BIAKAM CHAN AH PATHIAN THLARAU LE BIA
A hramthawk in “caan a tlin hlan” tiang (Gal 4:4) Pa, Bia le Thlarau rianṭuan ṭinak cu a thlithup in a um. Sihmanhsehlaw thil cu a tuah zungzal ko. Pathian Thlarau nih Messiah rat lainak kha a timhtuah piak. A zeihmanh kha tling tein phuan a si rih lo. Sihmanhsehlaw a pahnih in biakamh cia an si. Hngah awk le a langh tikah cohlan awk lawng kha a si. Cu a si caah Bupi nih Biakam Hlun a rel tikah Thiang Thlarau nih Profet hna hmang in Khrih kong chim a kan duhmi kha a kawl. (Cf. 2Cor 3:14, Jn 5:39, 46). “Profet hna” in Bupi nih, Thiang Thlarau nih Cathiang tuahnak ah a thawkhumhmi vialte kha Biakam Hlun he Biakam Thar he a theihthiam dih. Juhdah phungbia ah nawlbia cauk (Hmasabik uk nga) a ra hmasa.
Cun Profet hna le caṭial mi hna (a bik in Salm) kha a si. (Cf. Lk 24:44). Pathian bia le Thaw cu zeizong vialte thawhkehnak khan a um. (Cf. 33:6, 104:30, Gen. 1:2, 2:7), Phungchim 3:20-21, Ezk 37:10). Sermi thil vialte kha uknak thianternak le nunnak peknak cu Thiang Thlarau ta an cannak pakhatte a si. Nunnak cungah ṭhawnnak ngeihnak cu Thlarau cungah a um. Zeicahtiah Pathian a si caah a sermi thil hna kha Fapa thawngin Pa chungah a kilven hna.
“Pathian nih minung kha kut hrimhrim in aser hna. A kut cu Fapa le Thiangthlarau kha a si i a sermi minung cungah amah mui kha a khenh chih. Cuticun hmuhkhawh mi hmanh ah amah mui kha a kenter” (St. Irenaeus). Sualnak le thihnak in minung cu a rak nung nain “Pathian mui, Fapa mui” cu a keng rih. Sihmanhsehlaw “Pathian sunparnak” “Amah he i lawhnak” cu a ngei ti lo. (Rome 3:23). Abraham sin biakamnak nih khamhnak lam kha a hnu i a tlinnak ah mah “mui” cu a rak lak i Pathian he i lawhnak cu a pek ṭhan lai.
Cucu nunnak petu Thlarau peknak kha a rak tuah lai. (Cf. Jn 1:14, Phil 2:7). Minung ruahchannak he aa ral in Pathian nih Abraham sinah zumhnak theitlai le Thiang thlarau ṭhawnnak theitlai ah tefa ngeih awk bia a rak kam. (Gen 18:1-15, Lk 1:26-38, 54-55, Jn 1:12-13, Rom 4:16-21). Abraham hrin chungin miphun vialte cu thluachuah an si lai. Cucu Khrih hrimhrim hi a si. (Gen 12:3, Gal 3:16).
Amah cungah Thiang Thlarau tawihnak in “Vawlei cung khuazakip ah aa thekmi Pathian fale vialte hna kha pakhat ah a pumh hna lai.” (Jn 11:52). Pathian nih a dawtbik a Fapa le a Thiang Thlarau pek tiangin amah lila biakam in aa ṭem. Thiang Thlarau cu kan ro kha kan hmuh hlan tiang aamah khan in a kan pekmi a si. (Eph 1:13-14, Cf. Gen 22:17-19, Lk 1:73, Jn 3:16, Rom 8:32, Gal 3:14).
Hlanlio pupa hna in Moses tiang, Joshua in Profet ngan hna tiang Pathian a phuannak ah mah biakamnak lam kha a ceuh dih. Khrihfa phungbia ah Pathian bia nih mah langhternak ah amah kha a hmuh a theihter hna ti kha a hngalh. Thiang Thlarau minmei nih a phuan zong aa phuang i a thladem zong in a huh. Mah bantuk in Pathian nih ka hngal hna seh tiah a cawnpiaknak cu nawlbia a rak peknak ah khan a lang khun. (Cf. Ex. 19:20, Dt 1-11, 29-30). Pathian nih nawlb kha Khrih lei ah mi hruaitu le cawnpiaktu ah a kan pek. (Gal 3:24) Sihmanhsehlaw nawlbia cu, “Pathian he i lawhnak” a ngei ti lomi minung kha kho lo i sualnak kong hngalhnak lawng a ṭhan ter. (Cf. Rom 3:20). Thiang Thlarau duhnak tu kha a alh ter. Salm hla chung tahnak nih hi kong kha tehte a khan.