St. John Baptist de La Salle, Priest

1651-1719

Audio (aw) zongin ngai khawh a si. 👇👇

De La Salle Brothers bu a rak dirhtu St. John Baptist de La Salle cu 1651 kum, France ram Rims khua ah a chuak. A lungthin a thiang i Pathian leiah aa zuam ngaimi a nu le pa nih Paris Siangbawi cannak Sianginn ah an rak luhter i 1678 kum ah cu khua ahcun Siangbawi cannak an rak pek. Cu hnu kum tlawmpal ah misifak fa hna fimcawnnak caah a nunnak pakchanh dingin Rims khua i biaknak lei ukchung hmunpi i a rian kha a kaltak. A ngeihmi chawva thilri vialte a zuar dih i misifak hna caah Siangin a sakpiak hna. A hnu ahcun ca chimhnak leiah a lung a chuak deuh caah Siangcachim sawhsawh Saya (12) nih a hnu an zulh i an zapi phukhat in an um hnu ah ngakchia fimcawnnak leiah an nunnak i pekchanh dingin an hna a rak tla. Annih kha Khrihfa cacawnnak Sianginn Brothers tiah an rak auh hna. Cachimhnak leiah felfai tein ṭan khawhnak dingah ahohmanh Siangbawi cannak laak lo dingin bia an rak i khiah. 1698 kum ah England Siangpahrang James II nawlnak in miphun sang hna le mirum hna caah hmasabik Sianginn a rak sakpiak hna. Cu caan lila ah kut rianṭuan hna an fale caah Zarhpini cawnnak Sianginn (Sunday Academy) zong a hunpiak hna. St. John cu amah a nunnak lamthluan ah tukforhnak a phunphun a rak tong. Voikhat cu Sianglai Saya hna nih Paris khua i a Sianginn kha kharpiak dingin an rak hal. Cu hnu a rauh hlan ah a bu chungtel he aa tlak lomi a bu chungtel cheukhat nih de La Selle cu Brother Siangngakchia hna kha a renghtuk hna tiah sual an puh hoi. Cu caah cu chungtel cheukhat hna nihcun Paris khua Bisop sinah St. John kha a rian in phuah dingin an chimh nain Bishop nih a cohlang lo. A dang hruaitu pakhatkhat cohlan awk nakcha cun Brother hna tu kha bu chungin chuak deuh hna seh tiah ralrin a pek hna. A hnubik ah Brother hna nih Europe ramkip ah Sianginn an on kho i Bupi min putin a nganbik cachimbu ah a rak cang. St. John Baptist de La Salle cu 1719 kum, Rowan khua ah a rak thi i 1950 kum ah Siangcachim Saya/mah hna runvengtu sinak a rak thanh.