Sual ngeihchihnak in sual ngeihthiam si nak

Tuzarh cu thawhṭhannak zarhkhat nak a si bantukin nihin kan relmi Bible thiang (Acts 3:11-26) le (Lk 24:35-48) chungah ‘sual ngaihchihnak kong’ kan hmuh. Acts 3:19-20 chungah “nan sualnak cu an hnawh piak hna nak hnga i ngaichih u law Pathian lei ah khan i mer tuah u. Cun Bawipa nih thlarau thazang thar hmuhnak caan ṭha an pek hna lai i amah nih nan caah a thim cang mi Messiah Jesuh kha nan sinah a run thlah lai” a ti. Luke 24: 47 chungah “Cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai” a ti. Kan Bawipa Jesuh Khrih min in miphun vialte sinah sual ngaihchihnak le sual ngaihthiamnak kong an chim lai nak kong kha kan hmuh khawh mi a si. Cucaah Peter nih aa thawh i biakinn chungah a chimh hna tikah hin ‘nan sualnak cu an hnawh piak hna nak hnga i ngaihchih u law Pathian lei ah khan i mer tuah u’ a ti. 

Sual ngaihchihnak kan ti tikah hin ‘a hmaanmi sual ngaihchihnak le a hmaan lomi sual ngaihchihnak’ tiin a um. Greek holh in ‘matenoia’ tiin an auh. ‘Matenoia’ timi cu sual ngaihchihnak, mer tak, kal tak timi sullam khi a si. 

Nihin ni ah kan Bawipa Jesuh Khrih nih a kan duh piak ningin kan nun lomi kan sual kan palhnak vialte kha mer tak in, kal tak in amah sinah kan kir, kan i mer ṭhan a si ah cun, Peter nih “Thlarau thazang thar hmuhnak kha an pek hna lai” tiah a ti. Amah nih nan caah a thim cang mi Messia Jesuh kha a run thlah lai tiah a ti. Sual ngaihchihnak phun hnih a um kan ti bantukin a hmaan lomi sual ngaihchihnak he pehtlai in Faroh siangpahrang pa kong tawi tein kan zoh lai. 

Faroh siangpahrang pa hi ka sual ko tiah a ti ko nain a thinlung a hak peng. A sualnak kha a thianh duh lo. Thin kha a doh pengmi siangpahrang pakhat a si. Cuve bangin Sual siangpahrang pa zong hi ka sual cang tiah a ti ko nain a nunzia a ṭhinh hlei lo. Pathian chiṭi David cung zongah voi tampi ka palh a ti ko buin thah dingah lam a kawl ṭhiamṭhiam mipa a si ti zong kha kan hmuh khawh mi a si. Cun Jesuh rawitu Judas Iscariot zong kan zoh tikah Pathian Fapa ka zuar cu ka palh tuk tiah phaisa zong a rak khirh ṭhan hna nain ṭhatnak lei panh loin amah le amah a nunnak ai lak zong kha Bible ah kan hmuh khawh mi a si. 

Dawtmi u le nau hna, ka sual ka palh timi khi kan i hmuh khawh ko nain kan i ngaihchihnak kha ṭhatnak lei siloin palhnak lei, mah le mah i thahnak lei, cun kan i ngeihchihnak kha kan tuahser nak in kan langhter lo a si ahcun cu sual ngeihchihnak cu a hmaan lomi a si ti hi kan hmuh khawhmi a si. 

A hmaanmi sual ngeihchihnak kong he pehtlai in ahodah kan zoh lai tiah cun, fapa tlau pa a thinlung vialte a khawih i ka palh ti kha fiang tein aa hngalh caah a pa sinah a rak kir ṭhan i a tlau ti lo. Ka palh tuk tiin a pa sin a rak kir tikah a pa nih lunglawm thanuam tein a rak hmuh i, a rak conglawmh i puai ngan taktak zong a tuah piak ti kha kan hmuh khawh. Luke 18 chung zongah ngunkawi khawl tu pa kong kan hmuh. Ngun khawi khawl tu pa cu Farasi pa he thla an cam ṭi tikah van lei hmaanh zoh ngam loin Pathian sinah lung kekkuai in thla a cam tikah a sual a palhnak vialte aa ngaihchih i Bawipa a auh tikah Bawipa nih a thlacam nak kha a leh i thluachuahnak he inn lei ah a kir timi kha kan hmuh khawh mi a si. Cun Job kong kan zoh tik zongah ‘amah le amah aa tlak lo nak hngal in vutcaam lak a ṭhumi’ a Job a si kha kan hmuh. 

Dawtmi u le nau hna, sual ngaihchihnak kan ti tikah hin ka palh ko timi kha kan theih ko a si ahcun kan theih mi kan sualnak vialte i ngeihchih in tuah ti loin, mer tak in, kal tak in Bawipa sinah kan kir tikah hin fapa tlau pa bantukin Bawipa nih a kan cohlaan i thluachuah za a kan pek. Kan sual kan palhnak vialte a kan ngaihthiam i a thluachuahnak he kan um lai ti hi kan hmuh khawh mi a si. 

Zei ruangah dah sual ngaihchihnak timi cu a herh tiah cun sual ngaihthiamnak kan co nak hnga ding caah a si. Sual ngaihchihnak kan ngeih lo tikah sual ngaihthiamnak a um kho lo. Calvary tlang orhlei kam an an tar mi mifir pa zong, a sual palhnak vialte aa ngaihchih i “na Pennak chung na luh tikah ka philh hin hlah” tiah Jesuh Khrih kha a ti tikah Jesuh nih “Nihin nang le kei Paradise chungah kan um cang lai” tiah bia a kamh mi zong kan hmuh khawh. 

Kan sual palhnak vialte kha kal tak, mer tak in a hmaanmi sual ngaihchihnak kan ngeih tikah hin Bawipa nih kan sual palhnak vialte a kan ngaihchiam i zungzal nunnak tu a kan pek timi kha nihin nih caah hrawmh kan duh hna. Nan dihlak cungah Bawipa nih thluachuah in pe ko hna seh! Amen