28 February,2025 Reflection
Thlarau thazaang laknak (Sir 6:5-17, Mk 10:1-12)
Marka 10:1-12 ah Jesuh nih nupi thitnak kong he pehtlai in a thianghlimnak kong a langhter. “Pathian nih a fonhmi hna cu minung nih tthen awk a si lo,” (9) tiah a ti hna. Sihmanhsehlaw, Pathian hmai le mipi (bupi) hmai ah biakamnak an hrawk, ‘nu le pa sualnak tuah’ ruangah ngaihthiam khawh lo tiang a si mi kong he pehtlai in a chim chap mi cu “A nupi kha a ma i nu dang a tthimi cu a nupi cungin nu dang duh sualnak a tua a si; cu bantuk tthiamtthiam in a va kha a kirtak i midang a vami cu va cungin pa aa duh a si ve” (11,12) tiah a ti hna. Cu bantuk sualnak ti lo ah cun nu le tthen cu Jesuh nih nu le va tthen lo dingin a kham. Nu le va cu Pathian pek mi thluachuah fa le a ngei dingmi, Pathian thil sernak program ah aa tel mi an si caah lungthin khat tein um zungzal ding kha Jesuh nih a kan duh piak mi cu a si. An i tthitumhnak kha thih tiang thianghlim tein kil ven ding rian zong a ngei mi an si.
Atang i Facebook link ah zohkhawh asi
Jesuh nih sernak tuanbia kha a chim ṭhan i, a hramthawk tein Pathian nih nupi ṭhitnak cu pa pakhat le nu pakhat karlak lang ah siter ding in a timh mi a si caah, “pum khat” ah a cang lai tiah a ti nak zong a si.
Farasi mi hna i ṭhennak kong biahalnak kha Jesuh nih direct in a leh hna tikah a biapi lomi ṭhennak nawl a pemi nawlbia kha “Pathian nih a fonhmi hna cu minung nih tthen awk a si lo” tiin a rawk kho lomi pehtlaihnak sining fianternak in farasi mi hna ruahnak ttha lo kha a doh hna nak zong a si.
Nihin ni caah kan relmi Thawngtthabia nih hin nupi/pasal ngeihnak le i tthennak kong he pehtlai in chanthar mi hna hmuhning hna zong ruah tthan ngai ding in a kan hmuh sak ve. Nuva hna biakamnak kha biapi ngai in chiah ding; cun sifah harsatnak ton caan paoh ah lungthin khat tein tei khawh ding, tthen nak timh hlan ah remdaihnak lam kawl zungzal ding a si.
Minung cu thilri menmen kan si lo caah chanthar mi hna hmuh ning; pakhat le pakhat ttha deuh in kan i theih hmasat khawh nak ding caah tiin tthitumhnak tuah rih lo in um nak timi ruahnak zong hi tha pek lo ding kan si. Pakhat le pakhat kan i upat zungzal ding a si. “Cucaah nannih cu nan dihlak in Khrih pum kha nan si i pumpak cio ah a nge kha nan si” (1 Cor 12:27). Nan pum cu Thiang Thlarau biakinn a si kha nan hngal lo maw? Nannih cu nanmah ta nan si lo, Pathian ta nan si” (1 Cor 6:19-20). Pathian Thlarau biakinn tiah auh mi minung pum kha upat zungzal ding a si. Zeicah tiah cun ‘a man in cawkmi nan si. Cucaah nan pum cu Pathian sunparnak caah hmang u.’