Thawhṭhan Nun

Nihin ni kan relmi Thawngṭhabia chungin thazang i lak ṭi dingah Mat 28:8-15 chungin a si lai. Jesuh thawhṭhannak nih hin kan vawlei pi a thlen ti kha pakhat nak ah vun langhter ka duh. Zeicah tiah, Jesuh thihnak in a thawhṭhannak thawngin Jesuh Khrih cu Pathian vialte lakah Pathian, Bawi vialte lakah Bawi a sinak kha a langhter i thihnak a teitu a si mi zong kha a langhter. Cun Biakam hlun kha biakam thar ah a thlen i, cuticun biaknak kha a thlen timi zong kha kan hmuh khawh. Cun Pathian kan rak biak ning zong kha aa thleng. Cun Sabbath ni kha thawhṭhan nun a ngeimi zumtu hna nih cun Sabbath kha hmang ti loin Jesuh Thawhṭhannak Zarh hmasa bik i a nikhat nak ni kha biaknak puai ni ah kan hman timi zong kha kan cathiang chung in kan thieh khawh.

Cun, nu pawl nih kan Bawipa Jesuh Khrih a thawhṭhannak ah a hmasa bik ah tehte an khaan timi zong kha kan hmuh khawh. Thawhṭhannak kong a phuangtu hmasabik hna hi pa an rak si lo ti zong kha kan hmuh khawh. Mah nih a langhter mi cu Judah mi hna nih nu pawl kha zei rak rel hna loin milu cazin chung hmanh ah an rak khumh mi an rak si lo. Sihmanhsehlaw, kan Bawipa Jesuh Khrih thihnak in a thawhṭhannak thawngin nu hna nih Jesuh a thawhṭhannak kha a hmasabik tehte an rak khaan i, cuticun Jesuh cu vawlei tuanbia a thlengtu a si timi zong kha kan hmuh khawh. 

Hithil hna nih a langhter mi cu, thawhṭhan nun a ngei cang mi nang le kei caah cun ‘miphun thleidannak a um ti lo’, Judah mi an um ti lo, Gentel mi an um ti lo, nu le pa thleidannak a um ti lo, mirum sifak thleidannak a um ti lo. Pathian hmai ah pum khat kan si timi kha a langhter mi a si. 

Dawtmi Khrihfa u le nau hna, nihin kan nunnak ah kan cathiang nih thazang a kan pek mi cu ‘thawhṭhan nun a ngei taktak mi kan si ah cun, nihin kan nunnak ah Khrihfa kan si nak ah thleidannak um lo tein, mi vialte kha aa ruang tein a zoh kha tu Khrihfa ṭha kan si khawhnak ding ca zong’ kha sawm kan duh hna. 

Cun, thawhṭhan nun kan timi cu zeidah a si kan ti ah cun (2Cor 5: 17 ) “Nun ning hlun kha an lo cang i nun ning thar kha aa thawk cang” tiah a ti. Phundang chim a si ahcun, thawhṭhan nun timi cu nun ning hlun kal tak kha a si. Thawhṭhan nun a ngeitu taktak kan si ah cun kan nun hlun vialte kal tak in nun thar i thawk hi a si. Kan nih vialte hna zong kan tlamtlin lonak, kan sualpalhnak vialte kal tak in nun thar ah i thawk cang hna u sih law kan Bawipa Jesuh Khrih a thawh ṭhannak aa hrawm kho mi Pathian fanu fapa ṭha kan si khawhnak hnga ding ca zongah Pathian sin ah i pumpek hna u sih. 

A donghnak ah, kan Bawipa Jesuh Khrih nih nu hna sin ah a chimmi cu zei dah a ti tiah cun ‘Nan sinah daihnak um ko seh’ timi kha a si i, a zultu hna sin a langh tikah a chim hmasat mi cu ‘nan cungah daihnak um ko seh’ timi kha a si. Zei ruangah dah ‘Daihnak’ bia hi a chim tiah cun, vawlei kan nunnak ah kan herhmi cu ‘Daihnak’ a si nak kha a langhter mi a si. Tuchun kan vawlei, kan kawlram, kan Laitlang kan zoh tikah, kan Khrihfa nun kan zoh tikah daihnak hi kan herh tuk hringhran lio caan a si. 

Kannih vialte zong thawhṭhan nun kan ngeih a si ah cun daihnak, lawmhnak hi kanmah ta a si hrimhrim lai timi kha chim ka duh. Bawipa nih thluachuah in pe ko hna seh.