Vailamtah cu kan damnak asi
(21:4-9) Israel mi hna cu Izpit ram in Kanaan ram an kal lio ah nikhat cu an ti a hal tuk i tidin awk an ngeih ti lo tikah Israel miphun hna cu an lung a sau ti lo tiin cathiang ah kan hmuh. Israel mi hna an lung a sau lo tikah a hodah an zai hnawh tiah cun Pathian le Moses kha an zai hnawh mi hna an si. “Hika ram car le ti um lonak hmun ah hin maw thi hna seh tiah maw na kan ti Pathian le Moses kha an mawh chiat hna. Cu tikah Moses nih Bawipa sinah a kal i “Zeitin dah kan tuah lai” tiah a ti. Hitin an zai i Pathian an mawhchiat tikah Pathian nih chimhhrinhnak a tuah i ‘sivai a pin hringhran mi rul’ kha mi hna lak ah cun a thlah i cu tin a cawnpiak hna. Cuntin a si tikah Israel mi hna cu an lung aa thleng ṭhan i an sualnak an i ngaihchih ṭhan ee timi kha kan hmuh.
Hika zawn ah ‘minung cu a palhthiam mi kan si, a sualthiam mi kan si, thintawi thiammi kan si’ timi zong kha thieh ding a si. Sihmanh sehlaw, a caan caan cu kan thintawi i kan lung sau loin Pathian pek mi kan hmur kankaa, kan lei kan dang in Pathian kha kan mawhchiat ṭheo tawn. Cun a rianthiang a ṭuan mi zong kha kan mawhchiat ṭheo tawn hna. Sihmanhsehlaw, aa ngaihchih mi hna cu Bawipa nih a zangfah hna timi kha kan hmuh.
Israel mi hna nih Bawipa sinah, “nangmah sinah kan palh e” tiah Moses sinah ngeihthiam halnak kha an chim tikah “Bawipa nih Dar-rul” ser dingin Moses kha a fial. Moses nih Bawipa fial bantukin a tuah tikah Bawipa fial ning in a tuah-a zul mi hna paoh cu damnak an hmu ṭhan timi kha kan hmuh.
Thawngṭhabia kan rel mi chungah zongah Jesuh nih Pa Pathian he an i pehtlaihnak, naihniam tein a umnak kha a chim tikah Judah mi hna nih an zum kho lo, an thei kho lo timi zong kan hmuh. Bawipa nih zeitin dah a ti? “Mi Fapa hi vailam ah tar a si tikah nan zumh te lai, keimah lawng si loin a ka thlah tu a rain ṭuan mi zong kha nan hngalh te ko lai” tiin a ti hna. Bawipa vailam an tah lio ah khan Rome ralbawipa pakhat nih “aw, amah hi cu Pathian Fapa hrimhrim a si ko” tiah a rak ti i cu pa zong cu a lung aa thleng i Jesuh cungah zumhnak a ngei timi zong kha kan hmuh.
Israel mi hna nih ting cungah tar mi dar-rul kha an zoh tikah damnak an hmuh bantukin vailam cungah an tar mi Jesuh Khrih zumhnak in a zoh tu hna paoh cu khamhnak, damnak an hmu ṭhan, Jesuh cu kan damnak a si timi kha kan theih ding a si. Israel mi hna nih Pathian sinah an palhnak caah ngaihthiam an hal bangin kan nih hna zong nih Bawipa sinah “Maw Bawipa, kei cu misual, mi palh ka si ko” tiin ngaihchihnak thinlung he Bawipa kha panh ding a si.
Dawtmi ule nau hna Israel mi hna bang khan minung a simi cu a sual thiammi, a palh thiammi a si ko. Sihmanhsehlaw, “ka palh tuk e ka ngeithiam hram ko law” timi ngeihthiamnak halnak bia le “kan sual kan palh” timi i phuannak bia kha kan chim thiam a si ah cun, kan palhnak kan theihthiam a si ahcun, Bawipa nih taksa thlarau damnak a kan pek ko lai. Cun a hmanung bik ni ah zungzal nunnak thluachuah zong kha a kan pek ko lai. Bawipa nih thluachuah in pe ko hna seh. Amen