Khrihfa hna cu hliamhma a tuarmi le hnemtu ngeilo lileng thlavai kiangmi hna he khualtlawngṭi hawikom kan si
Tuchan Khrihfa hna cu innka kharkhum in a ummi kan si lo i pakhat le pakhat rualrem naihniam tein le zaangfah zawnruahnak he nun awk kan si tiah Pope nih France a tlawn lio ah mipi sin ah forfialnak le thazaang peknak a ngei tiah Vatican News Editorial nih a chim. Hliamhma a tuarmi hna le nunnak sullam a kawl i a lung a dongmi kha hnemh awk le zohkhenh awk ah a biapitnak kong Pope nih a chim. Notre-Dame biakinn i zanlei thlacam lio ah Pope nih, “ Catholic Bupi cu leng ah a kal zungzal awk asi,” tiah a ti. Cucaah a tu lio ah vawleipi nih a tonmi buainak le harnak vialte kha hnuchit loin mi vialte kha cohlannak, upatnak, thawngṭhabia phuannak hmun asi awk asi tiah a chim. Hi kha zawn ah, Bupi cu vawlei cung buainak le harnak kha hrial in ralhau (ခံတပ်) in aa kulhmi sinak in kham le runven awk asi. A bik in tuchan ah mi cheu khat nih cu bantukin um a duh an um tawn. Chim duhmi cu, Bupi cu vawlei mi he pehtlaihnak ngei lo tein zumhnak fek tein amahte lawng a dang tein a um tik ah a fek, a ṭhawng lai i a nung kho lai ti mi ruahnak a ngei mi an um. Cu nak cun, Catholic Bupi cu, hlanlio zumtu hna le biakinn pi bantuk asi deuh.
Hlan lio Bupi cu mivialte kha lawmhnak he a don hna, upatnak he a chawnhbiak hna, thawngṭha a phuan i mi vialte kha nunnak sullam petu hmun ah a cang. Khrih cu amah he aa hlatmi lungthin innka a kingh cang hna caah santlailo sifak harsa mi kan cohlannak hna thawng in amah kha kan ton a herh tiah a ti. Pope cu tipil ingmi hna le Bupi chungah a lut thar mi hna he biaruahnak an ngeih lio ah a chimmi cu, “ mi cheu nunnak cu buaibainak he a khat i an lam a tluang lo. Cu bantuk minung hna cu nem tein, a caan laak in zohkhenh an herh tiah a chim. Place de la Concorde ah Pope nih a tuahmi Missa raithawinak minung tingriat hrawng an i tel. Cu Missa raithawinak ah Pope nih a phungchimnak ah, “ zumhnak cu lungthin chung lawng ah chiah awk asi lo, kan tonmi minung hna sin ah pek chin awk, thlarau tihal mi hna kha thlarau ti rawl pek ding ah, lung a dongmi hna kha thazaang pek awk ah le thlarau lei ah ramcar nunnak i a ummi hna kha ruahchannak pek ah ṭuanvo kan ngei tiah thazaang a pek hna.