Bawipa Bia cu Zumtu hna kan Nunnak asi

Minung kan rawlthawi bik le kan nunnak taktak asi mi cu zeidah asi tiah cun Pathian bia hi asi. (Mt 4) chungah kan Bawipa Jesuh Khrih nih fiangtein “Minung hi rawl lawng in a nung kho lo. Sihmanhsehlaw, Pathian nih a chimmi bia paoh cu an nunnak asi lai” a ti. Kan nunnak taktak, taksa kan nunnak caah rawl cu a herh i tii zong a herh i nunnak a kan pe tu asi nain minung timi Pathian mui a kengmi, thlarau nun a ngei mi, a mah he lo in a ser mi minung kan rawl tak tak, din awk taktak, kan nunnak taktak cu Pathian bia asi tihi kan hmuh khawh mi asi. 

Nihin kan nunnak ah Pathian bia in a nungcang mi hna an nunnak kan zoh tikah thla an cam- cam chin an duh, an i pum- pumh lengmang an duh, chawva an pek- pek chin an duh. A bia in a nungmi hna cu Bawipa duhnak hi zeidah asi tihi nifa tin tein an kawl peng. Bawipa an thangṭhat- thangṭhat chin an duh. An nunnak tiang hmanh kha Bawipa caah an pek. Dawtmi ule nau hna a bia nih kan nunnak le kan zumhnak a thawnter maw? A bia nih hnga ngamnak, daihnak an kan pe maw? A bia nih thlarau he hawikom a kan ngeih ter maw? A bia nih lawmhnak, toidornak a kan pe maw? A bia in zei paoh kan ton khawh maw? Khrih bia nih kan nunnak ah nawlngei sehlaw kan nunnak uk seh tihi pakhat nak ah sawm kan duh hna.

Pathian bia in a nungmi le zungzal a hmun mi thawngṭha in hrin thar mi kan si cang. “Thih a thiam mi nule pa siloin thih a thiam lo mi Pa fa nan si cang” tiah (1 Peter 1:23) chungah kan hmuh. Cun (Kol 3:16) chungah “Khrih bia cu nan chungah tampi in a fimnak he khan um seh” a ti. Khrih bia cu kan nunnak chungah a fimnak he a um hnu lawngah a chia a ṭha kan thlei dan khawh lai i cu Khrih bia nih cun kan nunnak ah lam a kan hruai tikah hin nunnak le teinak hi kan hmuh khawh dingmi asi. Khrih bia in a nungmi hna an nunnak kan zoh tikah, mirum Zekia zong kan zoh tikah Khrih bia nih a chungah rian a ṭuan hnu ah cun, Thiang Thlarau nih a chungah rian a ṭuan hnu ah cun zeizong vialte kha Khrih caah nun a siang tihi kan hmuh khawhmi asi. Cu Khrih bia chungah nunnak ngei mi hna, a nung timi hna nih cun sualnak tei khawh nak an ngei, ṭhawnnak an ngei tihi kan hmuh khawhmi asi. 

Cucaah dawtmi ule nau hna Khrih cu khamhtu le bawi ah pawm in tipil kan ing i cu tipil a ing mi hna fianthar a ngeimi hna nunnak cu Khrih bia nih kan nunnak ah hin a hruai awk asi. Khrih bia hi kan i nun pi awk asi. Hnga ngamnak hi vawlei cung chawva, sui le ngun thiamsan nak in hmuhmi asi lo. Khrih bia ningin a nungmi hna nih hmuhmi asi. Khrih bia cu kan nunnak cah lam hruai tu fim chimtu damnak pe tu le hnga ngamnak asi. Khrih bia in a nunglo mi cu thlarau nih an nunnak ah rian a ṭuan khawh tilo, Khrih bia al cu ngeihchiat nak le lungkuai nak asi tihi siangpahrang Uzziah kong kan zoh tikah kan hmuh khawh mi asi. Kum 16 asi ah Judah siangpahrang a ṭuan i Bawipa hmai a kawl lio, Bawipa bia in a nun lio caan ah cun khua awng a pemh i a tuahmi kip paoh ah tlinnak a hmuh. A sinain Bawipa hmai kawl lo in Bawipa bia a al i Bawipa bia bangin a nun lo hnu cun thinghmui zawtnak in a thi tihi kan hmuhkhawh mi asi. (2 Chanrelnak 26:16) chungah “A rian a siang tilo mi tlangbawi rian, lungkhawn le porhlawt le a rian a si lo in a ṭuan tikah chiatserhnak a tong i thihnak tiang a phan” tihi siangpahrang Uzziah kong kan zoh tikah kan hmuh khawhmi asi. Cucaah Pathian bia cu nang le kei kancaah, taksa caah damnak asi i kan ruh tiang cah hmanh ah khin sii ṭha bik asi ti kha (Phungthlukbia 3:8) chungah kan hmuh khawhmi asi.

Pathian bia in nungmi, kan Bawipa Jesuh Khrih nih a hruai cangmi, a bia in a hruai cangmi hna an nunnak ah damnak le himnak le hna ngamnak an hmu. Cucaah dawtmi ule nau hna “Biatak kan chimh hna ka bia a zulmi cu zeitik hmanh an thi lai lo” tiah kan bawipa Jesuh Khrih nih a kan ti. A bia hi zulko u sihlaw, a bia hi ngai ko u sihlaw, a bia bangin kan nun ko asi ah cun, a bia hi kan chungah rian a ṭuan ko asi ah cun, a bia kan theihmi hi kan i nunpi ko asi ah cun kan caah nunnak asi, daihnak asi, damnak asi, hna ngamnak asi, lawmhnak asi, ṭhawnnak asi, teinak asi. A ngai tu nan dihlak cungah Bawipa nih thluachuah zaa in pe ko hna seh. Amen