Vailam loin Teinak, Sunparnak a um kho lo

Ulhnak caan zarh hnih nak ah kan lut ṭhan cang hna. Nihin kan rel mi Bible thiang hna (Gen 12:1-4) , (2 Timote),Thawngṭhabia (Mt 17:1-9)  hna chung in thazang i lak hna u sih. 

“Cun ni ruk hnu ah Jesuh nih Peter le Jeim le a nau John kha thlacam dingah tlangcungah a kal pi hna. An hmai ah cun a muisam ai thleng i a hmai cu nika bangin a ceu i a hnipuan ceu bantuk in a rang. Cun Moses le Elijah an ra lang i Jesuh he bia an i ruah. Bawipa hika um cu a caan a ṭha tuk. Na duh ahcun thlam pathum kan sak lai. Nangmah caah pakhat, Moses caah pakhat, Elijah caah pakhat tiah a ti. Hi bia a chim lio ah minmei ceu nih a hung zalh hna i “Hi hi ka dawttuk mi ka Fapa asi, a bia kha ngai uh” tiah a ti. Zultu hna nih aw kha an theih tikah an ṭih i vawlei ah an bawk. Sihmanhsehlaw Jesuh nih a thawh hna i “tho uh” tiah a ti hna. An zoh tikah Jesuh dah ti lo ahohmanh an um ti hna lo. Tlangcung in a ṭum pah ah khan Jesuh nih “Mifapa hi thihnak in ka thawh ṭhan hlan tiang hi hi ahohmanh nan chim hna lai lo” tiah a ti hna. Bawipa thawngṭha bia.

Ulhnak cang chung zong a si i, mah Bible vialte pehtlai in kan zoh tikah (No glory without the cross) tiah mirang nih an timi, ‘Vailam locun sunparnak a um lo’ ti mi nihin ah kan hmuh. Hi ulh caan chung ah kan relmi nih zeidah ralrin a kan pek. Thlachuah mi kan sinak dingah caah kan i zuam lai. I pekchanh a herh, sian a herh, Pathian kan zumh a herh tiah a ti mi kan hmuh. Bible chung kan zoh tikah Abraham kong kha kan theih. Bible hlun chungah Abraham nih nuam tein a khuasak nak vialte, khua le ram kha kal tak in, chuak tak in Pathian nih kal law tiah a timi Pathian duhnak thiam nak in khan thlachuahnak kha a lak timi kha kan hmuh. 

Cucaah Pathian nih na ram le na rualchan le napa inn kha chuahtak hna law kan hmuhsak lai mi ram ah kal tuah tiah Pathian nih a ti bantuk in ‘thlachuah kanpek lai i na min cu ka ṭhan ter lai’ tiah a ti. Cucaah Abramham a min cu thlachuah nak ah ka hman lai tiah Pathian nih bia a kam bangin, Abraham zong nih Pathian kha a zumh ve. A nawl a ngai a rak tlawnlennak nuamhnak vialte kha kal tak in a theihlo nak hmun, a hmuh ballo nak nak rampi ahcun a kal kha kan hmuh. Cucu Abrahlm i zumhnak le nawl ngeihnak kha a si.

Nihin Thawngṭha bia chungah Jesuh Khrih muihmai ṭhlen nak zong kha kan hmuh. Jesuh Khrih nih Peter le Jeim le John kha a auh hna i tlangcungah a kai pi hna. Peter nih Jesuh Khrih a muihmai aa ṭhlen mi kha a hmuh tikah ‘Bawipa hika ahhin um a nuam tuk. Na duh ah cun thlan pathum kansak lai i, nangmah caah pakhat, Elijah caah pakhat, Moses caah pakhat tiah a ti. Peter nih mah bantuk nuamhnak kha a hmuh caah ‘thlam kan sak lai’ tiah a ti nak a si. Zeicah tiah cun mah sunparnak le nuamnak ah khan um a duhtuk caah cutin a rak chimnak kha a si.

Sihmanhlaw Jesuh nih cu bantuk hmun i umnak nawl kha a rak pek rih hna lo. A ruang cu hi tlangcung in va ṭum rih u law khual va tlawng rih u, Thawngṭhabia va phuag rih u. Nuamhnak ah cun umrih hlah u’ tiin Jesuh Khrih nih vailam put khual tlawn i thawngṭha bia chim ding kha pehzulh in a fial hna.

Nihin ni ah kannih vialte hna zong a nuamhnak hmun, Tlang in ṭum in khual kan tlawn rih ding a si. Pehzulh in Bawipa Thawngṭhabia kha kan chim kan phuan ve rih ding a si. Kan theih khawh lomi, kan hmuh khawh lomi hmunhma ah Pathian nih va kal u law Thawngṭha bia va phuang rih u tiah a kan ti ve.

Bupi nih Mithiang hna kong he pehtlai in tampi a kan cawnpiak bangin Bupi chungah mithiang hna zong tampi an um. Mithiang Francis asi si hi mirum fapa asi. Italy ram, Asisi khua ah a rak um mi a si i a pa hi chaw zuar mi mirum a rak si. Amah bangin a fapa Francis zong si ve seh tihi a rak duh zungzal mi a si, a rak tinh mi zong a si. Sihmanhsehlaw Francis nih cun cu bantuk nunnak kha a rak duh tuk lo. Peru ram mi a hawipa he khan thong rak thlak an rak tong. A ruang cu ralkap an rak si caah a, si i tlaih khih an ton tikah kumkhat chung thong ah cun an rak um. 

Thong chungin cun Francis cu khua tampi a rak ruat. (Emptiness) mirang nih an timi, nunnak cu pakpalawng asi timi kha caan sau pi a rak ruat. Nikhat cu malaria zawtnak a rak zaw i a ihnak cungin hi bangin khua a ruat. ‘Hibantuk vawlei taksa nunnak hi cu kal tak in thlarau lei nun, sifak zohkhennak le, ṭhatnak tuahnak in ka nung cang lai’ tiin a lung a rak khiah. Jesuh Khrih cawnpiak nak “Va kal u law Thawngṭha bia chim in nung u” timi Bible nun kha tleih chih in, pumsa duhnak ulh in, dai tein nunnak lam kha a rak i thim. Nikhat thla a cam lio ah Pathian aw thawng a theih mi cu ‘a rawk cuahmah mi ka Biakinn pi hi sa tthan law’ tiin a si. Thlacam le a hlu tein a hmuh mi hna in Biakinn cu a remh ti a si. Safak nun in a nun mi kong kha a pa nih a theih tikah a duh lo i a fapa si nak in a hlawt hlei ah roco tu si nak zong in a hlawt ti a si. Cu ni thawk in Francis cu sifak nun in a nunnak kha Pathian sinah aa pekchanh i chunglei dam lonak in a nun a dih 46 a si tiang thianghlim tein Pathian rianthiang a rak ttuan. A thih hnu kum(2) a si ah Francis cu Bupi nih mithiang a si tiin thanhnak a rak tuah. 

Nihin kan theih mi Bible cathiang chung zongah Abaraham zong Pathian nawl ngaih in hmunthar ram thar ah a kal bantukin kan nih hna zong kan thleih chanh peng mi kha kan kal tak hna awk a si. 

Tabor tlang cungah khuaruahhar thil a hmu tu zultu hna zong an hmuh mi lawmhnak cung lawngah um loin Pathian nih a thlah hnga ding mi hmunhma ah ‘an vailam put in kal dingin’ fial an si. Kannih hna zong kan duhnak, kan i nuamhnak hmun kha kal tak in Abramham, le Zultu hna bangin in Pathian fialmi rian, kan sinin aa ruahchan mi kan tuah hnga dingmi a nawl zulh ding kha lunglawm tein kan zulh, kan tuah hnga ding a si. Vailam put loin nunnak a um lo, teinak a um lo timi zumhnak he kal hna u sih. 

Vailam loin cun teinak a um kho lo, Sunparnak a um kho lo. Kan vailam kha phorh in Bawipa hnu kha hi ulh caan lio ah hin zulh khawh i zuam cio hna u sih.