Ṭih hlah u!

Zarhkel 12 nak Zarhpi ni kan phan ṭhan cang hna. Nihin ni caah Bupi nih thlarau thazang lak ṭi dingin a kan timh piak mi cathiang hna cu (Jeremiah 20:10-13; Ps 68; Rom 5:12-15; Maṭ 10: 26-33) tiang hna hi an si. 

Bawi Jesuh nih a hnu zultu hna thawngṭhabia phuan dingin a thlah hna hlaan te ah bia a cah ta mi hna cu “Ṭih hlah u” timi hi a si. Jesuh nih a zultu hna caah ṭha tein a timhtuahpiak nak a ngeih hna i, cun an mah lawngin a thlah hna hlaan ah bia a chimh mi hna zong a si. Cucu ‘Ṭih hlah u’ timi hi a si. 

Dawtmi u le nau hna nihin kan vawlei pi ah ṭih a nungmi thil tampi nih a kan kulh. Nifatin kan theih mi thawngpang hna zong ṭih ding mi thawngpang lawngte an si fawn. Hi thil si nak hna chungah hin kan nih hna zong zeitin dah kan um kan kal ve hna i kan nun ve hna? Ruat ṭhan hna u sih. 

Jesuh hnu zultu pawl nih thawngṭhabia an phuan tikah teinak an hmu taktak. Zeicah kan ti a si ahcun Jesuh nih a thlarau in a um pi peng hna caah a si. Cun thil khuaruahhar tuah khawhnak ṭhawnnak zong a pek fawn hna. Zultu hna zong nih cu thil khuaruahhar tuah khawhnak ṭawnnak an hmuh mi cu a herhnak ah ṭha tein an hman ve. Khua awng an tong taktak ve. Jesuh sin an hun kir tik zongah lunglawm thanuam tein an Bawipa sinah an thil ti khawhnak kong he pehtlai in an chimh. Sihmanhsehlaw, cu thil tuah khawh nak cungah i lawmh tuk dingin Jesuh nih a chim, a fial hna lo. “Vancung Pennak ah nan min ṭial a si caah i lawm deuh u” tiah a ti hna. 

Dawtmi u le nau hna, ṭhih phannak he a khat mi kan vawlei pi ah kan um lio ah Jesuh nih bia a kan kamh tak mi kha kan thei peng kho cio hna maw? Zultu hna nih cun an i cinken i an zulh. Nihin Khrihfa nang le kei teh Jesuh bia kan i cinken kho peng ve maw? “Ṭih hlah u, nan sinah zungzal in kan umpi hna lai” timi bia te kha thei peng hna u sih. 

Bawlung chuih zuamnak ah teinak hmuh khawh dingah cun kawl sut khawh a herh. Pakhat le pakhat i theithiam tein chuih ṭi zong a herh. Cun timhtuahnak ṭha zong ngeih a herh fawn. Cu ve bantukin Khrihfa mi hna nih kan i tinh mi kawl, vancung ram kan phanh khawhnak ding caah cun Jesuh Khrih kha kan zoh zungzal a herh ve. Zungzal a hmun lomi thil le vawlei chawva cung lawngah kan i tinhnak kan chiah a si ahcun kan tlau sual lai.

Dawtmi u le nau hna, Jesuh nih “Ṭih hlah u” tiah a kan ti. Kan thil tuahnak paoh ah kan Bawipa a simi Jesuh sinah thawngthanh hmasa lengmang hna u sih. Thlacam lengmang hna u sih. Kan Bawipa a simi sinah thawngthanh loin kan duhduh in kan um, kan kal, thil kan tuah a si ahcun  khuaawng kan tong lai lo. Thluachuah kan hmu lai lo. Ngamhsang ngai in Jesuh min in teinak kan hmuh zungzal nak hnga, Jesuh sinah kan zeizong vialte chiah in amah hnu zulh khawh i zuam zungzal ko hna u sih. 

Thazang petu /- Fr. Fidelis Maung Sein