Pope Leo XIV cu 2026 kum chungah US a tlawng lai lo tiah Vatican nih a chim
Pope cu April thla ah Africa ah a kal lai i tukum dih lei ah Peru a tlawng lai; cun Spain ah khuasik caan a din lai tiah ruah a si.
Pope Leo XIV cu 2026 kum chungah US lei a kal lai lo, tiah Holy See Press Office director, Matteo Bruni nih Zarhpi ni ah a chim. Cu hlaan ah cun a chuahkehnak US ram ah lamkaltu khualtlawnnak a tuah men lai timi ruahdamh thawngpang a rak leng ngai ngai.
American Catholic cheukhat nih Pope pa i U.S. lei tuukhaal khualtlawnnak cu July 4, 2026 ah ram zalonnak kum 250 tlinnak puai hlan ah a kal lai tiin ruahchannak an rak ngei.
Cu lio caan te ah cun, hmun dangdang zongah Pope khualtlawnnak ding hna zong langhternak a hung um. Africa ram chung Khrihfabu hruaitu-nawlngeitu hna nih Leo cu an ram zeimawzat ah a tlawn hna lai tiah an ti. Angola le Equatorial Guinea hna zong va tlawn dingin ram chung nawlngeitu hna nih mipi sin ah theihter nak le tlawnkal dingin bia- fehtermi hmun hna lakah an telh ve. Cun, Cameroon ram zong Pope a khualtlawnnak ah aa tel te men lai tiah mipi nih ruahchannak an ngei ve. Pope khualtlawn lai caan cu Easter hnu ah a si tiin an langhter.
America chaklei um Peru bishop hna nih, Pope pa i, hlaan bishop dirhmun in rian a rak tuannak Peru ram ah a rak tlawng te lai tiah an ti. Kum dih lai, November asiloah December hramthawk ah Peru ram Khrihfabu hruaitu hna nih caan khiah ding in an langhter.
Spain ram va tlawnnak ding zong tu kum khuasik caan ah a si men lai tiah ruah a si. Spain Khrihfabu nawlngeitu hna nih Madrid, Barcelona le Canary tikulh hna a si lai tiah an langhter.
Pope Paul VI October 1965 khualtlawnnak in aa thawk in Pope tampi nih United States cu voi tampi an tlawng bal cang i, cu ah cun United Nations tlawnnak zong aa rak tel.
Mithiang John Paul II cu U.S. ah voi zeimawzat a tlawng bal i a voikhatnak cu October 1979 ah a si. Boston, New York, Philadelphia, Des Moines, Chicago, le Washington timi hna ah aa rak din. Cu lio caan ah President Jimmy Carter he zong an rak i tong. A hnu i a tlawnnak cu 1995 ah United Nations kum 50 tlinnak ah a si i, 1999 kum zongah St louis, Missouri hna ah a donghnak U.S. ram khualtlawnnak a rak ngei.
Pope Benedict XVI zong nih April 2008 kum ah United States a tlawng ve. Cu khualtlawnnak chungah cun President George W. Bush he White House ah 81 kum a tlinnak puai zong an rak tuah. Cun New York a tlawng i , Sept. 11, 2010 ah a cangmi thil ruangah a thimi hna philh lonak caah Ground Zero timi hmun ah thlacamnak caan zong a rak ngei.
A hnu bik United States ram a tlawngmi Pope cu Pope Francis a si i amah cu Sept. 22-27, 2015 tiang a rak tlawng. Cu lio ah, Washington, D.C. ah a kal, cuka ahcun Junípero Serra mithiang a si nak kha vawlei cung kip theih in langh-theihternak a tuah i U.S. Congress ah bia zong a rak chim. Cu hnu ah New York ah a kal than. United Nations General Assembly zongah bia a chi i Philadelphia i a khualtlawnnak a donghter hlanah, khuachung um Independence Hall ah Vawleicung Chungkhar Pumhnak (8) nak kharnak puai ah pumh hruainak a rak tuah.