Aa Khat Lomi Nunning Le Thluachuah Veel
Pen Nekyar
Audio (aw) zongin ngai khawh a si.👇👇
Tanghra cawnnak cauk ah “Too much Knowledge make us fool” cawnnak tahchunhnak ah Sayaci pakhat sinah fimnak a rak cawngmi Siangngakchia pathum hna kong mi tampi nih nan theih bal ṭheo lai. Cu tahchunhnak ah Siangngakchia pathum hna cu annih lungduhmi khua ruahnak lei fimnak, arfi lei thiamnak le rinawn tum-lamnak lei thiamnak hna kha kumthum chung cawn i an thiam cikcek hnuah an chuahkehnak ram lei ah an rak kir. Inn kir lei khuallam ah khua hmu khomi an Sayacipa nih rawlchuannak bel pakhat a pek hna. An cawnmi fimnak kha thil si canning, a caan, konglam tuaktanin an hman thiam lo caah rawl voikhat ei ding hmanh kha a ei lomi mifim pathum hna i sining kha ka vun ruat ṭhan tik paoh ah minung nunnak lamthluan i a sang a niam aa khat lonak lakin Pathian nih a kan pek mi, aa khatmi khamhnak veel kha ka hei tuaktan.
Nunnak dothlei a niamsan aa khat lomi Zultu hna chungah Judah Iskariot le St.Peter hna i Jesuh nih a rak pek takmi khamhnak veel laksawng cu aa tluktlakte a si. Sihmanhsehlaw, an cohlan ning thinlung tucu a rak i khat lo. Bawipa Jesuh cu nitlak khuamuih i dinh lo rianṭuan buin rawl kaa khat kha ngatlai rianṭuan in paw aa cawmmi Peter le Judea ram ah a chuakmi thil theihthiam Judah kha a auh hna i Zultu hna sinak ah fimnak a cawnpiak hna hnuah aa khatmi veel thluachuah a pek hna. Curuangahcun Bawipa Jesuh cu zultu hna chung in thil theihthiam mi Judah kha tangka tlaitu ah a chiah i eidin hruk-aih hna a rak timhlamhter. Theihduhawk ngai a simi cu hnulei nunnak aa lo lomi hna pahnih cu Jesuh sin kumthum chung fimnak an cawng i a Bawipa kha voithum tiang a hlawttu le a Bawipa Saya kha tangka (30) in a zuartu ah an rak cang i annih cu an saya cungah palhnak pakhat cio an rak tuah. Sihmanhsehlaw, Jesuh nihcun aa khatmi khamhnak laksawng kha a rak pek hna. Peter le Judah cu laksawng kha an cohlan ning an thinlung aa dang. An pahnih te khan Bawipa Jesuh cungah palhnak tuahsual lo ding Jesuh nih ralring a rak pek hna. “Ar a khuan hlan ah voithum tiang na ka hlawt te lai” (Mt 26:34) tiah Peter kha ralring a rak pek bangin “nanmah la ki pakhat nih nan ka rawi lai” (Jn 13:21) tiah Judah kha hngalh tennak a rak pek. Saya Bawipa nih hngalhternak le ralring a pek ko hna nain palh nak pakhat cio an rak tuah ṭhiamṭhiam. Bawipa Jesuh cu mikip kha a dawt hna, mi zei pakhat hmanh kha rawhnak ah phakter a duh lo mipa asi. Cucaah amah nih a thimmi zultu Peter le Judah kha khamh a rak i zuam. “Jesuh zong a hun i mer i Peter kha a zoh” (Lk 22:61). A hmai ah an cil an chak i hramhram in tlaih khih a ing ko nain a hun i mer i Peter lei ah a zoh mi Bawipa Jesuh i zohning cu khamhnak sunghter a duh lomi veel thluachuah zoh ning, zaangfah zawnruahnak mit zoh asi khaa Peter nih a hngalh i Bawiipa Jesuh voikhat mitzoh tangah Peter thinlung a kuai i fakpiin a ṭap pah in aa ngaihchih i Bawipa Jesuh sin ah a rak kirṭhan. “Mehhang ah changreu kha ka hnim lai i pek mi pa cu a si lai” (Jn 13:26). tiah ralring a pek i a hngalh ter ṭhan ko nain Judah cu a Bawipa sinah ngaihchih in a rak kir ṭhan lo. Minung nunnak lamthluan cu aa khat lo, aa thleidan nak hna tampi a sem lai ti kha a hmaan mi a si. Sihmanhselaw, Khamhnak veel thlauhchuah cu Jesuh pumpak hrimhrim minung sinak a la ki, minung pakhat sinak kha a cohlan i harnak a in, thihnak a ing i sal kutchungin a hnuh i Pathian ṭhawnnak huham in minung hna caah khamhnak veel thluachuah kha a rak kan lakpiak. Sayaci nih a rak pek hna mi bel kha khuaruah tuaktannak he an rak hman thiam lo caah Siangngakchia pathum hna cu rawl voikhat ei loin an rak um. Saya Bawipa Pathian cu khamhnak pek dingah ralring a pek ko nain hngalhnak ngeilo le khuaruah tuaktan nak a ngeihlo ruangah Judah cu ṭhenkhat a hrutmi minung sinak in a hnawng kha hrihrolh in a nunnak kha a rak donghter. Pathian i mit zoh nak thawngin cinkennak ahun ngeihṭhan caah St.Peter cu Bupi dohnak lungtum ah a rak cang i khamhnak veel laksawng kha a rak ṭawh khawh.
Atlangkomh in kan chim ahcun, mikip cu Jesuh thisen thawngin Satan khuachia kutchugn a kan cawk ṭhan i, khamhnak veel laksawng kan hmuh. Aa khat lomi kokek nih a pek mi sining phunphun he kan nung cio nain, Pathian pekmi aa khatmi khamhnak veel laksawng kha kan nunnak ah cohlam buin Pathian dinnak, bia kha ka ṭang chungpom in Bawipa sinah ruahchan buin kan um ding asi. “Khrih Jesuh cu nan Bawipa ah nan i lak cang caah, a mah he i pehtlai in nung u” (Kolose 2:6) Hi vawlei ah kan um i kan nun cu Khrih thawngin khamhnak ceel laksawng kha co awk caah asi. “Kan Bawipa Jesuh Khrih thawngin khamhnak hmuh awk ah a kan thim” (1The 5:9). Bishop Fulton Shin nh a rak chim mi cu “Satan can pssess only willing victims” satan i sasi nak in mah pumpak kha a duhmi hna lawnglawng nih Satan a ngeih. Aakhat lomi nunnak hamat a niam asang phunphun le hmeksak tukforhnak karlakah Satan sal sinak ah mah pum kha i pek loin Bawipa Jesuh nih a thim i a khamh mi Pathian fanu/pa sinak in mah pumpak kha ralring tuaktan hnuah Pathian veel thawngin zungzal khuallam kha kan kawl awk asi. “Khuachia hlennak kha nan doh nakhnga Pathian nih an pek mi hna ralthawm vialte kha i hruk u” (Ef 6:11). Bawipa Jesuh nih a kan lak piak i a rak kan pek mi, aa khat mi nunnak hna le Bawipa Jesuh Khrih kha lungpeem buin a zungzal Vancung ah khualtlawnnak cu Khrihfa nun kha asi ko. “Atu caan i kan inmi temh innak hi cu hmailei i kan sin i phuan a si te lai mi sunparnak kha cu tahchunh awk tlak ah ka rel lo,” (Rom 8:18). Cu asi caah sifah temhnak kha laksawng sinakin kan cohlan ding bak asi. “Ka veel hi na caah a za ko” (2Kor 12:9) tiah fiang cikcek in a fianter bantukin aa khat lo thlaidannak karlak ah Pathian pekmi aa khat mi, a za ceomi veel he Bawipa Jesuh Pathian kha benhchih buin kan nunnak kha nunṭhangin kan um hna lai.