Zeizong vialte hi Pathian duhnak a tuahmi hna caah a si
Nihin RVA in Pathian bia, thazaang a latu nan dihlak cungah a thar in Bawipa nih thluachuah in pe ko hna seh!
Nihin voikhatnak kan relmi 2Chanrelnak 24:17-25, Slam 89:3-4, 28-33, Thawngṭhabia Matthai 6:24-34. Tlangtar ka duhmi; ‘Zeizong vialte hi Pathian duhnak a tuahmi hna caah a si’. Pathian duhnak maw; Minung duhnak dah? Nihin voikhatnak kan relmi 2Chanrelnak 24:17-25 chungah, Isarel mi hna nih Pathian duhnak zul ti loin minung duhnak kha an zulh cang. Pathian Biakinn kha an kaltak i Asyria Siangpahrang nu a rian kha an ṭuan i, a siasal kha an biak. Cucaah Isarel mi hna cungah Bawipa thinhunnak cu a tlung. Isarel mi cu Bawipa nih Syria ralkapbu a thlah hnawh hna. Syria ralkap cu mi tlawmte an si ko nain annih kut chungah khan Bawipa nih a pek hna. Pathian duhnak tuah ti loin minung duhnak kha an zulh cang. Cucaah Syria kut chungah an tla.
Nihin ah nang le kei tah; Bawipa a duhnak maw; kanmah duhnak dah? Nihin Salm chungah kan relmi Bawipa dawtnak cu a zungzal in a hmun ko, Ka nawlbia a zul duh lo i ka phung ningin an nun lo ahcun dan ka tat hna lai. Sihmanhsehlaw ka biakamnak cu ka hrawk lai lo a ti.
Nihin Thawngṭhabia chungah Pathian le chawva; aho hmanh bawi pahnih sal nan si kho lai lo. Pakhat nan dawt deuh lai i pakhat nan huat deuh lai. Pakhat sinah zumhtlak tein nan um lai i, pakhat tu kha cu zei ah nan rel lai lo. Pathian le tangka cu a rian nan ṭuan kemh kho lai lo. Vancung ro le vawlei pahnih chungin pakhat na thim lai i na ṭuan lai. Vancung ro caah a biapi in a ruatmi hna nihcun chaw le va cu a pakhatnak ah an chia lo, Vancung pennak kong kha biapi in an ruah. Nihin ni ah mi tampi cu tangka ruangah, chaw le va ruangah an zumhnak a rawk cangmi tampi an um ko. Chaw le va a kan petu kan Pathian sunparnak lang ti loin chaw le va ṭhawnnak tu a lang cang.
Cucaah kan Bawipa Jesuh nih ‘Aho hmanh bawi pahnih sal nan si kho lo, Pathian le chawva cu a rian nan ṭuan kemh kho lai lo’ a ti. Zeidang vialte nakin Pathian duhnak kha a hmasabik ah a chiami le biapi deuh in a ruatmi cu thildang vialte hna zong a pek ko hna. Mt 5:6 ‘Pathian duhnak tuah kha nan duhnak nganbik i a chiami cu lunglawmmi nan va si dah! Pathian nih nan duhnak cu a tlinter lai’. 1Siangpahrang 3:1-13 chungah Solomon nih Pathian duhnak kha a tuah hmasa; Pathian cu Solomon cungah aa lawmtuk. Solomon, Na ka halmi zong kan pek, Na ka hal lomi zong kan pek; Rumnak le upatnak, nunkhua saunak kan pek. Solomon a duhnak a tlintertu cu nihin kan biakmi kan Pathian a si. 2Korin 8:9 ah kan Bawipa Jesuh cu a rum ko nain kanmah ruangah sifahnak a in, kanmah vialte rumter a kan duh caah a si.
Rumnak le upatnak, nunkhua saunak cu Bawipa kut chungah a ummi a si caah amah duhnak a tuahmi hna kha a pek ko hna. Zeizong vialte hi Pathian duhnak a tuahmi hna caah a si. A ngaitu nan dihlak cungah Pathian nih thluachuah in pe ko hna seh! Kaa lawm.
Thazang petu /- Saya Francis Khua Pheng