungin hnon an si i khuami laihawi lakah umnak nawl an ngei lo i Israel Pathian sin zongah raithawinak, khanghthawinak biaknak tuah khawh loin hnonmi minung an si. A ruang cu “mithianglo” tiah ti an si. Duhdawtmi u le nau, nu le pa hna (2Siang. 5) chungah kan hmuh khawhmi cu Israel miphun a si lo nain Jentail miphun a simi Naman ralbawipa cu thinghmui zawtnak a ngei i cu thinghmui zawtnak damter khotu dingah Pathian sal a simi Profet Elishia lawnglawng a um. A sinah a kal tikah, profet Elishia damnak a hal tikah Pathian sal nih a timi cu, “Jordan tiva ah va kal law, voi sarih va hnim law va thiang ko” tiah a ti. Naman ralbawipa nih ti in damnak a si ruah ti a ruah tikah, “Israel ram chung i a ummi tiva hna nakin kanmah ram chung i a ummi Damaskas tiva, Abana tiva, Pharpar tiva te hna hi Jordan tiva nakin an thiang deuh lo maw” tiah a ti tikah a salpa nih, “bawipa, Pathian mi nih an fialmi tuah loin maw na kir ko lai” tiah a ti i lungsii setsai loin Jordan tiva ahcun a kal i voi sarih aa hnim i thinghmui zawtnak cun a dam hirhiar kha kan hmuh khawh. A dam tikah laksawng tampi pek aa tim nain Profet Elishia nih a laksawng kha a cohlang lo. Asiahcun a ti i, Israel ram chung lawnglawng ah hin Pathian hi a um i hi Pathian hi kan thangṭhat peng khawh nakhnga ding caah La pahnih phawrh in vawlei ka pe, cu vawlei cu ka ram ah kaa tlunpi lai i cu lamh in Israel Pathian cu ka thangṭhat peng lai, tiah biakamnak a tuahta kha kan hmuh khawh. 

Duhdawtmi nu le pa hna cu nih zeidah langhter a duh kan ti a si ahcun Messiah, khamhtupa kan zumh tikah Pa le Fapa le Thiang Thlarau minin thumkomh Pathian min in tipil kan in tikah minung mithmuh ah si loin Pathian mithmuh ah sertharmi kan si, mitharte i kan i can i kan sual ngaihthiam dih kan si kha cucu biakam hlun nih a rak langhter chung bia a si. (Titus. 3:5) chungah cun, “Cu khamhnak cu hrin ṭhannak ti thawng le Thiang Thlarau i mitharter khawhnak ṭhawnnak a ngeihmi thawngin a si” tiah a ti i, Tipil kan in tikah kan thlarau kan sualnak vialte a kan tharter i mitharte ah a kan sertu hi ti siloin Thiang Thlarau Pathian tu kha a si. Duhdawtmi nu le pa hna Khrihfa kan zumh, Pathian kan zumh tikah tipil kan in tikah kan thlarau ah zawtnak he a khatmi hmaa he a khatmi thinghmu hmaa bantuk in kan rak sinak vialte kha ngaihthiam kan si i Pathian mithmuh ah sertharmi kan si kha nihin kan relmi bible nih a langhter duhmi a si. 

Duhdawtmi nu le pa hna cu a si ahcun Jesuh Khrih nih a timi cu, “na thiang cang, cucaah va kal law mizapi hmaiah va kal law, ka thiang cang ti langhternak caah Moses nih tuah awk a timi raithawinak kha va tuah” tiah a ti. Thinghmui hmaa in a zawmi hna le cu zawtnak in a thimi hna hi “minung a thi” ti si loin “thing chunghmui a pur” tiah kan lai, kan pupa zong nih rak ti a si i khua chungin ṭhawl an si i, khua chungin dawi an si. Cucaah do a tla lomi kan thlarau, Satan sal a si i thihnak cu a covo a simi dirhmun in mithiang, phunthiang, tlangbawi phun le siangpahrang phun ah a kan sertu cu a kan khamhtu kan Bawipa Jesuh Khrih a si i Jesuh Khrih thawngin miphun tling ah kan i cang a si. Moses phungbia ah, thinghmui zawtnak in a thiangmi hna cu Pathian sinah kan thiang cang ti langhternak caah raithawinak an pek i, va thiang pahnih le husup le sui darthing le thilsen kha i put in a luangmi tiva cungah va pakhat kha an thah i cu ahcun tlangbawipa nih a nungmi va pakhat le thilsen le husup le sui darthing cu tlak um chungah a hnim i a lungmi tiva cungah cun cuticun raithawinak a tuahpiak hna. Na sualnak thlah a si cang, na thiang cang, ti langhternak caah raithawinak a si. Thumkomh Pathian min in tipil kan in tikah Pa Pathian mit ah mithar kan si ko hnuah pumpak sualnak kan tuah ruangah kan sual ṭhan lengmang i ngaihthiamnak a kan petu cu kan Bawipa Jesuh Khrih, sihmanhsehlaw “hrennak in thlah na sic ang” tiah a titu hi a rianṭuantu zultu lamkaltu pawl an si. (Jn. 20) chungah kan hmuh khawhmi cu, Jesuh Khrih thihnak in a thawhṭhan hnuah an sinah a lang i, “Thiang Thlarau kha hmu ko u. Mi kha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko” tiah Jeush Khrih nih aana (power) a pek hna. Cucaah cun amah aiawh in rian a ṭuanmi hna tlangbawi hna nih hin mi sualnak ngaihthiamnak nawl an ngei i a ngaithiamtu cu Jesuh Khrih, sihmanhsehlaw hrennak nawl le thlahnak nawl a petu hi a rianṭuantu siangbawi le tlangbawi te hi an si. 

Cucaah cun duhdawtmi u le nau, nu le pa hna kan thlarau ah a thar tein ser ṭhanmi minung kan si i kan Bawipa Jesuh Khrih thawngin kan thlarau a dang cang caah sal i a kalpi tawn langmangtu, taksa kal ningin vawlei kal ningin kal ti loin thlarau karhlan ningin karhlan khawh i zuam usih law, Israel mi hna cu Babilon sal i an tan tikah Israel mi hna nih an ṭingṭang cu zion ah Pathian sunparnak ah an rak hman tawnmi cu Babilon hna nih zion hla kan sak piak uh, tiah an ti. Kan i nuamh nakhnga ding caah Zion hla cu sa uh an ti. Israel mi pawl nih Zion hla cu zei caah dah sal kan tannak hika hmun ah cun kan sak khawh lai, tiah an ti. Khamh ciami minung hna nih vawlei bia le hla ah na hna a ngamtuk maw. Sertharmi kan Thlarau nih Pathian hmuisam a keng chin lengmang bantukin duhdawtmi nu le pa hna Thlarau hla le Thlarau bia a simi Pathian thangṭhatnak hla /bia tu in kan nunnak hmang usih law, Pathian cu sunparnak pe cio ko hna usih. Jesuh Khrih thawngin thinghmui hmaa in a dam cangmi kan si kha i philh hlah usih. Pathian cu a bia le hla in sunparnak pe peng ko usih.

Thazang petu /- Saya Canute Bawi Kam