Pathain nih sualnak tuah dingin a kan au lo
Nihin kan relmi cathiang hna cu Daniel 13:1-9,15-17,19-30,33-62 ; John 8:1-11 an si. Voikhat nak cathiang chungin kan theih mi cu Susana le biaceihtu bawi hna kong a si. Kan hmuhmi cu biaceihtu bawi hna nih Susana kha sualpi an timh tikah an lem kho lo. Cutikah biaceihnak zung chungah an chuah pi i Thiang Thlarau fialnak in Daniel nih thildik lo tuah a tim tu hna kha an tinhmi man a liam ter hna i Susana cu khamh a sinak kong a si.
Thawngṭhabia chungah ah, Farasi mi hna nih sualnak a tuah lio an tlaihmi nu pakhat kha Jesuh sin an chuahpi i sual an phawt, cun biaceih piak dingin an timh nak kong a si. Zeiruangah dah Farasi mi hna nih Jesuh Khrih kha an rak cohlaan khawh hnga lo? Fiang tein theih khawh a simi cu ‘anmah le anmah kha miding, mifel, Pathian sinah pum aa pe mi mithiang hna’ bantukin an i ruah i midang hna tu cu ‘misual, mi ṭha lo, hell ah a kal hnga dingmi hna hmuh in an hmuh hna caah’ Jesuh mithmuh ah thiam an co kho bal lo timi kha kan hmuh khawh.
Minu cu Jesuh sinah an kalpi i ‘hi minu hi sualnak a tuah lio ah kan tlaih, lungin thi lak in cheh ding a si’ an ti tikah Jesuh nih, “Sualnak ka tuah bal lo a timi nih chep hmasa seh” tiah a ti hna ah pakhat hnu pakhat an i zuk, an i phiak dih in pakhat hmanh tang loin an kal dih timi kha kan hmuh. Jesuh nih minu cu “Kei zong nih sual kan phaw ve lo, va kal ko cang” tiah a ti. “Sihmahsehlaw, sualnak cu va tuah ti hlah!” tiah a ti.
Pathian nih kan sualnak a kan ngaihthiam mi cu sualnak hna kha hrial in sualnak tuah ti lo ding in a kan auh, a kan fial ve mi cu a si. A caan ah, kan pianthar hnu ah, khamhnak kan i fian hnu cun, sualnak kan tuah len zongah a thi kho lo kan ti i pianthar hi ‘sual tuah khawhnak lehhmah’ hmuh, ngeih bantukin a ruat mi zong kan tampi i, cu bantukin cawnpiaknak a tuah tu zong tampi kan um.
Pathian nih a kan auhnak, kan sualnak a kan ngaihthiam cu sualnak tuah ti lo ding, mithiang si ding ah khan a kan auh mi cu a si. Farasi mi hna nih cun anmah le anmah sualnak kha an i hmu lo i midang sualnak kha an hmuh caah Jesuh sinin thangṭhat an ton lonak cu a si. Mithiang Paul nih Rome 3:22-23 ah ‘Ahohmanh i thleidan ding a si lo. Zeicah tiah, mi vialte cu kan sual dih cio ko i Pathian sunparnak kha kan bau dih cio ko’ a ti. Ahohmah Pathian hmai ah a ding dih mi kan um lo. Cuasicaah, midang hna cungah biaceihtu kan si sual maw? Sual a phawtu kan si sual maw?
Jesuh nih “midang kha sual va phaw hlah u” a kan ti. Sual phawtu kan si ah cun sual pawt kan si ve ko lai. Cuasicaah, kan mah le kan mah sual i dah, i hmuh thiam in “Bawipa, kei cu misual ka si, ka ngaithiam ko” tiin Pathian sin ah a kir ṭhan kho tu, Bawipa sinah kar a hlang chinchin kho tu zumtu ṭha, Khrihfa ṭha kan si khawhnak hnga ding caah Bawipa nih thluachuah kan pe cio ko seh. Amen