Lungpuam Ruamkainak Kha Hnon i Tuahkel Tuah A Herhnak

Minung timi cu chuahkehnak kokek ningtein bia kherhlai a duh cio mi an si. Sihmanhsehlaw Pathian ṭihzahnak a um lo ahcun theih hngalh fimthiamnak hna cu zei san dah a tlaih kun lai? Ahmaan ning in cun a dikmi mah ṭhathnemnak kha zeirel lo hnonmi , van arfi hna kha hmuhchih in a dothlat mi thiamsang minthangmi nak in Pathian rian a ṭuanmi sifak khuatefa cu a ṭha a thiang deuh. Mah konglam a hmaan ningin a hmu a theithiam mi cu amah pum kha a huat. Mi dang thangṭhatnak zong a duh lo. Vawleicung ah thiam tlak, hngalh tlakmi vialte kha a theih hngalh dih ko nain dawtnak a karhter khawhlo ahcun kha mifim thiam cu Pathian mithmai ah zei santlaihnak dah a hmuh khawh lai? A ruang cu Pathian cu kan nih kan tuahsernak cung lawng zoh in bia a kan ceih. Aristotle i metaphysics, ICor 13:2

Lungrang tukin theihduh thiam duhnak kha ngol. Zeicahtiah mah lung rannak cu vaivuanhnak, zumhnak pialnak hna a si ter. Ca lei a thiammi hna tucu fimthiammi hna tiah min langh an duh. Thiamsang tiah kawhnak hna zongah an i nuam i an lung di a riam ṭheo. Ṭhatnak (amiak) tlawlmte lawng a pemi, siloah santlai bak lomi fimthiamnak hna cu tampi an um ve. Luatnak hmuhnak kha a bawmchanmi kongkau hna kha zei rello i a dang kongkau ah a zuangzam mi hna cu a fim mi sinak a tlawmmi an si. Biatampi chimnak in nihchuak capo lungtlinnak a um lo. Ṭhatein ziakel tuah lengmangnak lawng nih thinlung a dai. Thinlung thiangte ngeihnak sual tuah lonak cu Pathian hmai ah luh ngamnak lungthin a pek. Zuam chinchin i a thianghlim mi ziaza huham kha na ruahkhun ahcun, fimnak a dot sang deuh in na thiam na hngalh cangka in nangmah cu a hmaannak kha thleidan biachah khawh ding a let tamdeuh in a har te lai. Cu a si caah nangmah cu ṭhatein thiamnak pakhat asiloah fimnak dot pakhatah tlam a tling cang tiah i ruah hlah. Cuti na thiamnak ruangah pei khua ruat in na ṭih na thin phan ding a si cu.

Nangmah cu ṭuan awk rian tampi kha ka hngalh ka theih tiah ruahnak na ngeih si ahcun na hngalh theih rih lomi ṭuan awk rian hna tampi in a um rih tiah ruat. Ruamkai hlah, ka hngalh ka theih rih lo mi tampi a um timi lawng lawng kha a hlei in i ralring. Vawleicung ah hin nangmah naki fimthiamnak a tlinh a sang deuh i upadi kha ṭhatein a thei a thiam deuhmi tampi an um ko nain nangmah cu zeicah nangmah nangmah thangṭhat na duh kun? Nangmah cu na caah a ṭhahnem dingmi fimnak hmuh na duh ahcun fiang setsai lomi nih theih lo mi nunnak siseh, nangmah kha man ngei lo (santlai lo) tiah mi tampi nih zohchuknak kha siseh, na duh na tlaih chan ding a si.

Nangmah pumpak kha a hmaan ningtein naa hmuh lai i zohchuk sualphawt khawhnak cu a thiang upat tlak a si i ṭhathenmnak tampi a chuahter mi cawnnak a si. Mah le mah a sangah i chiah lo in midang lawng kha zungzal in an ṭha tiah siseh, hmai hngalpi awk a si tiah siseh, thin lungput ngeih cu a hleice mi fimnak a si i huham tlingmi sinak kha an hmuh. Mi pakhat cu fiangtein palhnak kha siseh, a rit a nganmi sualnak a tuahmi kha na hmuh caah siseh, keimah cu a mah nak in ka ṭha deuh rih tiah i ruat hlah. Zeicahtiah nangmah cu zeitik caan tiang dah sualnak tuah loin ka hmunh khawh lai timi kha na hngalh lo caah a si. Minung cu  ningkel loin a um thiam mi lawngte kan si. Nangmah le nangmah tu cu midang nak in a hlei in tlamtling lo mi ka si titu in nan cinken hrimhrim awk a si.