Vawlei Nunnak nakin Zungzal Nunnak hi a Biapi deuh

RVA a ngaitu nan dihlak cungah Bawipa thluachuahnak um ko seh. Nihin kan nu Bupi nih a kan thim piakmi Bible chungin tlangtar kan duhmi cu “Vawlei nunnak nakin zungzal nunnak hi a biapi deuh” timi tlangtar in tawite ruah ṭi kan duh hna. 

Voikhatnak Bible (Jer. 17:5-10) chungah zeidah kan hmuh ti a si ahcun “minung a bochan i minung kha a hngatchan i Bawipa kha a mertak mi cu an cungah chiat tlung ko seh. Amah cu thetse ram i a ummi burbuk bantuk a si. Ṭhatnak a rat tikah zeihmanh a hmu lai” a ti. Minung aa bochanmi, minung a hngatchanmi, Bawipa a mertak mi cu an cungah zeidah a tlung ti a si ahcun tunai kan relmi Bible, Bawipa nih chiat a serh lai i ṭhatnak a rat tik zongah zeihmanh a hmuh lai lo, thluachuah an co lai lo ti kha kan hmuhmi a si. Asinain keimah kha a ka bochan i a ka hngatchanmi cu an cungah thluachuahnak a ka pek hna lai a ti. Cu mi hna cu tiva kam i phunmi thingkung bantuk in an hnah zong hring dildel in an um peng lai, an theih zong punghmaan an tlai peng lai, vaupi ni a rat tik zongah zeihmanh ṭihnak an ngei lai lo tiah a ti. Bawipa aa bochanmi hna nun zeitindah a si ti a si ahcun tiva kam i a khomi thinkung bantuk tein an hnah zong a hirng dildel lai i an theih zong punghmaan an tlai lai” timi kha kan hmuh khawhmi a si. An nunnak ah a tawinak in kan chim a si ahcun thluachuahnak phunkip an co lai timi kha kan hmuh khawhmi a si. 

Nifatin kan nunnak ah hin dawtmi u le nau hna ahodah kan i bochan bikmi a si. Pathian nakin minung hi kan i bochan deuh sual i Pathian nakin minung hi kan i hngatchan deuh sual maw? Minung Pathian loin a nung kholomi kan si caah, Pathian kutchuak kan si caah nifatin kan nunnak ah hin kan lungthin dihlak in amah hi i bochan ko usih law, amah hi i hngatchan ko usih law cuti kan nun a si ahcun Bawipa nih kan nunnak lam ahhin lamtluannak a kan pek lai timi hi hmasa chim ka duh. 

Gospel chungah zeidah kan hmuh ti a si ahcun “Mirum pa le Lazaruh” kong kan hmuh. Mirum pa le Lazaruh kong kan theih tikah zeidah ka lung chungah a um ti a si ahcun mi nih vawlei pumpi co hmanhsehlaw a nunnak a sungh ṭungah cun zeital a miak hnga timi kan Bawipa Jesuh nih a kan chimmi biate hi ka lung chungah a um ngaimi a si. Hi vawlei pumpi hi kan co hmanh ah zungzal nunnak kan thlarau nunnak kan sungh ahcun Khrihfa kan cannak zong hi san a tlai lai lo, zeihmanh a ṭhahnemmi a um lai lo. Asiahcun mirum vialte hi hell an tla dih lai tinak si maw? A si lo. Sifakmi vialte zong hi van an kai dihlai tinak a si maw? A si lo. Mirum sifak um loin kan nuncan ziaza hi Bawipa nih a kan duhpiak ningin kan nun lo ahcun hell tla kho ding kan si kha zeitik hmanh ah philh hlah usih. Mirum kan si zongah sifak kan si zongah Bawipa nih a kan duh piak ningin kan nun lo a si ahcun kan tuahmi cu Bawipa nih kan tuah ning tein a kan zunter lai timi cu nihin kan relmi thangṭhabia chungah mirum pa nih a tuahmi cu a zuun taktak ti hi kan hmuh khawhmi a si. Voikhatnak Bible chungah kan hmuh khawhmi a si. An tuahnak nih a phut ningin le an ziaza ning cio in ka cham hna lai a ti bantuk in mirum pa zong hi a zuun taktak ve timi hi kan hmuh khawhmi a si. Zeicah tiah mirum pa nih hin a pawng i a ummi sifakmi Lazaruh kha a zohkhenh a kilven hna lo caah hell ah a tlaknak a si. A hmuh ko aa hmuhter lo, zeirel loin a um caah atu bantuk tein hell ah a tlaknak hi a si.

Nihin dawtmi u le nau hna, mirum pa bantuk in Khrihfa kan sinak hi a saupi ko nain a phung menmen Khrihfa hi kan tamtuk. Pathian cu ka Pa kant i ko nain Pa le fa pehtlaihnak a ngei lomi Khrihfa ka tamtuk. “Bawipa, Bawipa a ka timi paoh nih vancung pennak chungah an lut lai tinak a si lo” a ti bantuk in Pathian hi kan kaa lawng in “ka Pa, ka Pa” tiah kan ti ko lai nain zumhnak le nunnak taktak ah, kan nunnak ah Bawipa nih a kan duhpiak ningin a langhter lomi kan tamtuk caah cucu kan zulhmi lam cu zeidah a si ti a si ahcun mirum pa a kalnak hi kan kalnak lam a si ve ko lai ti hi dawtmi u le nau hna philh hlah usih. Mirum pa nih hin a thih hnu ah a lung a fim i a rualchan hna panga a kaltakmi hna caah a siaherh ngai. A thih hnuah a rualchan hna an kalnak kha amah lampi an zulh cuahmah lio a si caah “Eee… Ka pa Abraham, Lazaruh kha va kal ṭhan sehlaw keimah sinah hin an ratnak hnga lo va chim hna sehlaw” tiah a nawl lengmang nain a ngah ti lo. Abrahma nih cun zeitindah a ti, “Anmah chimtu dingah Moses le Profet hna pawl an um ko e” a ti.Dawtmi u le nau hna nihin, nifatin Biakinn ah kan theihmi, nifatin a bia kan theihmi, nifatin thawngṭhabia kan ngei lengmang mi hna hi nifatin kan nunnak ah kan i nunpi lo i kan zulh lo a si ahcun mirum pa bantuk in thih hnu kan i ngaihchihnak cu zeihmanh san a tlai ti lo i kan nun lioah hin Bawipa bia hi i nunpi ko usih law, nifatin kan nunnak ah hin langhter usih law cutin kan nun a si ahcun Lazaruh bantuk tein nang le kei zong nikhatkhat van ah a kai dingmi kan si lai. Bawipa bia kan theihmi te hi i nunpi ko usih. Zeicah tiah hi vawlei nunnak nakin zungzal nunnak cu a biapi deuhmi a si. Hi vawlei nunnak cu caan khat, chikkhat te lawng a si nain zungzal nunnak kan timi cu saupi a si caah hi vawlei nunnak nakin zungzal nunnak hmuhnak ding caah kan thlarau caah timhcia tein a ummi kan si khawhnak hnga i zuam cio hna usih.