Zumhnak in Damnak lei ah
Nihin ni caah kan Bupi nih a kan thimpiakmi Pathian bia chung in a voikhatnak Bible (2Siang 5-1:15) chungin thazaang lak ṭi dingah kaa thimmi a si. Cu chungah rawlbawi pa Naaman damnak a hmuhnak kong kha a si i Naaman nun in thazaang i lak ṭi dingah chim ka duh. Naaman hi Siria Siangpahrang pa i ralbawi pa a si i zumlotu a si ti cu a fiang, cun Naaman hi miṭha a si ti zong kha kan hmuh khawh. Mi ralṭha miṭhawng a si ti zong kha kan hmuh khawh. Asinain Naaman hi zawtnak a rak ngeimi a si i thinghmui zawtnak nih a rak tlunhmi pa a si. Miṭhawng mi lianngan a si ko nain chunglei nuamhnak taktak hi a rak hmu lo ti zong kha kan hmuh khawh.
Voikhat cu a sin um nute nih a Bawipa Naaman thinghmui zawtnak a ngei ti kha a hmuh tikah a bawinu sinah a chimmi cu “ka bawipa hi Samaria i a ummi Profet pa sinah va kal sehlaw a dam lai” ti kha a si. Cu tikah Naaman nih cun a Siangpahrang pa sinah khan a chimh i Siangpahrang pa nih cun ca a hei ṭial piak i Samaria ram ahcun a kalter. A va kal i Profet pa sin a phak tikah Profet pa nih cun thla a ka campiak lai i a ka damter lai ti kha aa rak ruahchan. Sihmanhsehlaw Profet pa nih cun “Jordan tiva ah va kal law voisarih in va hnim” tiah a fial. Cu tikah Naaman cu a thinhung tuk i zei ruangah dah kan khua kan ram ah tiva tampi an um ko ṭung. Israel tiva theng ahcun ka hnim lai a ti i a kir ti si. A pawng i a ummi a sinum nu nih cun “ka pa va kal ṭhan law Profet pa nih an fialmi hi va tuah ko, na dam ko lai” tiah a chimh tikah Profet pa bia bangin Jordan tiva ah voisarih aa hnim i cuticun damnak a hmuh ṭhan ti kha kan hmuh. Hika zawnte ah ruah awk ngai pakhat a ummi cu, Naaman nih damnak a hmuh khawhnak hnga caah a pakhatnak lam a sialpiaktu cu a sinum nu a si ti kha kan theih. Cun Naaman damnak a hmuhnak ah hin Jordan tiva ah a hnim timi kan hmuh. Damnak taktak a hmuhmi, damnak a petu hi Jordan tiva a si lo timi kha nihin ah chim ka duh.
Pathian bia nih fiang tein a kan chimmi cu (Isaiah. 53) “an tuknak ruah in damnak kan hmuh” a ti. Nang le kei damnak ka hmuhhnak taktak cu Jordan tiva hi a si lo, sii le ai hi a si lo. Cuti ka chim tikah hin sii le ai hi kan hman awk a si lo tinak si lo. Damnak taktak kan hmuhnak cu kan Bawipa Jesuh Khrih Thisen thawngin a si. Cucaah hika i Naaman zawtnak a damnak a hmuhnak cu Bawipa nih Jordan tiva hmangin damnak a pek bantukin nang le kei zong damnak hmuh khawhnak ding caah Bawipa nih nihin ah hin a kan sawm. Damnak kan ti tikah hin thlarau damnak a um i taksa damnak a um. Zawtnak zong hi thlarau zawtnak a um i taksa zawtnak a um. Cucaah taksa ah kan dam i thlarau zongah damnak tling kan hmuh khawhnak hnga ding ahcun “kan Bawipa Jesuh Khrih nih a kan fialmi amah bia bantuk tein kan tuah, kan zulh lawngah damnak kan hmuh khawh lai” timi zong kha chim ka duh.
Cun Naaman damnak a hmuhnak ah hin Pathian nih Profet pa hmangin damnak a pek timi zong kha kan hmuh. Profet pa bia bantuk in a tuah a ti. Kan Khrihfa nunnak ah a biapi ngaimi pakhat cu nifatin kan cawlcangnak, kan tuahsernak vialte hi Bawipa bia bantuk tein a cawlcangmi a ṭhu a dirmi Khrihfa zumtu ṭha kan si ding hi a herh ngaimi, a biapi ngaimi a si.
Cun Naaman damnak a hmuh khawhnak ding caah pahnihnak ah a hman mi cu sinum nute a si. Hika zawnte ah kan dihlak in thazaang i lak ṭi dingah chim ka duhmi cu mi vialte nih khamhnak, lawmhnak, hnangamnak, daihnak, remnak kan hmuh khawhnak ding caah ‘nang le kei zong hi rian a kan fial ve’ timi zong hi chim ka duh. Hi sinum nu nih hin a bawipa hi Profet sinah kal a fial lo ahcun a Bawipa hi damnak a hmu lai lo i lawmhnak zong a hmu hnga lo. A bawipa sin a chim tikah a bawipa nih a va kal i Bawipa bia bantuk tein damnak a hmuh i cu damnak a hmuh lawng cu si lo, damnak a hmuhnak thawngin Pathian a um ti kha fiang tein a zumh i Pathian kha a thangṭhat ti zong kha kan hmuh.
Cucaah mi vialte nih a nungmi Pathian an theih i cuticun lawmhnak, hnangamnak, daihnak, khamhnak a hmuh khawhnak hnga ding caah “Bawipa nih a thimmi kan si ve” timi kha nihin a biathiang in thazaang i lak ṭi hna u sih. A ngaitu kan dihlak cungah Bawipa nih a thar in thluachuahnak kan cio ko seh.