VANCUNG KHUA AH KAN CHAW KHONG HNA USIH
Nihin ni i Bupi nih rel ding a kan timhpiakmi (Mt. 6:19-23) a si. “Rungrul le cirik nih an ei khawh i mifir nih an fir khawhmi vawlei ah hin nan chaw va khong hlah u. Rungrul le cirik nih an ei khawh lo i mifir nih an bauh i an fir khawh lonak vancung tu ah khin nan chaw cu va khong u. Zeicah tiah nan chaw a umnak ah nan lung zong a um ve lai. Mit hi pum caah meiinn a si, nan mit a ṭhat ahcun nan pum cu a dihlak in ceunak in a khat lai. Sihmanhsehlaw nan mit kha a ṭhat lo ahcun nan pum cu muihnak chungah a um lai. Cucaah nan chung i a ummi ceunak cu muihnak a si sual a si ahcun cu muihnak cu a fak ngaingai mi hmuhnak a si lai”
Khrih ah zumtu nu le pa, u le nau hna nihin kan relmi thawngṭhabia chungah Khrih nih a kan chimhmi bia he pehtlai in a hmunmi ram a si lo caah a hmunmi ram vancung ah ka cawva va khon dingin a kan cawnpiak. Khrih ah u le nau, nu le pa hna nangtah a hmunmi ram ah na chaw zeitluk dah na khon ve cang? Pathian salṭha Job nih, “Ka nu paw chungin taklawng in ka chuak i taklawng in ka kir ṭhan lai” a ti. Vawlei cung i kan nun lio i Pathian nih a kan pekmi sui ngun chawva thilri hna hi kan thih tikah kan i kalpi kho lai lo nain kan nun lio caan chungte ah a hmunmi ram ah kuat in i khon khawh a si ti kha Khrih Jesuh nih fiang tein a kan chim. (2Korin. 4:18) ah, “Kannih nih kan i zoh chihmi cu hmuh khawhmi thil si loin hmuh khawh lomi thil khi an si. Hmuh khawhmi thil cu caan tawite lawng a nguh, sihmanhsehlaw hmuh khawh lomi thil cu zungzal in a hmun” tiah a ti. Cu bantuk lungput a ngeimi hna cu Pathian salṭha an si i zumhnak he thlarau ram ah kar a hlangmi hna an si. Nihin kan relmi (Mt. 6:23) ah, “Cucaah nan chung i a ummi ceunak cu muihnak a si sual a si ahcun cu muihnak cu a fak ngaingai mi hmuhnak a si lai” tiah Khrih nih a ti. A sullam cu muihnak fa si loin ceunak fa, thlarau fa si loin taksa rumro in kar a hlang i vawlei pumsa duhnak lawng kawl in, taksa diriamnak lawng a kawlmi zumnak a ngei lomi kha Jesuh Khrih nih a chimduhnak a si.
(Mt. 6:21) ah, “nan chaw a umnak ah nan lung zong a um ve lai” tiah a ti. Zumhnak in kar a hlangmi hna nih vancung ah an chaw an i khon i kan laksawng cu kan hmuh ṭhan te lai ti ruahchannak he tampi in khon khawh an i zuam. A ruang cu an chaw a umnak vancung ram ah an lung a um caah a si. (2Korin. 9:6) ah, “Thlaici tlawmte a tuhmi nih tlawmte lawng an zun. Tampi a tuhmi nih tampi a zum lai” tiah a kan ti. Pumsa duhnak in kar a hlangmi hna cu vawlei kal ningin an nun caah vawlei i an thiri le sui ngun chawva lawngah an lung a um, hmuh khawhmi vawlei thilri lawngah an lung a um caah cu hmuh khawhmi vawlei thilri zohchih in kar an hlang. Vancung ah khonmi an ngei lo. Asiahcun Vancung ah zeibantuk lungput he dah kan i khon lai tiah kan ti a si ahcun zumhnak, dawtnak, ruahchannak lungput he i khon khawh a si. Minṭhatnak hmuh duh men le pawrhlawtnak thinlung he na pek a si ahcun cucu vancung a phan lomi thil a si. Asiahcun aho nih dah vancung ahcun an chaw cu tampi an khon? ti kha kan zoh ṭhan lai. Na pekmi a tlawm, a tam kha Jesuh nih a zoh bal lo. Na pek lomi zeitlukdah na ngeih timi kuang chung i a tangmi tu kha Jesuh nih cuai a thlai.
(Mark. 12:44) ah, Jesuh Khrih cu biakinn ah a kal i cuka ahcun tangka chiahnak pawng ah khan a ṭhu i tangka a sanhmi kha a zoh hna. Mirum tampi nih khan tampi an sanh lengmang. Khi lioah khan a sifak ngaimi nuhmei pakhat a ra ve i phaisa piahra tluk a simi dar tangka pahnih kha a sanh ve. Jesuh nih a timi cu a zultu hna kha a kawh hna i, “Hi a si a fakmi nuhmeinu nih hin tangka kuangah midang vialte nakin tambik a sanh. Zeicah tiah a dang nih cun an ngeih hlei kha an sanh. Sihmanhsehlaw hi nu hi cu sifak ngai a si ko nain a ngeimi vialte kha a sanh dih. A nunnak ca i a hman dingmi kha a thawh dih” tiah kan Bawipa Jesuh Khrih nih a ti.
Cucaah cun duhdawtmi u le nau, nu le pa hna nihin ah biakinn ah thawhhlawm na pek tikah phaisa nawk na kawl rih maw? phaisa nawl na thleng rih maw? Pathian rianṭuantu hna kan siangbawi, kan sister te nan inn an rak rat tikah ta thla an in cawm piak ah siseh, laksawng na ngeihmi chungin zeitlukdah na ṭhenh hna. Na ngeihmi tampi lakah chim tlak lote na pek a si ahcun vancung ah chaw na khonmi kha a tlawm hringhran. Innpa chakthlang, hmeinu/pa, mi tangnung deuh tah zeitluk dawtnak he na pek cang, zeitluk in ah vancung ah chaw na khon cang? Na pekmi a zat cungah Pathian nih rii a khiak bal lo i kuang chung i naa chiahmi ah khan zeitluk indah na pek timi cu kha Pathian nih cuai a thlai a si. Vancung i chaw a khongtu hna cu leiram zongah hin thluachuah an ting co. Elijah cu Zeriphet nuhmeinu nih, “aww, Pathian i minung ka inn ah zeihmanh a um ti lo. Changreu hlumkhat le changvut um ah changvut peikhat te lawng ka ngei ko a ti. Hi kan ei ahcun kan nufa kan thi cang lai” a ti. Sihmanhsehlaw, profet Elijah nih “Rak ka pe ko, kan fialmi va tuah hmasa” tiah a ti i, anmah nufa an ei hlanah Pathian mi a simi Elijah cu a pek hmasa i an changvut um le an chiti thawl cu zeitik hmanh ah a reu bal lo ti kha cathiang chungah fiang tein hmuh khawh a si.
Duhdawtmi u le nau, nu le pa hna Vancung ah zumhnak, dawtnak, ruahchannak he na chaw na khon i na pekmi hi vawlei cung zongah na thluachuah tinconak a si. (Phut. 11:24) chungah kan hmuh khawhmi cu, “mi pakhat khat nih fiang tein a pek langmang, sihmanhsehlaw a rum chin. A dang pakhat nih tinsi ngaiin a nung, sihmanhsehlaw herhbaunak lawng kha a miak ko” tiah a kan ti caah duhdawtmi u le nau, nu le pa hna zumhnak, dawtnak, ruahchannak he vancung i chaw aa khongtu hna hi vawlei cung zongah an chambau bal lo i vawlei thluachuah zong a tingcomi an si caah thlarau mirum, taksa leiah thluachuah a hmumi kan si khawh nakhnga ding caah lungthin thiang tein Pathian cu pek khawh i zuam ko hna usih, a mifa hna dawt khawh i zuam ko hna usih. Kan si khawh tawk in sui ngun chawva, innpa chakthlang hna zong ṭhenh pek khawh kha i zuam hna usih. Cucu vancung ram i kan chaw kan i khon cu a si.
Thazang petu /- Saya Canute Bawi Kam