Jesuh Khrih Lo Cun…

2026 April 10, Thawhṭhan caan chung nihin ni i Bupi rel ding Bible a kan timhpiakmi (Lam. 4:1-12, Ps. 118, Jn. 21:1-14) hna hi an si. Johan thawngṭha a tawinak in kan rel lai, “Cu hnuah Jesuh cu a zultu hna sinah khan Tiberius Rili ah voikhat a lang ṭhan. A langh ning cu hiti hin a si. Simon Peter le faphir timi Thomas le Galelii peng Kanan khuami Nathanael le Jebide fapa hna kha le Jesuh zultu a dang pahnih hna kha hmunkhat ah an um i Peter nih a hawile cu a thawh hna i “kei cu nga tlaih ah ka kal lai a ti hna, annih nih na sinah kan kal ve lai an ti i lawng chungah khan an lut. Sihmanhsehlaw zeihmanh an tlai lo. Jesuh suh nih cun a thawh hna i “tlangval hna zeihmanh nan tlai lo maw?” tiah a ti hna. Annih nih “zeihmanh kan tlai lo” tiah an leh. Annih cu a thawh hna i, “Nan sur kha na lawng orhlei kam ah vun chep ulaw, tlawmpal cu nan tlaih hmanh maw?” tiah a ti. Cun Jesuh nih khan annih cu “Atu i nan tlaihmi nga cu tlawmpal rak pu hna uh” tiah a ti. Simon Peter kha lawng ahcun a va kai i nga nganpipi a khat mi sur cu tikam ah khan a hun hnuh. An dihlak in (153) an si. Cu tluk cun a tam nain sur cu a tlek lo. A zultu ahohmanh nih khan a hodah na si tiah an hal ngam lo. Zeicah tiah Bawipa a si kha an hngalh. Cun Jesuh cu a va kal i changreu kha a lak i annih kha a pek hna, nga zong kha a pek hna. Thihnak thawhter a si hnuah atu hi Jesuh nih a zultu hna sinah a langh a voithumnak a si”

Duhdawtmi nu le pa, u le nau hna nihin i thawngṭha i hrawmṭi dingin tlangtar ka duhmi cu “Jesuh Khrih lo cun” ti a si lai. Kan Bawipa Jesuh Khrih nih zultu pawl a rak auh hna tikah, Peter a rak auh tikah a pawcawmnak rian a simi ngatlaihnak rian a ṭuan lioah “tithuhnak lei deuh ah na sur kha chep law” tiah a ti i Jesuh bia bangin tithuhnak lei ah a sur cu a vun cheh tikah nga tampi an rak tlaih ti kha (Mt. 4:18-19) ah kan rak hmuh khawh. “Ka zul uh, mi tlaitu ah kan cawnpiak hna lai” tiah Jesuh nih a auh hna i Jesuh cu an rak zulh. Jesuh cu kum (3) chung an zulh i thlarau tlaitu dingah Jesuh nih a cawnpiak hna. Nain Bawipa Jesuh Khrih cu tlaih in hrem in vailam cungah thah a si tikah, zultu pawl cu ruahchannak ngei lo bantukin vakvai in an um i nihin kan relmi thawngṭha chungah an rian hlun a simi an sining hlun ah khan kir ṭhan in nga tlaih ah an kal ṭhan. Kan Bawipa Jesuh Khrih cu an tlaih an hrem, vailam cungah thihnak a ing i sihmanhsehlaw Lamkaltu pawl nih an zam taik, an hlawt kan hngal lo ti tiang an ti. Sihmanhsehlaw kan Bawipa Jesuh Khrih thihnak in a thawh ṭhan hnuah lamkaltu hna sinah a langh tikah “zeiruag ahdah nan ka zaam tak” tiah Jesuh Khrih nih mawhnak an chamhbaunak a chim bal lo. A voihnihnak a langhnak ah “nan cungah daihnak um ko seh” tiah a chonhbiak hmasa hna. Nihin kan relmi Bible chung zongah Jesuh Khrih nih “nga nan tlai lo maw? Nan orhlei kam ah khan vun chep tuah u law a tlai hmanh nan tlai hnga maw?” tiah a fial hna tikah sur cu an vun cheh i nga nganpipi tam taktak (153) an tlaih ti kha cathiang chungah kan hmuh khawh. Jeush Khrih nih mawh a phurh hna lo. Kan tlangbawi ngan a simi kan Bawipa Jesuh Khrih i kan chamhbaunak ah kan tlamtlin lonak ah mawh a kan phurhtu Tlangbawi a si lo i zeitik caan hmanh ah a kan daw pengtu a si i vawlei i kan herhmi tirawl zong a kan petawntu a si kha nihin kan relmi cathiang ah fianghlang tein a kan chimh khawh. Kan Bawipa Jesuh Khrih cu Lamkaltu hna nih an rak hlawt nain nihin kan relmi (Lam. 4:1-12) ah mizeng pa Peter le Johan nih an damter ruangah phungbia cawnpiaktu saya hna an buai i thihnak in a tho ṭhan cang Jesuh cu tiah thawngṭha an chimmi vialte thihnak thawhṭhan a zumlomi Sadusi mi hna nih an ing a puang i an hnah a chuak i tlaih an zal. (Lam. 4:7) ah “hi thil nan tuahmi hi zei thawnnak dah nan ngeih, aho min dah nan hman” tiah bia an hal hna. Peter nih aa thawh i, “hi pa dam hirhier tein nan hmai ah a dir khawhnak cu Nazareth khuami Jesuh Khrih nannih nih nan thah i Pathian nih thihnak in a thawhter ṭhan mi amin thawnnak thawngin a si. Amah thawng lawnglawng in khamhnak hi hmuh khawh a si i vawlei cungah a kan khamh khotu ding mindang zeihmanh a um lo” tiah Peter nih Thiang Thlarau in a khah hnuah an cung i Thiang Thlarau cawlcanghnak hnu ahcun nunthap in Jesuh Khrih thihnak in thawhṭhannak cu fak taktak in an phuan. Ngatlaitu dirhmun in mi tlaitu, thlarau tlaitu dirhmun ah Pathian mifa ah mi tampi an canter hna a si. Kanmah kan mit nih a hmuh hrimhrim mi, kan theih hrimhrim mi cu chim loin maw kan um lai. Cucaah cun khamhnak a kan pe khotu cu Nazareth khuahmi Jesuh Khrih thawng lawnglawng in a si. Vawlei cungah amah min ahdah ti lo ahcun a kan khamh khotu mindang a um lo” nunthapnak he ralṭhatnak he Jesuh Khrih thawngṭha cu an phuan.

Duhdawtmi nu le pa, u le nau hna Pa Pathian ṭangka kan phak i zungzal nunnak kan phak khawhnak hnga ding caah thihnak in a tho ṭhanmi Jesuh Khrih lo cun Pa sin phak khawh a si lo ti cu Mithiang Peter nih nihin ah fiang tein a kan chimh. Kan chamhbaunak ah zaangfahnak a ngei pengtu, kan leiah a ṭang pengtu kan caah a thi i a thoṭhan mi kan Bawipa Jesuh Khrih cu bochan in zumhnak he karhlang chin ko hna usih.