5 September 2025
Audio ngaih dingah 👇🎧👇
Bible: Kolose 1:15-20; Luke 5:33-39
St. Mother Thresa of Calcutta (memorial)
Rawl ulh kong biahalnak
Dawtmi ulenau hna, Zeidah a ra hmasabik, rawl ulh maw rawldangh? Jesuh cu monu i tlangval tiah an auh lengmang i Tipil petu Mithiang Johan nih amah le amah kha mopa i hawikom tiah aa ti (John 3:22-30). Nihin thawngṭha chung i Phungbia cawnpiaktu le Farasi pawl nih Jesuh kha zeicahdah Jesuh zultu hna nih Judah mibu dang hna bantukin rawl an ulh lo timi biahalnak sawhsawh an tuah. Cun rawl ulh cu thlacamnak le zaangfahnak he aa pehtlaimi a biapi bikmi biaknak rian pathum lakah pakhat a si an ti. Jesuh nih a zultu hna nih zeiruang ahdah rawl an ulh lo timi fianternak sawhsawhte a chim ve. Vawleicung a rianṭuannak kha nupi ṭhitnak puai he a tahchunh caah a si. Cun a zultu hna kha nupi ṭhitnak puai tuahtu hna he a tahchunh hna. Nupi ṭhitnak puai ah rawl ulh cu, hruaitu upa hna le an chungkhar hna caah ningzahnak nganpi a si. Rawl ulh caan le rawl ei caan a um. Jesuh he zultu bantukin kal cu Jesuh he pehtlaihnak lawmhnak thar hmuh a si. Asinain zultu hna nih harnak le thianhnak vailam an put a hau caan a phan te lai. Toidornak le rawl ulhnak le sualnak ruangah ngaihchiatnak he Bawipa cu an kawl lai.
Jesuh nih amah le amah cu mopa tiah aa ti i a umnak cu lawmhnak le rawl ulh lonak caah a za tawk a si. Amah cu kan sinah a um caah rawl kan ei i cu hnuah Amah cu kan sinah a um lo tikah rawl kan ulh. Cucaah Bawipa nih rawl ei u law rawl ulh uh a kan ti.
Bishop Soc Villegas nih a cauk (Love Like Jesus-Jesuh bantukin Dawt) ah, hi biahalnak hi a tuah, ‘Bawipa cu zeitik ahdah rawl ei ding a si ti kan hngalh khawhnak hnga zeitindah kan sinah a rat? Amah caah cun, P pathum a si i a ruahnak cheukhat ka lak ṭhan.
Pakhatnak ah, Thla kan cam tikah Bawipa cu kan sinah a ra. Thlacamnak (Prayer) paoh cu kan lungthin chungah a ummi dawtnak a ngeimi Pathian he puai tonnak a si awk a si. Thla kan cam tikah Bawipa kan sinah a ra i thla kan cam tikah kan lawmh a hau.
Pahnihnak ah, Bawipa cu (Pepple) Minung hmangin kan sinah a ra. Nikhat chungah zeitik caan paoh ah kan hmuhmi minung paohpaoh cu Pathian nih, vawlei cungah a lung a dong lo ti langhternak a si. Kanmah pumpak hmanh thlalang kan i zoh tikah, thlalang chung i kan hmuhmi muisam hi Pathian nih kan cungah a kan pek rih lomi hmelchunhnak tinak a si. Na pawng i a ṭhumi muisam cu Pathian muisam in sermi a si. Ka zum ko, nangmah lengah cu pa cu a mui a dawhlo zongah Pathian muisam a si i kan lawmh awk a si.
Pathumnak ah Bawipa cu (the Poor) Sifakmi chungah kan sinah a ra. Sifakmi kan hmuh tik paoh ah kan i lawmh a hau kan ṭhabik in kan chuah a hau, zeicahtiah a sunglawi bikmi khual, VIP cu kan sinah a um. Ngaihchia ngai a simi cu, sifakmi hna he umṭi asiloah anmah he rawl ei asiloah zanriah eiṭi tikah kan tangka hmanmi kha kan tlawmter. Sardine (ngakuang), voksa le bean (bete) lawng kan cawk piak hna, facang kilo cheu kan pek hna, ti chungah orange rawl rong kan thuh hna. Laksawng cawk khawhnak a ngeimi kan hawile he kan tuah tawnmi bantukin Laksawng ṭha kan pe hna lo. Sifakmi kan ton tikah Pathian kan tonmi a si ti hngalhthiam awkah ralṭha tein kan um ahcun, lawmhnak he puai tuah awk a si lo maw.
Jesuh cu zuamcawhnak a rak si i a si peng ko lai. Kan Thlacamnak ah, Mipi le Sifak hna sinah Jesuh a rat tikah kanmah le kanmah i tharchuah zungzal ding le lungtho tein um dingin timhcia tein um ko hna u sih. Cun hitin thlacam hna usih: “Bawipa, na dawtnak le biatak hngalhnak ah ka ṭhan khawhnak hnga thlacamnak le rawl ulhnak in nangmah kawl awkah ka bawm ko, cuticun sualnak le duhnak kha ka hlawt khawh lai i ka nunnak kha na duhnak he aa tlakter chinchin lai. Nangmah hngalhnak, dawtnak le na rianṭuannak ah lawmhnak ka hmu zungzal ko seh.” Amen