Bawipa cu mi nun nem mi a si

Nihin cu Palm Sunday ni a si. nihin kan relmi cathiang hna cu Isaiah 50:4-7, Filipi 2:6-11 le Mat 26: 14-27:66 hna hi an si. Bupi calender kum 1 (Year-A) nak chungin kan relmi hna an si. 

Palm Sunday kan tuah mi cu a sunglawi ngaimi le a thianghlim ngaimi zarhpi ni zong a si. Jesuh Khrih cu Jerusalem khua chungah sunglawi ngai in a luhnak kong a si. Siangpahrang a sinak tehte zong a si. Jesuh nih a tuar hnga dingmi harsat nak vialte hna kha a theih dih ko hna. Sihmahsehlaw, a thil tuah nak paoh ah hin Pa Pathian duhnak a zulh lengmang timi zong kha kan hngalh ding a si. Cun Jesuh nih thil a tuah mi paoh ah hin lunglawm tein le nawl ngai tein a tuah hna timi zong kan hmuh khawh. 

Jesuh Khrih harsat nak a tuar mi nih a kan hmuhsak ve mi cu kannih hna zong hi vawlei kan nun lio ah hin harsatnak kan ton ve ko lai. Sihmahsehlaw, kan intuarnak hna cu pakpalawng a si lo. Teinak lei ah a panh mi kan si timi zong Khrih hnu zultu pakhat, Khrihfa pakhat sining in kan theih ding zong a si. Jerusalem khuapi ah Siangpahrang bangin a rak luh bantukin kan nih hna zong hi vawlei ah lunglawm tein kan rak lut ve hna. Hi vawlei ah minung pakhat dirhmun in harsatnak le fahnak kan ton ve ko lai. Sihmahsehlaw, Jesuh Khrih thihnak in a thawh ṭhan bangin nikhat kan nih hna zong thihnak in kan tho ṭhan ve hna lai. 

Jesuh nih Jerusalem khuapi chung a luh lio ah la fa te aa cit. Pathian tinh ning cu minung ruah ning le tinh ning he aa dang hringhran tawn. La fate cit in dai tein Bawipa a luh bangin kan nih zong kan nun caan te ah hin midang nih kan thei hmanh hna hlah sehlaw poi lo. Nunnem nak he teinak kan lei ah kan panh ve ding a si. 

Vawlei mit-hmuh teinak bantuk siloin nawl ngeihnak, he Siangpahrang vialte lak ah Siangpahrang bik a si mi Jesuh nih zeitin dah van ram lei kalnak lam, nunnak lam cu zeitin dah kal ding a si timi zong kha a kan hmuh sak. Pathian he pehtlaihnak a ngei mi hna nun zia cu duh a nung, a dai, nun nem nun in a nung mi an si. Khrih nunzia kan zoh ah hmuh khawh dih a si. Khrihfa mi hna zong nih cu nun zia te cu kan i nun pi ve ding a si. Kan cawn ve ding a si. A thiang Zarh timi (Holy Week) kan phan cang. Hi caan ah hin a thiangmi nun in nun khawh ding kha kan i zuam ding cu a si. 

Kan nun ning cu Pathian duh ning in a nung mi si ding kha a si. Zungzal nunnak lam ah a panh mi nun zia in kan nun ding a si. Harsatnak hna tong hmanh hna u sih law, cu harsatnak hna nih cun kan thianhlim nak caah a kan bomh ding cu a si. Kan ruamkai, kan i phorhlawtnak hna kha a kan thinh piak ding a si. Cu ti lawng cun Pathian hmai ah cotlak mi kan si lai.

Dawtmi u le nau hna, a thiang zarh ah hin thianhlim nak he Pathian duhnak, nunzia dawh le Pathian nawl zulh, Pathian duhnak tuahnak nun in nun khawh i zuam hna u sih.