KAN ZUMHNAK IN ZUMHNAK NAWLNGAIHNAK
Zumhnak nawlngaih cu theihmi bia cungah lungtho tein dawr kha a si. Zeicahtiah zumhnak biatak cu Pathian nih aamah a khan. Abraham cu mah bantuk nawlngaihnak ca’h i zohchunh awk a si. Ngaknu Thiang Mary cu nawlngaihnak ah a tling bikmi a si.
Hebrew cakuat nih Israel pupa hna zumhnak kha a thangṭhat i Abraham zumhnak a thangṭhat khun. Zumhnak in ro ah a hmuh hngami hmun ah Abraham cu chuah awkah auh a vun si tikah a ngaih i khuaikadah ka kal lai ti kha hngalh lo buin a chuak. (Heb. 11:8, Gen. 12:1-4). Zumhnak in biakamhmi ramah mikhual le Pathian biak awkah a kalmi hna bang in a kal. (Gen. 23:4). Zumhnak in Sarah nih biakam mi fapa kha a pawi. Zumhnak in Abraham nih a fapa ngeihchunh kha raithawinak ah a pek. (Heb. 11:17).
Abraham nih cuticun Heb. 11:1 i zumhnak kong a chimmi kha a tlinter. Zumhnak cu kan i ruahchan mi thil hna kha kan hmuh lai, hmuhkhawhlo mi thil hna kha an um taktak ko tiah lungtliannak kha a si. Abraham nih Pathian kha a zumh i cucu a dinnak ah a ral piak.” (Rome 4:3, Gen. 15:6). Abraham cu a zumhnak a fek caah “a zummi vialte hna an pa” ah a cang. (Rom. 4:11, 18, 4:20, Gen 15:5).
Biakam Hlun cu mah zumhnak kong tehte khannak ah a ram ngaingai. Hebrew cakuat nih Pathian hnatlaknak a hmumi pupa hna an zumhnak kha thangṭhat in a ṭial. (Heb. 11:2-39). Sihmanhsehlaw Pathian nih kan caah a ṭha deuhmi thil kha a hmuh chung cang. A Fapa Jesuh zumhnak vel kha a si. (Heb. 11:40, 12:2).
Ngaknu thiang Mary hi zumhnak in nawlngaihnak kha a tlingbik in a ngeimi a si. Zumhnak in Mary nih vancungmi Gabriel thawngthanhnak le biakamnak kha a cohlan i, “Pathian caah a sikholomi zeihmanh a um lo” ti kha a zumh. Cucaah, “Zoh hmanh! Keimah cu Bawipa salnu ka si, na bia bangin ka cungah tling ko seh,” tiah a ti. (Lk. 1:37-38, Gen 18:14). Elizabeth nih a biak,” Bawipa nih a chimmi bia kha a tling lai tiah a zumhmi nu cu thluachuakmi a si”. (Lk. 1:45). Mah zumhnak ruangah hin Mary cu mi vialte nih “Thluachuak Nu” tiah an auh. (Lk 1:48).
A nunchung vialte le a fapa Jesuh vailam cung a thih tiang hmanhah Mary a zumhnak cu aa hnin bal lo. (Lk. 2:35). Pathian bia a tling lai ti kha a zumh zungzal. Cucaah Bupi nih a thiang bik zumh pum a langhnak tiah Mary kha a upat.