Siangpahrang ta a simi cu Siangpahrang kha pe u; Cun Pathian ta a simi cu Pathian kha pe u
RVA in thawngṭha a rak ngaitu, thlarau tirawl a rak i hrawmtu, dawtmi u le nau vialte hna; nihin ah June 2, cawn nihnih ni ca i cathiang kan relmi hna hi thlarau tirawl ah hrawmh kan duh hna. Minung kan nunnak ahhin pumsa caah kan herhmi tirawl a um bantukin khan, thlarau caah kan herhmi tirawl zong kha a um. Nihin ahhin kan thlarau caah siseh, kan pumsa caah siseh kan herhmi tirawl kha hrawm awkah khan kan duh hna. Nihin ah thawngṭha a ngaitu dawtmi u le nau vialte hna, nan rak dam cio hna lai tiah zumhnak ka ngei.
Nihin ah kan relmi hi; 2Peter 3:5-15, 17-18 tiang kan rel. Cun, Mk 12:13-17 tiang kha kan relmi hna in hin nihin ah cheuhbauh kan duh hna. Minung hi vawlei cung kan um tikah uktu kan ngei, pumsa leiah lam a kan hruaitu kan ngeih bantukin khan thlarau lei i lamhruaitu zong kha a um. Hika ah thlarau lei a kan hruaitu lawng kha an bia kan ngaih i, uktu lei in a kan hruaitu hna kha an bia kan ngaih lo ahcun minung kan si kho hnga lo. Cucaah minung kan si bantukin khan thlarau caah kan herh, pumsa caah kan herh. Cucaah Mithiang Paul nih ‘An uktu hna, uktu hna i bia kha va ngai u’ tiah khan a kan ti.
Cun nihin ah Mk 12:13-17 tiang kan rel tikah hin, Bawipa Jesuh Khrih sinah Farasi pawl nih biahalnak an rak tuah tikah ‘Siangpahrang sinah ngunkhuai kan pe lai maw pe lo’ tiah an ti tikah Bawi Jesuh nih zei a ti hna; ‘Nan tangka cu rak pu hnik u’ tiah a ti hna i an rak put tikah, a zuk kha a cuang i mah tangka i a zuk cungah khan aho zuk dah a si, aho hmanthlak dah a si a ti hna tikah, Siangpahrang Siangpahrang i zuk a si. Cucaah Bawi Jesuh nih zei a ti; ‘Siangpahrang ta a simi cu Siangpahrang kha pe u, cun Pathian ta a simi cu Pathian kha pe u’ tiah Bawi Jesuh nih a chim tikah biahaltu pawl cu zeihmanh leh awk le hal awk, hal chih awk zong kha an thei ti lo, a arṭhup ko e ti si.
Nihin ah Bawipa Jesuh Khrih nih a kan cawnpiak mi; ‘Siangpahrang ta a simi cu Siangpahrang kha pe u; Cun Pathian ta a simi cu Pathian kha pe u’ tiah khan a kan ti tikah Siangpahrang ta a simi cu Siangpahrang kha pe u a timi cu zeidah a si ti ahcun; vawlei cungah hin khuazei khuazei ram poah ah, khuate kan si zongah khuapi kan si zongah khan ngunkhuai timi kha a um. Cun ramdang i rian a ṭuanmi kan u kan nau vialte hna zong nih hi kan ram caah rian a ṭuanmi hna caah tiin ngunkhuai kha nan rak thawh, phaisa kha nan rak thawh i, kan ram ṭhatnak caah tiin khan phaisa ngunkhuai nan rak thawh bantukin khan Khrihfabu rianṭuannak caah, Bawipa Jesuh Khrih caah tiin phaisa kha nan rak thawh ṭhiamṭhiam. Zeidah a si ti ahcun Siangpahrang caah nan rak pek bantukin khan Pathian ca zongah nan rak pek kha a si.
Cucaah Mithiang Thomas Aquinas nih zei a ti ti si ahcun; ‘A good citizen is a good Christian’ tiah a ti. Citizen-rammi ṭhami cu Khrihfa ṭha zong a si ve tiah a ti bantukin kannih nih khuazei ram kan um poah ahkhan, a kan uktu kan bawi le hna, a kan hruaitu hna i an nawl kha ngaih a herh hrimhrim ti kha kan hmuh.
Cucaah kan Bawipa Jesuh Khrih nih a bialehnak ahhin ‘Siangpahrang ta cu Siangpahrang kha va pe u’ tiah a ti tikah khan, hi kan ram uktu hna caah ngunkhuai cuzat cuzat khawlh ding tiah an timi kha khawlh ding ṭuanvo kan ngei i, pek ding kha ṭuanvo kan ngei i, an kan chimh ning tein khan hmaanhmaan tein kan zulh i kan pek a si ahcun good citizen-a ṭhami rammi kha kan si. A ṭhami citizen kan si ahcun Bupi lei i thlarau lei in a kan hruaitu kan Khrihfa upa hna le kan Siangbawi hna le kan Bishop le an nawl zong hi kan ngai hrimhrim hna.
Zeidah kan tuah ve ti si ahcun Pathian sinah, hi cathiang chungah ṭhenhra ah ṭhenkhat hi keimah ta a si, nan pek hrimhrim lai a ti bantukin khan zumtu Khrihfa hna nih zeidang zeidang i siangtlam ngaiin a pemi kha cu an i zuam deuh. Sihmanhsehlaw kannih nih a tlawmbik in kan cheuhra ah kan hlawhmi kan ngeihmi i cheuhra ah cheukhat kha cu Pathian ta a si caah khakha cu Pathian sinah pek hrimhrim kha a hau timi kha kannih nih kan ruah ding kha a si.
Cucaah dawtmi u le nau hna; hika ah good citizen-a ṭhami citizen in khan lam a kan hruaitu, uknak leiah a kan hruaitu hna i an nawl kha kan ngaih i, kan ram dawhnak caah, kan ram ṭhatnak caah rian a ṭuanmi hna kha an nawl kan ngaih hna bantukin Pathian lei in lam a kan hruaitu hna i an chimmi kha ṭha tein kan ngai a si ahcun Bawipa Pathian a nawl ngaih kha a si. Cheuhra cheukhat kha amah ta a si i kan pek bantukin Bawipa Pathian nih ‘Bawipa na Pathian kha na thinlung dihlak, nan ruahnak dihlak, na thazaang dihlak in na dawt lai’ tiah a kan ti tikah, a ngaingai ti ahcun minung kan nunnak hi a hmanungbik ahcun Pathian sinah a kal dingmi kha a si. Sihmanhsehlaw vawlei cungah kan um rih caah vawlei i a kan hruaitu an bia zong ngaih a hauh bantukin khan thlarau lei in lam a kan hruaitu hna nawl zong kha kan ngaih a hau ve timi kha kan theih.
Cun Mithiang Peter nih a cakuat pahnihnak ahhin zeidah a kan chimh ti a si ahcun, ‘Hi vawlei cung nan nun lio le hi vawlei cung i kan Pathian a rat lainak kha nan hngah lio ahhin; a thianghlimmi le soisel awk um lomi nunnak in nun i zuam u’ tiah a kan ti bantukin vawlei cung ahhin taksa in a nungmi kan si bantukin khan, thlarau lei zongin a nungmi kan si. Hi tikah hin Pathian fa kan si i, kan kalnak ding kha Pathian sin a si tikah Pathian sinah khan kan i pek deuhnak hnga le, cun vawlei cungah kan ṭuan hngami, kan tuahser hngami vialte zong kha thianghlim tein le kan hawinu kan hawipa cungah thianghlim tein bia kan chim khawhnak hnga, rian kan ṭuan khawhnak hnga zong kha nihin ah Mithiang Peter nih a kan forh duhmi kha a si.
Cucaah Mithiang Peter nihhin ‘nan nun lio ahhin Bawipa Jesuh Khrih a rat lainak a hngak liomi nan si bantukin khan thilṭha, thil thianghlim, soi awk um lomi nunnak kha nun i zuam u’ timi kha vawlei pumsa in kan nun lio te ahhin thilṭha kha tuah ding ah Mithiang Peter nihkhan a kan sawm. Cucun zeidah a kan ti rih ti a si ahcun ‘hi vawlei cungah Pathian nih caanṭha a kan pekmi le nun khua saunak a kan pekmi zong hi, nan thlarau khamhnak caah caanṭha in khan ruat u’ tiah a kan ti bantukin hi vawlei cungah kum saupi kan nun zongah, kum tawite kan nun zongah Pathian duhnak ningte khan nun i zuam awk le cucun kan nunnak kha vawlei pumsa caah taksa caah hman nakin khan Pathian ca deuh ah papek in kan nun a si ahcun le, hi kan nunnak vialte hi Bawipa Pathian nih a kan pekmi nunnak a si timi kha kumkhat kan nun zong, kumhra kan nun zongah, kum sawmnga kan nun zongah Bawipa Pathian i a kan dawtnak, a kan zaangfahnak a si timi hi ruah in khan Bawipa Pathian nih a kan dawtnak le a kan zaangfahnak caah hin lawmhnak a chim thiammi zong kha si i zuam usih!
Cuticun kannih vialte nih vawlei cungah kan nun lio bantukin a ṭhami citizen in Khrihfa ṭha ah kan cang kho lai i, Khrihfa ṭha kan si khawh ahcun hmailei ah zungzal nunnak kha kanmah caah 100% in khan aa fiang timi kha kannih nih thazaang i laak usih.
Thazang petu : Fr. Abraham Hrang Hit