21 November
Thawngṭha: Luke 19:45-48
Biakinn Thianhnak
Bits & Pieces (May 27, 1993, Page 1) nih thinhunnak kong he pehtlaiin hitin a chim: “A hmaanmi a ruang, a hmaanmi minung cungah, a hmaanmi lam in, a hmaanmi caan le a hmaanmi caanchung thinhunnak a ngeimi cu thangṭhatnak nganpi a phu” a ti.
Mithiang Matthai Thawngṭha (11:29) ah Jesuh cu “a nemmi le aa toidormi lungthin a ngeimi” tiah a ti. Cupinah, Jesuh kong fianternak tampi kan ngei i Amah cu: Dawtnak, A Nungmi Changreu, Nunnak, Sibawi Lianngan, Biaceihtu Dinfel, Lungvar Mansung, Liannganmi Lawmhnak Thawngṭha, Saya Ṭha, Dinhnak Petu, aa hngatchan lomi le a dangdang hna an si. Asinain nihin thawngṭha caang ah, Amah kong kan chimmi hna hi ahmaan lo ngai a loh. Zeicah tiah Jesuh nih a nemmi a si lo ti a langhter caah a si. Achel ah Bawipa cu thinhunnak bantuk a fekmi lungthin zong a tong i fiang tein a langhter. Hihi khuaruahhar ngai a si, zeicahtiah a tam deuh cu thinhunnak kha sualnak he kan pehtlaih ter. Thinhun cu sual a si bantuk a si. Asinain thinhunnak cu sual a si lo. Pathian pekmi duhnak a si i tinhmi phunphun caah timhmi a si: mah le mah i vennak, midang kilvennak, a derthawmmi kilvennak, dinnak rianṭuannak le a dangdang hna. Sualnak a chuahter khomi cu ahleivuan in asiloah aa tlak lomi thinhunnak langhternak kha a si, (365 Days with the Lord 2007 chungin ruahnak cheuhnak cheukhat).
Zeinihdah Jesuh cu a thin a hunter? Biakinn cu thlacamnak inn ah hman loin Tlangbawi Upa hna nih chawlehnak caah an hman caah a thin a hung. Hi tlaihhremnak nih a lung a fahter. Khrihfabu cu chawdawr bantukin ser a si ahcun, mipi nih thlacamnak hmun ṭha le chunglei cinkennak le thlacamnak boruak an sungh ti kha kan hngalh. Caan tam deuh ahcun, thla kan cam lioah ngakchia bantukin mi pakhatkhat nih Biakinn chungah a tlik lengmang tikah kan lung a buai. Mah cu kanmah ṭhatnak asiloah midang ṭhatnak he aa ralchanhmi a si timi sullam in Jesuh lung a fahtermi a si.
Voikhat cu ka hawikom dawtmi pakhat i ṭhitumnak puai ka tuah. Puai tuah hlan deuh teah aa pummi hna an tamtuk caah, an sinah zaangfahnak tein an cell phone kha phih dingin le puai a sunglawi ning hngalh khawhnak ding caah dai tein (silent mode) chiah dingin thawng ka thanh hna. Nupi ṭhitnak puai kan tuah lioah, nuva hna pawng ah cell phone pakhat, volume level 4 a si lai tiah ka ruah, cu a awthang ngaiin a awn. Cun ka khuaruah a har, zeicahtiah cu puai ah abiapi bikmi pa a simi mopa i a cell phone kha a rak si zir.
Tlangbawi pakhat nih a phungchimnak ah, nihin i thawngṭha ah kan Bawipa nih a chim duhmi thawngpang chuahpi khawhnak lam pakhat a si kho men tiah a ti. A “inn cu thlacamnak inn a si lai” i cu bantuk cun upat le hman zungzal a si lai i zeidang zeihmanh a si lai lo a ti. Pumhnak tuah lioah cell phone hman le call cu zumtu hna caah upat lonak le lungretheihnak hmelchunhnak nganbik pakhat ah a cang kho men.
Asinain a poi deuhmi cu tipil kan in hnuah Biakinn kan kal ti lo hi biakinn buarnak a si. Kannih kha khoika hmanh ah ton kan si ti lai lo. Reader’s Digest (July, 1994 p. 64) ah chuahmi parish tlangbawi pathum tuanbia bantuk tein, nikhat cu coffee din dingin an i pum i an biakinn vialte ah palak nih a tlunh hna ti an hmuh. “Ka thin a hung tuk,” tiah pakhat nih a chim, “meithal ka lak i ka kah hna, inncung celling cu a kua dih, asinain palak pawl cu zeihmanh a khenh hna lo.” “A nung in tlaih ka rak i zuam i rap ka chiah,” tiah a pahnihnak nih a ti. “Cun ka thlah hlanah meng 50 ah ka ṭhawl hna, asinain biakinn ah an ka tuk ṭhan.” “Buainak zeihmanh ka ngei ti lo,” tiah a pathumnak nih a ti. “Zeidah na tuah?” tiah midang nih khuaruahhar in an hal. “Tipil ka pek hna i ka fehter sawhsawh hna,” tiah a leh hna. “Cu hnu cun ka hmu ti hna lo” a ti.
Dawtmi ulenau hna, kannih cu hi tipil pekmi le fehtermi palak hna bantuk kan si.