December 31 – Christmas Ni 7nak
John 1:1-18
Bia
Nihin cu hi calendar kumhlun a donghnak ni a si i tuzaan cu mi tampi nih kumthar cu lunglawm tein kan don lai. Cozah nih tuah lo dingin ralrinnak a kan pek ko nain kan tuah peng rih ko zongah meitil puah cu kan ngaih ko lai. Cheukhat nih an chimning ahcun, thlarau ṭhalo, a ṭhalomi thil hna le a si kho lomi vanṭhatnak hmuh khawhnak ding caah hi vawlei phunglam hna ah hin kan i tel lai.
Meithal puah lengah, mi pakhat nih a chimmi cu, hi ni ahhin mi cheukhat nih cun market in a pummi thingthei an cawk, zeicahtiah an chimmi cu, ‘tlinnak le rumnak a chuahpi lai’ an ti. Zanlei sang hlan ah, nulepa nih an fale kha an inn thlalang le innka kha kau tein on dingin le seh vialte le motor thlalang le mawtaw hmanh kha seh on dih dingin an ti hna, cucaah kum khat chung an ṭha zungzal lai. Hi bantuk phunglam hna nih hin caanchung puai sining kha a fehter chin. Zeitluk in dah kan Khrihfabu nih tuah dingin a kan auh. Khrihfabu nih Naute Jesuh, Bia, Nunnak le Ceunak kha zoh in kan i lawmhnak le kan ruahchannak, kan ngaihchiatnak le kan retheihnak hna kha Amah sinah pekchanh dingin a kan sawm.
Nihin thawngṭha ah, Mithiang Johan nih Jesuh cu Greek mi hna sinah a pek i kannih zong kha pakhatnak ah, Jesuh cu Bia a si tiah a kan theihter. Mithiang Johan nih hitin a ti: “A hramthawk tein Bia cu a um cang i Bia cu Pathian he an um i Bia cu Pathian a si”. Jesuh cu vawlei ta a silo nain sernak le caan hlan hmanh in zungzal in Pathian he a um ti kha a langhter. Amah cu Pathian a si zungzal. Cheukhat nih Pathian cu a fakmi, lehrulhnak a tuahmi tiah kan ruah i Jesuh cu Pathian thinhunnak kha dawtnak ah thlen awk le kan cungah a lungput thlen awkah a ra. Zeicatiah Biakam Hlun nih a thin a hungmi le a hrawk khomi Pathian kha a kan hmuhsak tawn caah a si. Sihmanhsehlaw, aa thlengmi cu Pathian a si lo. Pathian kan hngalhnak nih aa thlengmi a si. Pathian sining cu tlawmpal lawng kan hngalh khawh i kan theih khawh. Jesuh a rat hnu lawngah Pathian cu zeibantuk dah a si zungzal ti kha tlamtling tein le fiang tein kan hmuh.
Pahnihnak ah, Jesuh cu Nunnak a si. Nunnak pek awkah nunnak in vawlei ah a ra. Amah nih a lakmi nunnak cu a niam. Hi nunnak hi a niamtuk caah tuukhal le mifim tlawmte dah ti lo incun Pathian vawlei ah a rat ti kha ahohmanh nih an hngal lo. Asinain Pathian nih lam dang in a tuah lai maw? Ngakchia sifak bantukin vawlei ah luh nakcun a ṭhawngmi ningzahnak ding caah lam dang aa thim hnga maw? Cuticun Khrih nih sualnak sal sinakin luatter awkah kan minung sinak kha a lak.
Pathumnak ah, Jesuh cu Ceunak a si. Christmas cu ceunak caan a si. Khrih cu aho kan sinak a langhtertu le kan kawhnak a lianngannak a langhtertu ceunak a si. Vancung kan kai khawhnak hnga minung ah a cang, asinain mi tampi nih mah kha kan philh i amah mi hna nih an cohlang lo. Sihmanhsehlaw amah a cohlangmi hna cu Pathian fa sinak ṭhawnnak a pek hna (v. 13). Nikhatkhat ah amah bantuk kan si khawhnak hnga kanmah lakah pakhat ah aa cang. “Pathian Fapa cu minung ah a cang, cucaah kannih zong Pathian kan si ve” (St Athanasius, De Incarnatione, 54, 3). “Pathian Fapa ngeihchunte nih a Pathian sinak ah aa telmi siter a kan duh caah, minung a ser tikah minung kha pathian ah a ser khawhnak hnga kan sining kha a lak” (St Thomas Aquinas, Opusculum 57, 1-4).
Dawtmi ulenau hna, cucaah tuzaan phangphang meiṭil puahnak nih Ceunak taktak, Jesuh Khrih kha khuh hlah seh. Pathian Pennak leiah kan nunnak le kan lam a ceutertu le a tleutertu a si caah a si. Civil kum thar hramthawknak cu bia lawngin a tangmi biakhiahnak tuahnak ah tlawmter hlah seh, asinain Bia, Nunnak le Ceunak Jesuh theihhngalhnak sihram seh. Mithiang Johan bantukin kannih zong nifatin tein “A ngaingai ti ahcun, a tlinnak thawngin kan dihlak in velngeihnak kha kan hmuh…” tiah kan chim khawhnak hnga nifatin kan don hna lai.