Romuald, Abbot (950-1027)

Camel Dollis Zateik bu a dirhtu Mithiang Romuald cu AD 950 kum ah Italy tam, Ravena khua ah phunsang chungkhar in a chuakmi a si. Amah cu vawlei nuamnak a duhmi le vawlei thisa nuamnak sal pakhat sinak in a rak ṭhangmi a si. Nikhat cu vawlei rumnak ruangah mi pahnih an i thahnak ah a pa nih an rualchan pa pakhat a thah sual caah tehte ah a dirpiak. Romuald cu a ṭihtuknak le a thin a phantuk caah Sanophrizane i a ummi Zateik Sianginn ah a zaam i, sualthlahnak, thlacamnak hna he a nunṭhatnak aa zuam. A pa zong cu a fapa Romuald i a ṭhami tuahsernak kha aa laak (aa zohchunh) i, a sualnak caah aa ngaichih ve i, a taangmi a nunnak kha Sanselve i a ummi Zateik Sianginn ah a hman. Kumthum a rauh hnu ah Romuald cu bairam ngaimi pakhat ah a cang i Zateik Sianginn cun a chuak. Amah cu mah lawng umnak kha kawl in Zateik Sianginn hmete kha a dirh hnu ah ram phunkip kha a cul i, kum 30 tiang khual a tlawng. 1012 kum ah a dirhmi Aresro pawng i a ummi Camel Dollis Zateik Sianginn cu minthiang bik a si. Mah hmun ahcun amah nih Camel Dollis tiah mitam nih an theihmi Zateikbu pakhat kha a dirh. Romuald cu phunsang mi an rualchan mino pakhat kha amah i nuamhnak lawng a duhnak ruangah fakpi in sual a phawt i a sik. Nikhat cu, cu pa nihcun Romuald kha mi theih awk a ṭha lomi sualnak pakhat in sual a puh. Amah i Zateik hna nihcun mah sualpuhnak kha an zumh i, Romulad kha an bu in an chuah. Mah thil vialte kha amah nihcun thlaruk chung dai tein a inpiak. Asinain a hnu ahcun thilhmaan kha a rak lang i, amah kha hmasa a reng ningin rian an pekṭhan. Amah cu 1027 kum ah Ankona pawng i a ummi Katstro Zateik Sianginn ah a thi.