Pope nih Israel le Hamas cu kahdohnak le buainak ngol dingin a nawl hna
Pope Leo XIV nih Israel le Hamas cu “ṭihnak, rawhralnak le thihnak tampi a chuahtertu buainak” hi ngol dingin nawlnak a tuah hna. Tlaihmi vialte luatnak pek ding, zungzal kahdaihnak tuah ding, mi bawmhnak him tein luh khawhnak ding le mi bawmhnak upadi tling tein upat ding in nawlnak ka tuah,” tiah pope nih zarh fatin a tuah tawnmi mipi he tonnak (27-8-2025) a donghnak ni ah a chim. “Leo nih “mipi kilvennak rian le mibu hremnak, thleidannak um loin thazaang hmannak le milu hna hmun dang ah ṭhialnak khamnak” kha tling tein zulh dingin a auh hna tiah Israel mi pakhat (min langhterlomi) nih a chim.
Pope nih cun August 26 ah Jerusalem i Latin patriarch Cardinal Pierbattista Pizzaballa le Jerusalem i Greek Orthodox patriarch Theophilos III nih an chimmi bia kha a cohlan tiah a ti,” hi thahnawnnak a karhmi hi donghter ding, ral hi donghter ding le mipi caah ṭhatnak a chuahpimi kha biapi ah chiah ding” tiah a ti. Gaza khuapi ah ralzam hna dornak parish a ngeimi patriarch pahnih hna nih, “Israel cozah nih ‘hell kutka aa on lai’ tiah thawng a thanhmi cu ngaihchiatawk” asi tiah an ti. Israel nih Gaza khuapi ah a ummi misawhsawh hna, Greek Orthodox compound St. Porphyrius le Catholic Holy Family compound ah a ummi minung hna cu Gaza thlanglei ah ṭhial hna seh ti a duh hna tiah local media nih a langhter.
Asinain “innpi kulhnak vampang chung ah dornak a kawlmi hna lakah, a luan ciami thla hna harnak ruangah a derthawmmi le rawl ei awk a chambau mi tampi an um,” tiah an langhter. “Gaza khuapi chuahtak in thlanglei ah zam i timh cu thih dantatnak bantuk asi an ti. Hi ruang ah hin, tlangbawi le siangbawi nu pawl nih um peng ding le innleng ah a um dingmi vialte zohkhenh peng ding in biakhiahnak an tuah. “Lungthin thlennak le daihnak caah thla an cam i, biaknak lei hruatu hna nih, “(Palestinian) ramri le mipi nunnak ah rawhralnak a za tawk a um cang. Mipi hna kha thongtla le mifir bantukin thil sining ṭihnung ah chiah cu a hmaanmi a si lo. Atu cu kapkip in caan saupi a ingtuarmi chungkhar hna damnak caan a si cang,” tiah an ti. Pope Leo nih aa pummi hna cu “Mary, daihnak siangpahrangnu, hnemhnak le ruahchannak hrampi,” nih “mi vialte nih an dawt tukmi ram ah remdaihnak le daihnak hmuh khawhnak ding caah” a nawl lai tiah a hal hna.
News sources: National Catholic Reporter