Pathian lawng hi upatnak a sang bik mi pe u sih

Nihin ni caah Bupi nih Pathian bia in thazang lak ṭi dingah a kan thimpiak mi cathiang (Isiah 42: 1-7 Psalm 27: 1-3, 13-14, Jn 12: 1-12) chungin thazang i lak ṭi hna u sih. 

Minung kan nunnak ah hin kan herhmi le kan duhmi tiin phun hnih a um. Thil pakhat kan duh tikah, asiloah dawr ah kan kal tikah ‘mah thil hi ka duhmi maw a si, ka herh mi dah a si’ timi hi thieh a herh tiah chawlehthalhnak lei in a thei mi hna nih an chim ṭheo tawn. Khrihfa kan sinak ah thlarau lei in kan ṭhancho khawhnak ding caah cun, kan taksa duhnak a um bantukin thlarau duhnak zong a um caah, thlarau duh herhnak hi a pakhatnak ah kan chiah khawh ding hi a biapi tuk mi a si. 

Nihin kan relmi Pathian bia hna chungin kan hmuh mi cu Is 42:8 “Keimah lawnglawng hi Bawipa na Pathian cu ka si. Ka sunparnak hi pathian dang ahohmanh hrawmh ka duh hna lo i ka thangṭhatnak hi siasal zeihmanh hrawmh ka duh hna lo” a ti. 

Nifatin kan nunnak ah Pathian nih kan nunnak pakhat nak ah kan chiah khawh ding hi a biapi ngai mi a si. Taksa duhnak a um bantukin thlarau duhnak a um ve i, nifatin kan rianṭuan, kan cawlcanghnak vialte hna chungah hin ‘zei hi dah Pathian nih tuah ha seh tiah a kan duh’ timi hi Khrihfa hna kan nunnak ah a biapi ngaimi a si. Cun thlarau lei in kan ṭhancho khawhnak hnga ding caah Pathian duhnak kha a pakhat nak ah kan chiah khawh zungzal ding kha a biapi ngaimi a si ve. Jesuh Khrih nih hitin a kan ti, “Pathian duhnak kha nan duhnak nganbik ah a chia mi cu mi lunglawm nan va si dah. Pathian nih nan duhnak kha a tlinter lai” tiah a ti. Kan nunnak pakhat nak ah kan chiah dingmi cu Pathian duhnak lawnglawng hi siseh. Sunparnak kan pek ding zong hi amah Pathian lawnglawng hi siseh. Upatnak kan pek ding mi zong hi amah Pathian lawnglawng hi siseh. 

Ex 20:5 “Keimah cu nahchuahnak a ngeimi Pathian ka si” a ti. Pathian in ka sunparnak hi pathian dang ahohmanh hrawmh ka duh hna lo tiah Isiah 42:8 chung zongah Pathian nih a ti. 

Tutan ah online ah a laar ngaimi pakhat cu mithi pakhat a um tikah, cu mi pa nih ram le miphun caah a nunnak a pek tikah, “upatnak sangbik kan in pek” tiah langhter ṭheo a si tawn. Cheukhat Pathian rianṭuan tu hna nih cun ‘upat nak sangbik hi minung pakhat le pakhat kan i pek awk a si lo’ tiah a timi zong an um ve hna. Hi zawn ah chim duh mi cu ‘ka sunparnak hi pathiang dang zeihmah hrawmh ka duh lo’ timi kha a si. 

Cuasicaah, sunparnak a sangbik kan pek ding mi cu Pathian pakhat lawnglawng kha a si. Cawnglomhnak a sangbik kan pek dingmi cu amah Pathian lawnglawng hi a si. Upatnak sangbik kan pek dingmi cu Amah Pathian lawnglawng hi a si” timi kha hi hmun in thazang pek kan duh hna. 

Cheukhat ni an chim ṭheo tawn mi cu “RC bupi nih Mary an biak” tiah an ti tawn. Cucu an theih lo caah a si i mawhchiat ding zong an ṭha thlu ve lo. Zeitik hmanh ah kannih RC bupi nih Mary hi Pathian aiawh ah kan chia bal lo. Nu Mary cu Pathian nih a Fapa hringtu si dingah a thimmi a si i “Thluachuak nu” tiah Pathian nih a ti mi zong a si. Cuasicaah kannih hna nih Nu Mary sin ah cawnglomhnak kan pek i zeitik hmanhah Bupi zong nih Pathian hmun ah a chia bal lo timi zong kha vun tarh ka duh fawn. 

Dawtmi u le nau hna, kan nunnak ah Pathian hi a pakhat nak ah chia u si law upatnak sangbik a pe kho tu fanu fapa ṭha kan si khawhnak hnga ding caah Pathian nih thluachauh run kan pe hram ko seh.