NUNNAK NGEI VIALTE PEHTLAIH FUNTOMNAK AH NUNNAK NGEI PAKHAT CIO NIH AN PEKMI THAWNGṬHA

Minung hna cu Pathian muihmel he aa lo in sermi kan si, tiah biapi in chimrelnak cu thilnung vialte caah Pathian nih aa ruahchanmi tinhnak kha zeirel loin um awk a si lo. Zei bantuk thilnung saram hna hmanh man fawimi thil an si lo. Van le vawlei i hmunkhawh mi thil vialte nih hin Pathian dawtnak kong, minung cungah a ngeihmi tahkhawhlo dawtnak kng kha an thanh cio.

Fing le tlang, ti le vawlei dihlak cu Pathian dawtnak kha an langhter cio. Pathian he tlaihchannak hmuhmi tuanbia cu peng le hmun he pehtlaihnak a ngei i, cu peng le hmun hna cu pumpak caah a biapi ngaimi hmun an si. Kannih cu mah le nunnak caah a hleikhun a cangmi a rak chuahnak hmun hna kha kan cinken i atu le atu tibantukin cu peng le hmun hna kong kan ruah ṭhannak nih ṭhathnemnak tampi a ngei.

Tlangcung umnak hmun ah ṭhanlianhnak, cerhti putmi tiva pawngah ṭhut in cerhti kha din peng nak, innpawng hmunrawn i lente i celhnak, tiah hmuhtonnak a rak ngeimi hna caah cu hmun ah va len cu mah rak nun ningcang kha theih ṭhannak caan ṭha a pekmi a si kha kan hmuh.

Pathian cu mansung cauk pakhat kha a rak ṭial. Cu cauk chung i aa telmi biafang hna cu van le vawlei i a ummi thilnung saram tampi hna an si. Canada ram in Bishop hna nih Pathian ṭhawnnak huham an langhter mi ah zeibantuk thilnung saram hmanh hnon khawh an silonak kong an rak hmuhsak. A kau taktak mi khuacuanhnak thawk in a hme pacikte thilnung tiangin kokek vawlei cu minung caah khuaruahhar ngai thil an si. Kokek vawlei cu Pathian kong kha pehzulh tein (cat loin) a langhtermi a si.

Japan ram i Bishop hna zong nih ruah awk ngai a simi konglam pakhat kha an hmuhsak ve. Thilnung saram hna cu annih a nungin an umnak kong hla in an sak ciomi kha kan zohnak in Pathian kha dawt, ruahchan bochannak he nuam tein an um khawh cio.

Sermi thilnung hna kong ruatṭhannak cu thilnung pakhat cio thawngin kannih pek dingah Pathian nih a tinhmi cawnnak kha hmuh ṭhannak a si. Zumtu Khrihfa hna caah sermi thilnung hna kong hmuhsak ruat ṭhannak cu thawngṭha pakhat ngaih bantukin, hngalh harmi biahalnak pakhat kong ngaih bantukin, thlithupte a simi awthawng pakhat theih bantuk in a si.

Bible thiang chungah aa telmi Pathian nih biathlam a pek i a chimmi konglam hna he hmunkhat ah chiah in, niceu a rak chuahnak le zaan a sinak hna zongah Pathian ṭhawnnak hmuh khawh a si.

Hi bantuk langhternak hna kha ralring tein thlaichunh ruahṭhannak in kannih cu a dang thilnung saram vialte he pehtlai in a um kha hmuh a si. Vawlei pumpi kong chim tikah hin keimah kong zong a chimmi a si ve. Vawlei pumpi hi a thiang, phunthiang mi a sinak kong soisel cekhlat inkan zoh ahcun kanmah kong kha tamdeuh in theih a si.