Maundy Thursday
A Thiang Cawn Nili Ni
Maundy Thursday cu Jesuh Khrih Bawipa zanriah a hnubik a einak ni (Bawipa thawhṭhan hlan cawn nili ni) khi a si.
Maundy timi cu Jesuh Khrih a thawhṭhan hlan nithum aa duh ah tuah mi a si. Kan Bawipa Jesuh Khrih a thih lai ah a hmanungbik a tuahtaak mi thil lakah amah hun hngalhṭhannak thil pahnih kan hmuh khawh. (1) A zultu ke a ṭawlpiak hna. (2) Hmanungbik zanriah einak (Lanhtak puai zanriah) i chang le mitsur zu a phawt hna timi a si.
Maundy timi biafang cu Latin holh in a rami a si i ‘Nawlbia’ tiah sullam a ngei. Cu bia cu ‘Pakhat le pakhat i daw uh’ tiah Jesuh Khrih nih a chimmi kha a si. (Jn 13:14). ‘Nan ke nan i ṭawlpiak awk a si’ a ti hna tikah toidornak kha a chim duh. Nawlbia timi cu tuah hrimhrim dingmi ti kha a si ko. Jesuh nih ‘Nawlbia thar kan pek hna; pakhat le pakhat i daw uh; Keimah nih kan dawt hna bantukin pakhat le pakhat nan i dawt awk a si’ a ti. ‘Pakhat le pakhat nan zawn nan i ruah ahcun mi vialte nih hi hna hi amah zultu an si tiah an in hngalh hna lai’ tiah a ti hna. Cu bia cu biapi tuk ah an rak chiah caah Thawhṭhan hlan nithum aa duh ah tuah awk a si, an rak ti.
1980 kum hlan ahhin an rak tuah tawn i an tuah ningcang cu; Tlangbawi (Siangbawi) hna nih phunglam ah an rak i ser i an nunphung zongah an rak i ruahchih mi cu; puan kha ti ah an hnim i zumtu hna ke kha an rak hnawhpiak tawn hna. Australia, Portugal, Russia le Spain ram ti bantuk i a ummi Khrihfabu ahcun Jesuh Khrih a thawhṭhan hlan cawn nili ni ah misifak minung (12) kha an ke an rak ṭawl hna. Cuti tuahnak ah Siangpahrang nih a tawlrel pi hna an ti. England ram zongah cu ke ṭawlnak phungphai cu an rak tuah ve i rian fialmi hna (rian nauta ṭuanmi) kha an fial hna i Siangpahrang hmai ah an rak ṭawl ve hna. Cucu 1680 kum lio ah a si i hnanungbik an tuah zong a si, cu hnu cun an pehzulh ti lo.
Bupi nih cu cawn nili ni ahcun sathau kha a rak hman. A thianghlim mi biakṭheng (altar) cu a thianhhlimh i sathau far an rak van. Acheu Cathedrals hna ahcun pa ngakchia (13) asiloah (12) kha an ke an ṭawlpiak hna. Cu keṭawl cu 1878 kum i a rak thimi Pope Pineyus IX chan ahcun an rak tuah ti lo ti a si. Asinain Pope XIII nih 1961 kum ah ‘hi thil cu tuah ding hrimhrim a si’ tiah a rak tuahpi ṭhan hna. Martin Luther nihcun ‘hi thil cu a herh in kan hmu lo’ a rak ti nain acheu Protestant kan unau hna lak zongah a tuah hnihkhat cu an um ve. An hei tuah duh hnawhchan mi cu u le nau rualrem te le i dawhria tein umṭinak kha a langhter duh bikmi cu a si ko.
Kan Bawipa Jesuh Khrih nih tangdornak thinlung le rian nauta zong kha ṭuan duhnak a kan fial hnawhchan mi hun ruahṭhan dingah tuah mi cu a si. Phundang in chim ahcun dawtnak nih zeizongte a tuaktan khawh dih; a ruam a kai lo, a sang tuk zongah aa chiah lonak kong le Pathian cu dawtnak a si caah amah a zumtu hna nihcun pakhat le pakhat i dawt a herh. Midang bawmhchanh kha Khrih Jesuh kan Bawipa nih a kan duhpiak mi a si ti kha hngalhṭhan duh ah kan tuah duh hnawhchan cu a si. Kan Bawipa Jesuh nih i dawt taktak le zaangfah in rian hmete le rian nauta zong ṭuan duhnak ngeih tu kha a kan cawnpiak mi cu a si.
Cucaah thawhṭhan hlan nithum aa duh ah Jesuh Khrih le a zultu hna hmanungbik zanriah einak nih a kan cawnpiakmi cu hngal camcin cio hna usih!