St. John Baptista ChuahNi (Kumzabu Pakhatnak)

Audio (aw) zongin ngai khawh a si. 👇👇

Nungak thiang Mary bantukin Johan zong hi zungzal nunnuamhnak ram ah a kainak puai le vawlei cungah a chuahnak puai ni tiin tuahpiak awkah a hleice in nawlngeihnak a ngei. St. John Baptista nu le pa hna cu Pathian hmai ah miding si ko hna hmanhsehlaw Elizabeth cu a cingmi a si caah fanu fapa ngei kho loin a um i, a kumkhua zong a upa ngaingai cang. Nikhat ah Zachariah cu Biakinn ah Tlangbawi rian a ṭuan lioah Vancungmi Gabriel cu a sinah a rak lang i, ‘Zachariah, na thinphang hlah, na thlacamnak kha Pathian nih a theih in a nupi Elizabeth cu fapa a hring lai’ tiah a ti. ‘Annih cu an tar cang caah hi thil cu zeitindah a si khawh lai’ tiah Zachariah nih a lehṭhan ve. Gabriel nih ‘Nangmah cu ka bia kha na zumh lo caah ka chimmi bia a tlun hlan tiang na molh lai’ tiah a ti.

Elizabeth fapa a hrin hnu niriat a tlin tikah an chungkhat le an innpa chakthlang hna cu an ra cio i, ngakchia kha cuarpar tannak an tuahpiak. Amah kha a pa miphun lei hoih in Zakariah kan sak lai tiah an ti tikah Elizabeth nih ‘Johan’ tiah kan ti lai tiin an bia kha a al hna. Anmah miphun chungah mah bantuk min a pumi pakhat hmanh an um lo caah an khuaruah a har cio. A pa zong nih cahnah cungah ‘A min cu John’ tiah a ṭial ve. Cu caante ah a ka aa an i, ‘Isarel Pathian, na cungah thangṭhatnak um ko seh’ tiah Pathian kha a thangṭhat. Ngakchia cu nikhat hnu nikhat a ṭhang chin lengmang i thlarau he a khat. Isarel miphun lakah a langmi a si hlan tiang ṭhetse ram ah a um.