TLAKNAK LE SUALNAK A TAMNAK AH VEL A TAM CHIN

Pathian cu ṭhatnak vialte he a tling i a tuahmi vialte zong an ṭha dih. Sihmanhsehlaw aho paoh nih an nun chungah sifah harnak asiloah ṭhatlonak cu an tong cio dih. Asi ahcun, “khawika in dah ṭhatlonak hi an rat hnga? tiah ka kawl i a phi ka hmu kho lo,” tiah St. Augustine nih a rak ti. Ṭhatlonak kong biathuk hi biaknak kong biathuk lawng nih a langhter khawh. (II Thess. 2:7-8, I Tim. 3:16). Khrih chungin Pathian dawtnak nih sualnak a tamnak ah vel a tam chinchinnak kong a langter. (Cf. Rom. 5:20). Cucaah ṭhatlonak a thawhkehnak kong ah kan zumhnak mit kha ṭhatlonak a teitu cungah chiah in kan naih lai. (Cf. Lk. 11:21-22, Jn. 16:11, I Jn. 3:8).

Sualnak a tamnak ah vel a tam chin

Sualnak hi minung tuanbia ah a um taktakmi a si. Sualnak hi zeidah a si? ti theihthiamnak ah minung nih Pathian he i pehtlaihnak kha theihhngalh hmasa a hau. Pathian biaphuan chung vun zoh lawngah sualnak a sining kha fian khawh a si.

Biaphuan a vun ṭhancho bangin sualnak kong zong a vun fiang chin. Biakam Hlun chan minung hna nih minung nunnak chungah thila cangmi vialte kha sualnak chung tlaknak khan theihthiam an rak i zuam nain an fiang dih kho lo. Jesuh Khrih a thihnak le a thawhṭhannak lawngah hngalhthiam a rak si. (Cf. Rom. 5:12-21). Adam kha sualnak chuahnak hram tiah hngalh awkah Jesuh Khrih kha vel chuahnak hram tiah hngalh a hau. Thiang Thlarau nih sualnak ah vawlei nih a theihfiannak hnga Khamhtu a phuan. (Jn. 16:8).

Thawngṭhabia ah Jesuh cu mi vialte khamhtu a simi vialte cu khamhnak kan herh di hi cu khamhnak cu Jesuh Khrih thawngin kan hmuh ti kha kan hngalh. Cucu sualhram ruangah a si. Cucaah Khrih lungthin a kengmi “Bupi nih Khrih kong biathuk kha zeirel loin a um tikah sualhram kong kha lamhchih a si ti kha ṭha tein a hngalh. (Cf. I Cor. 2;16).

Bible ca nih minung tuanbia a dihlak hi hmasa bik kan nu le kan pa, sualnak chungah an tlaknak in aa thawk tiah fiang tein a kan chimh.