Democratic Republic of Congo ah a cangmi buainak ngol dingin Pope Leo nih forhfialnak a tuah
Zarhpi ni i Angelus thlacamnak ah, Democratic Republic of Congo ah a chuakmi buainak le i dohnak donghter awk le kaphnih lei biaruahnak in daihnak serṭhan awk ah Pope Leo nih nawlnak a tuah. Cun, December 13, Zarhte ni ah Spain le France ram hna ah tuah mi Mithiang sinak dotkhatnak (biatification) kong zong hngalhter ṭhannak a tuah.
Democratic Republic of Congo nichuahlei ah a chuak ṭhanmi kahdohnak kongah a lungre a theihnak kong Pope nih a chim. Mithiang Peter Biakinnpi tual ah Zarhpi ni Angelus thlacamnak a donghnak ah bia a chim lio ah, Pope nih mipi he an i naihniamnak a langhter i buainak le kahdohnak ah aa telmi hna nih “raltuknak vialte ngol awk daihnak ser awk ah biaruahnak le i ceimainak lam kawl dingin” a forhfialnak a tuah.
Congo nichuahlei Uvira ah minung 400 leng thahnawnnak a chuak i minung 200,000 hrawng ralzaam dirhmun le umnak ngeilo dirhmun ah a chuahtertu tukdohnak a chuak ṭhan. Naite ah United State i tawlrelnak thawng in remdaihnak hnatlaknak an tuah hnu ah, Rwanda mipi nih thazaangpek le ṭanpi ruangah M23 phu kut ah an khuapi a tlak hnu ni tlawmpal ah hi thil a cangmi asi.
Mithiang sinak dotkhatnak(Thluachuakmi) pek tharmi martyr hna
Spain le France ah tuahmi Mithiang sinak dot pek asi mi pahnih hna kong zong a chim chih. Spain ram Jaén khua in, Fr.Emanuele Izquierdo le a hawi le sawmnga le pariat, Fr.Antonio Montañés Chiquero le a hawile sawmruk le pali hna cu thluachuakmi sinak (Mithiang sinak dotkhatnak) pek an si. 1936-38 tiang biaknak caah hremnak an ton lio ah zumhnak huatnak in an dihlak in an thah hna ning kha a hun hngalh ṭhan.
Fr. Raymond Cayré, Gérard-Martin Cendrier of the Order of Friars Minor, seminarian Roger Vallé, layman Jean Mestre, le a hawi minung sawmli le paruk hna cu December 13 ah Paris khualipi (France ram) ah Pope Leo nih (thluachuakmi sinak / mithiang sinak dotkhatnaknak) a pek hna. Anmah hna cu Nazi (Hitler) chan lio 1944-45 ah an zumhnak ruang ah huatnak le thahnak a rak tuarmi hna hna an si. Hi martyrs hna caah Bawipa thangṭhatnak pek dingin a sawm hna, “Thawngṭha bia a chimtu ralṭha, an miphun he naihniam tein an um caah le Bupi cungah zumhawktlak tein an um caah hremnak le thahnak a tongmi hna an si tiah Pope nih a ti.”