Pope Leo XIV nih Bishop Erik Varden hruainak in Lenten thlarau thazaang lak-cawlcanghnak a thawk
Pope Leo XIV cu Roman Curia (biaknak lei hruaitu) hna he retreat ‘ulh-caan thlarau thazaang lak nak’ cu Vatican ah Zarhpi ni in an thawk tiah theih a si. Mah retreat cawnpiak nak cu Pope nih a kawh mi, Norway ram um Torondheim khua um Cistercian Bishop Erik Varden hruai nak in tuah a si lai.
Varden nih Feb 22-27 tiang Lamkaltu hna Innpi timi Pauline Biakinn ah cawnpiak nak cu a thawk te lai.
Rome khua ah a ummi cardinal hna le Curia dicasteries hruai tu pawl cu Pope he naihniam in rianṭuantu hna he tuah kelmi zung rian hna kha chiah chung in thlarau thazaang lak nak ah i tel dih cio dingin sawn an si.
Clairvaux khuami St. Bernard nih a rak chimmi, zoh ning phun hnih tiah a timi: tuaktan ruahnak lei kap le Khrihfa hmuhtonnak taktak nak hmuhning in Varden nih “Thuhmi Sunparnak nih a Ceuhmi” timi tlangtar in a cawnpiak hna lai.
Cawnpiaknak cu caan 11 ah ṭhen a si lai i, cu hna ah cun “Lent Luhnak,” “Pathian Bawmhnak,” le “Ruahchannak Pehtlaihnak” timi hna chungin a si lai. Cawnpiaknak nih aa tinhmi cu, Curia caah rian a ṭuanmi hna nih ‘thinlung dai tein Pathian he caan lak khawhnak, lung dai tein tuaktaan theidan khawhnak (discernment) le chunglei tharchuahnak khawhnak caah a si.
Thlacamnak hna cu Bawipa Thisa biaknak (Eucharistic adoration) le nikhat ah voihnih Liturgy of the Hours thlacamnak he tuah a si lai.
Nikum ah, Lenten thlarau cawlcanghnak cu Capuchin friar Father Roberto Pasolini nih a rak hruai hna. Amah cu Pope Francis nih 2024 ah amah he naihniam in a ummi rianṭuantu hna caah rak tuahmi retreat hruaitu phungchimtu ah a rak kawh bal. Cu caan lio ah cun Pasolini nih ‘zungzal nunnak ruahchannak le biaknak lei ruahnak(theological reflection) hna he pehtlai in, biapi deuh in cawnpiak nak rak tuah a si.
“Khrih ah hram bunhmi” timi tlangtar in Pasolini nih ‘ruahchannak a herhnak’ kong kha thukpi in a rak chim i aa telmi hna kha nunnak thar biakamnak ah “hram bunhmi” in nun awkah cawnpiak forhfialnak a rak ngeih hna.
Cu cawnpiak nak ah cun, Pope Francis zong ni 38 chung Rome khua Gemelli siizung i a rak um lio ah aa rak tel ve i March 23, 2025 ah siizung in a rak chuak. Cun April 21 zinglei suimilam 7:35 ah a umnak Santa Marta ah a nunnak a rak liam.
Pope Francis cu kum fatin thlarau lei cawlcanghnak kha Pope rianṭuannak, a caan a dongh lei ah amah lawngin tuah kha aa rak tim tawn. Retreat tuahnak cu 2014-2020 hnu in Vatican in Rome chaklei meng 16 hrawng a hlatnak ,Italy ram Ariccia khua i dinhnak hmun ah a ṭhial hna.
Zum lo tu sining in Pathian rianṭuan bishop a si ṭhan mi
Varden cu 1974 kum ah a chuakmi a si i curial retreat phungchimtu hna lakah a nunnak le a rak si can ning aa phundang ngaimi pakhat a si. Pathian a um lo timi zumhnak(Athiest) pakhat a rak si i Khrihfa zumhnak a pomnak kong hna zong zeimawzat a rak chim bal tu a si. Amah cu atheist hna nih British Isles an dirh hnu ah Cistercian Order ah a lut mi a si. Kum tampi a rauh hnu ah a chuahkehnak ram ah a kir i, cuka ahcun Trondheim Bishop ah rian pek a si.
A siangbawi nunnak pin ah, thlarau lei kong he pehtlai in caṭialtu pakhat dirhmun in mipi nih an theih ngaimi zong a si.
A caṭial mi hna zong vawleicung hmun tampi ah rel ngaimi a si. Cu hna chungah “Entering into the Twofold Mystery: on conversion ” timi in cauk ah ca reltu hna kha ‘harsat-fahnak le lawmhnak phunhnih hmuh ton a si tikah’ Pathian lei ah an nunnak hoih dingin a sawm hna. Cun “Healing Wounds,” timi capar zongah ‘biaknak lei ruahnak le pumpak hmuhtonnak’ hna zong a langhter hna. Hi bantukin chanther minung hna caah ruahnak ṭha ṭial-langhter khawhnak ruangah amah cu sawm a si nak a ruang pakhat zong a si.