6 December – Saturday

Audio 👇🎧👇

Matt 9:35-10:1, 6-8

Pahleihnih cu thlah an si

Dawtmi hawile hna, Pathian nih nifatin kan hmuhmi thluachuahnak le velngeihnak vialte kha a kan pek ahcun zeitin? Tahchunhnak ah, chun ah kan i nuamhnak ni, ruah, ti, rawl, kan nunnak, rili le kan thawchuahmi thli tibantuk. Hi thil hi a si taktak ko ahcun, Forbes Magazine hnatlakpinak tel loin nihin vawlei cungah Pathian hi mirumbik a si ko lai ti ka zumh. Asinain hi Pathian hi vawlei hramthok in kan hngalhmi Pathian phun a si lo. Hihi Jesuh nih a kan chimhmi le kanmah he pehtlaih a duhmi Pathian phun a si lo. Asinain kan hngalhmi Pathian cu dawtnak a ngeimi le a siangmi a si. Mah thilri le tangka vialte kha amah nih a herh lo. Zeihmanh um loin a kan ser caah a si.

Nihin thawngṭha ah Jesuh nih hi bantuk cawnpiak a duhmi lawng hi a si: “Nannih cu man pek hau loin nan hmuh cang, man pek hau loin nan pek hna lai,” (Matt 10:8). Jesuh nih hi cawnpiaknak hi a nunpi, zeicahtiah Amah hrimhrim nih mizaw a damter hna; mitcaw kha a hmuhter hna, khuachia kha a dawi hna, rawl a ṭammi kha a bia le thilri rawl in a cawm hna; mithi kha a nunter ṭhan hna; thinghmui zawtnak a ngeimi hna kha a thianh hna i a dangdang le a phunphun kha zeihmanh phaisa le sibawi man hal loin a thianh hna.

Pathian i a sining taktak cu pek hi a si. Pathian cu Petu a si. Amah cu Petu a si caah, sernak, tlanhnak le thianternak tibantuk atu kan ngeihmi vialte kha kan hmuh cang. Sihmanhsehlaw Amah sinin hi vialte kan hmuhnak ah, pekchanhnak timi Pathian ruahnak chung zongah luh ve dingin auh kan si. Sualnak timi cu hmuh le pek lo dah ti lo cu zeidang a si lo. Sualnak le misual cu “a hmumi” an si. A hmutu le a petu cu cawh khawh a si lo. Pathian cu kan chungah a um i kannih cu Pathian chungah kan um khawhnak hnga petu si hna usih. “Nannih cu man pek hau loin nan hmuh cang, man pek hau loin nan pek hna lai.”

Phundang in chim ahcun, Jesuh nih a zultu hna kha a thawkmi rian kha pehzulh dingin a fial hna tiah mi pakhat nih a chim bantukin, cucu, Pennak kong Pathian bia chim ding le a dermi le hremnak a tongmi hna sinah a damnak ṭhawnnak chuahpi ding kha a si. Jesuh sinin an hmuhmi cu hlawh ruahchannak um loin midang sinah an pek hna awk a si. An duhnak hmasabik cu Pathian a si i thilri chawva hmuhnak a silo ti kha an lungput in an langhter awk a si. Jesuh bia cu nihin ah abiapi ve, vancung Pennak cu a nai cang. Vanram cu kan caw kho lo;  sihmanhsehlaw Jesuh dawtnak le velngeihnak a hngalmi hna nih cun an thinlung ah vanram an ngei cang. Zumhnak le nawlngaihnak he a cohlangmi hna sinah Bawipa nih a Pennak asiloah vancung uknak cu a tlunter. Bawipa cu a sunparnak he a ra kir tikah zungzal dinnak le daihnak a pennak kha tling tein a ser ṭhan lai.

A donghnak ah Catholic Khrihfabu Catechism nih a kan cawnpiakmi cu: “Khrih zultu nih zumhnak kha a kilven i a nun lawng si loin a phuan, zumhnak he tehte a khan i a karhter awk a si” (CCC no. 1816). Zumhnak cu Pathian nih man loin a kan pekmi laksawng a si i, i hrawm ding le karhter dingin timhmi a si. Thlarau tampi nih an kawl nain Khrih an hmu rih lo. Zeiruang ah? Zumhnak nunning hmuh an herh caah a si. Zumhnak a nungmi tehte si awkah kawh kan si.

Dawtmi hawile hna, Pathian pennak cu a tlingmi in a rat lai kha ralring tein kan hngak maw?