Biatak phuangtu kan si
Nihin Pathian bia (Acts 4:13-2, Mk 16:9-15) in thazang lak ṭi dingah caan a pe kho tu nan dihlak cungah Pathian nih thluachuah in pe ko hna seh. American siangbawi pakhat nih a bishop pa kha hitin a ti: “Bishop, nihin cu President Andrew Jackson aa pum ve lai. Na bia chimmi i ralring law a ṭha lai” tiah a ti. Bishop nih thawngṭha a chimnak ah ‘nihin President na si zongah Pathian hmaiah na sualnak nai ngaihchih lo a si ahcun sual dantatnak na in ko lai’ tiah a ti. Pumh a dih tikah ah President nih Bishop pa cu a kut a tlaih buin a chimmi cu, “Nangmah bantuk hi တပ်ရင်း pakhat ngei ning law cu vawlei ralpi cu ka tei ko lai” tiah a ti. Bawipa ram kauhnak caah biatak phuangtu nang le kei a kan herh timi kha nihin a voikhat nak cathiang chungin kan hmuh khawh mi cu a si. Thawhṭhannak a zummi mi tampi lakah a zum duh lomi Saduce mi hna le tlangbawi u pa pawl hna le biakinn congtu pawl hna nih ‘Jesuh min in cawnpiaknak nan tuah lai lo. Jesuh min zong nan chim lai lo’ an ti hna. Peter le Johan nih “Pathian mithmuh ah nanmah bia ngaih maw a ṭha deuh, Pathian bia ngaih dah a ṭha deuh? Pathian bia ngaih a ṭha deuh ti cu nan mah nih ruat ko u. Zeiti a si hmanh ah kannih cu kanmah hrimhrim nih kan hmuh ko mi le kan theih ko mi cu chim lo in kan um kho lai lo” a ti hna. Nang le kei nih hin tah zeibantuk kong chim lo um khawh loin kan um ve? Mithangchiatnak maw, mi rawinak maw, mi huatnak maw? Pathian fa le hna nih cun a kan dawtu Jesuh Khrih a thihnak a thawhṭhannak kong hi chim loin an um kho lo.
Lk 24:13-35 ah Jerusalem in Emmaus khua lei a tlawngmi hawikom pahnih hna nih an kal pah in bia an i ruah mi cu “kan tlangbawi hna le kan uk tu hna nih cacawn ninga ni ah Jesuh timi kha an thah. Tuzing a tho ṭhan cang timi pakhat le pakhat a thihnak le a thawhṭhannak kong an chim.” Jesuh cu an sin a phan ko nain Jesuh a si kha an hngal kho lo. Jesuh nih nan kal pah in zei kong dah nan chim tiah a ti hna. Tunai te ah Jerusalem khua ah thil a cang mi a thei lo mi cu nangmah lawnglawng hi na si an ti. Zei hen dah tiah a ti hna. Kan tlangbawi hna nih cacawn ninga ni ah an thah, tuzing a tho ṭhan mi Nazareth khua mi Jesuh a kong an ti. An kal nak ding khua pawng cu an phaan deng i Jesuh cu hmai lei a kal rih lai bantuk in aa um ter. Sihmahsehlaw, an tlaih i kan sin tlung ve ko, zaanlei a si cang, a muih zong a mui cang an ti. Jesuh cu an mah sinah a tlung ve. Cabuai ah an ṭhu i changreu kha a lak i thla a cam i changreu cu a cheu i a phawt hna. An mit kha a hung fim i Jesuh a si ti kha an hngalh.
Kan Bawipa Jesuh cu amah a thil le a sa biaknak le Missa raithawinak ah hmuh khawh, tongh khawh a si. Emmaus khua lei a kal mi hawikom pahnih hna nih a dangdang chim ding tampi a um ko lai nain Jesuh a thihnak le a thawhṭhannak kong kha an chim tikah Jesuh an sin a phan.
Nihin nang le kei zong kan chungkhar cio in Jesuh Khrih a thihnak le thawhṭhannak kong hi chungkhar cio in i ruah hna u sih law kan chungkhar cio ah Jesuh a phan ve lai. Emmaus khua lei ah a kal mi hna nih an i buaipi mi cu Jesuh a kong kha a si. A thihnak le a thawhṭhannak kong a si. Cutikah Jesuh an sin a phaan. Nihin nang le kei tah zei kong hna ah hin dah nai buai pi mi a si. I rem lonak maw i huatnak maw? Mi thangchiatnak ah maw mi ruainak ah maw nihin na um ko rih lai?
Peter le Johan, Mary le Mary Madalene hna nih cun ‘kan hmuh ko mi le kan theih ko mi cu chim loin kan um kho lo’ tiah an ti. Biatak phuangtu thawhṭhannak tehte Bawipa nih a herh. Nihin kan nih vialte hna zong Bawipa thihnak le a thawhṭhannak a aupi tu tehte kan si hna. Bawipa ram kauhnak ding caah Bawipa nih biatak phuangtu tehte a herh hna. Kan nih vialte hna zong biatak phuangtu kan si, thawhṭhannak tehte kan si. Nan dihlak cungah Bawipa nih thluachuah in pe ko hna seh. Amen