Trump le vawleicung hruaitu hna nih Iran ral donghter dingin Hoy Week ah Pope nih nawlnak a tuah
President Donald Trump nih Middle East ah thahnawnnak zorternak lam a kawl lai tiah Pope nih aa ruahchannak a langhter.
Pope Leo XIV nih buainak le thahnawnnak nih a hliamhmi vawlei ah daihnak um dingin a nawlnak a thar in a chim.
March 31 Castel Gandolfo villa lenglei i thawngzamhtu hna sinah bia a chimmi ah, Pope nih “Easter cu kum khat chung ah a thiang bik mi caan a si awk a si. Daihnak caan a si, thil cang cia mi hna ah ruahnak i dahnak(reflection) tuah caan a si. Sihmanhsehlaw, vawlei cung hmun tampi ah harsatnak, thih-lohnak hna zong tampi a um rih mi zong hmuh khawh a si” tiah a ti.
‘President Donald Trump nih Middle East ah ral thawhnak hi donghter a duh cang’ tiah an ka chimh tiah Pope nih a chim i, ‘Trump zong nih buainak zorternak lam a kawl ve ko lai’ tiah aa ruahchannak a langhter.
Pope Leo nih, “a bik in Khrihfa hna,” kha “Khrih cu nihin tiang vailam cungah khenhchih a si rih, nihin tiang sualnak a ngei lomi hna lakah a tuar rih, a hlei in thahnawnnak, huatnak le raltuknak in a tuarmi hna kha hngalh buin nihin ni tiang fahnak a in ko rih” tiah a ti hna.
“Raltuk ruangah harnak a tongmi hna caah thlacam hna u sih. Mi vialte caah nunnak thar a pe khotu daihnak thar taktak a um khawh nakhnga thlacam hna u sih,” tiah Pope Leo nih forhnak bia a chim.
“Remdaihnak caah pehzulh tein nawlnak kan tuah leng mang ko. Sihmanhsehlaw, mi tampi nih huatnak le thahnawnnak, raldohnak karhter an duh,” tiah Pope nih a chim chih.
Kahdaihnak caah ruahchannak
Easter caan ah kahdaihnak tuah ding aa ruahchannak a langhter i hitin a chim: “President Trump nih naite ah raltuknak donghter a duh tiah a chim tiah an ka chimh. Thah nawnnak zorter ding in lam a kawl lio a si kho men lai; cun middle East lei le hmun dangdang hna ah a nikhat hnu nihkhat in a kaarhmi huatnak hna hloh khawhnak ding caah bawmtu a si lai tiah ruahchannak ka ngei” tia a ti.
Pope nih vawleicung hruaitu vialte kha a chawnh hna i, “Cabuai ah ra kir u, biaruahnak tuah u. Buainak a donghnak ding caah a phichuah dingin kawl hna u sih, kan thanchotermi thahnawnnak zorternak lam kawl hna u sih. A hlei in Easter ah “Daihnak” nih kan lungthin a uk khawh nakhnga caah cabuai cungin bia chim ṭi hna u sih” tiah a ti hna.
Cun, “lungthin ṭha ngei in Bawipa a zummi hna zong hmunkhat tein kal ṭi ding, mi vialte caah harnak a ing tu le khamhnak a kan pe tu Khrih he hmunkhat te ah kal ṭi in dainak a phurtu si dingin i zuam hna u sih” tiah nawl biacahnak zong a chim.