September 24 ah Fulton Sheen cu mithiangcannak pek a si lai
American Archbishop Fulton J. Sheen cu September 24, 2026 ah St. Louis Biakinn pi ah Cardinal Luis Antonio Tagle hruainak in Missa tuahnak he mithiang sinak pek a si lai tiah bupi chung mithiang mi hna konglam he pehtlai in tawlreltu phu nih thawngthanhnak an tuah.
Fulton J. Sheen cu 2026, September 24, Nilini ah St. Louis, Missouri ah mithiang cannak pek a si cang lai.
Cardinal Luis Antonio Tagle, Pro-Prefect of the Dicastery for Evangelization nih, Pope Leo XIV aiawh in beatification Mass cu a hruai lai.
Fulton Sheen a nun can konglam he pehtlai in hlathlai nak tling tein an tuah hnu ah 2012 ah Pope Benedict XVI nih Sheen cu Venerable (upat tlak a si) tiah vawlei pi sinah theihternak a rak tuah. 2019 ah, Pope Francis nih Fulton Sheen thlacampiaknak thawngin khuaruahhar thil pakhat cohlannak a rak ngeih bal.
Hi theihhngalhnak ruangah Archbishop Sheen cu mithiang sinak dirhmun ah cohlaan a si i, amah cu “Mithiang” (Blessed) pakhat a si timi dirhmun in theih hngalh a si cang lai.
Bishop Fulton Sheen cu phungchimnak le Pathian bia cawnpiaknak lei in a min a thang ngaimi a rak si. Phung a chimnak ah a hlei in TV le radio hmangin a rak chimtu le theih mi siangbawi pakhat a rak si.
Fulton Sheen cu El Paso, Illinois ah May 8, 1895 ah Irish chungkhar in a chuakmi a si i kum 24 a si ah tlangbawi si dingin kawhnak a hmu. CUn 1919 ah tlangbawi cannak a rak hmu mi a rak si.
Washington (US) um Catholic University of America, Catholic University of Leuven (Belgium) le Rome um Pontifical University of St. Thomas Aquinas ah sianginn sang a rak kai hna.
U.S. ah 1926 ah a kir ṭhan i Catholic University of America ah ca chim rian a rak thawk i cu rian cu 1950 tiang a rak ṭuan. Bishop Sheen cu 1951 in 1969 tiang Rochester, New York ah Bishop rian a ṭuan; cun Pope Paul VI nih a hnu ah 1969 ah Newport, Wales i Titular Archbishop ah a thim.
Cawnpiaknak lei le biachimnak lei ah a thiam ngai mi Fulton Sheen phungchimmi hna cu mi tampi nih an rak uar tuk. 1930 ah, “The Catholic Hour” timi Zarhpi ni radio program ah aa rak tel ve i, cu program in a cawnpiaknak a ngaitu hna cu nuai li hrawng a rak phan.
1951 ah, zumhnak kong pehtlai in “Nunnak cu Nun tlak a si ko,” (Life is worth living) timi tlangpi in zarh fatin TV series in cawnpiaknak a rak tuah i nuai 30 hrawng nih an rak zoh.
Bishop Sheen cu Kum 84 a si ah New Yourk khua ah, December 9, 1979 ah a thi.