ZUMHNAK UMTUNING HNA
Zumhnak cu veel a si
Mithiang Peter nih Jesuh kha, “Nangmah cu a nungmi Pathian Fapa, Khrih na si,” tiah a vun ti tikah Jesuh nih, hi biaphuan cu “thi le sa” in a ra lo, sihmanhsehlaw “Vancung i a ummi ka Pa sinin a ra” tiah a ti. (Mt. 16:17, Gal 1:15, Mt. 11:25). Zumhnak cu Pathian laksawng a si. Mah zumhnak hi hman hlanah minung nih Pathian vel kha ngeih hmasa a hau. Thiang Thlarau nih lungthin a meri Pathian lei ah a hawih ter. Pathian nih lungthin mit kha a au ter i, mi vialte nih biatak kha fawi tein an cohlan i an zumh. Zumhnak cu Minung tuahnak a si.
Zumhnak cu Thiang Thlarau bawmhnak vel laksawng in a si kho. Sihmanhsehlaw zumhnak cu minung tuahnak zong a si ve. Pathian bochan le a biatak in i tlaihnak hi minung ruahnak le zalonnak he aa rel lo. Minung le minung i kawmhnak hmanh ah pakhat le pakhat i zumhnak hi zeihmanh a nautanak a um lo. Cucaah Pathian zumh hi minung tuahnak a si i minung upatnak he aa tlak ngaingai.
Zumhnak le Theihthiamnak
Phuanmi biatak hi kan chuahpi mi lungthin fimnak hmai ah a hmaanmi le biatak in a langh caah zumhnak kan ngeih ti a si lo. Kan zumh cu aa Phuangtu Pathian thawngin a si. Amah cu mi a hlang kho lo i amah zong hlen khawh a si lo. Kan zumhnak hi ruahnak ningte a sinak hnga caah biaphuan lenglei tehte hna hi lungthin chung i Thlarau bawmhnak he peh in um seh ti kha Pathian nih a rak duh. Cuticun Khrih le mithiang hna nih an tuahmi khuaruahharnak hna, Profet bia hna, Bupi a thannak le a thiannak, theih a tlainak le a hmuhnak hi a thiangbik mi biakam hmelchunhnak an si i mi vialte theihthiam dingin a um. Mah hna hi zumhkhawhnak petu cu a si. Zumhnak hi lung mitcawtnak a si lo ti kha an hmuhsak. (Mk. 16:20, Heb. 2:4).
Zumhnak cu a Fiang
Zumhnak cu minung hngalhnak nakin a fiang deuh. Zeicahtiah zumhnak cu lih a chim thiam lomi Pathian bia cungah aa bunh. Phuanmi biatak hna hi minung ruahnak le hmuhtonnak ah aa tuaitam mi a lo ṭheo. Sihmanhsehlaw Pathian ceunak nih a pekmi fimnak cu minung ruahnak nih apekmi fiannak nakin a ngan deuh, “Harnak thawnghra nih lungawtawmnak pakhat an chuahter kho lo” (John Henry Cardinal Newma).
Zumhnak nih Theihthiamnak a kawl
A zummi nih a zumhmi Pathian hngalhchin le a phuanmi theihthiam deuh a duh hi zumhnak nih a rak ngeihmi lungput a si. Hngalhtheihnak a thuk chinchin i zumhnak a ngan chin, dawtnak mei zong a ṭhang chinchin. “Zumhnak vel nih nan lungmit kha a au ter” (Eph. 1:18) lai i Pathian biaphuan kha nan theihthiam lai. Thiang Thlarau nih zumhnak kha a laksawng in a tlinter zungzal i biaphuan kha a thuk chin chin in a theihter. Mithiang Augustine nih, “Ka zumh cu ka theihthiamnak caah a si, Ka theihthiammi cu ṭha deuhin ka zumhnak hnga caah a si,” tiah a ti.