Pope Leo XIV: Nawlngeitu hna nih biaruah ṭinak in kahdaihnak lam an kawl a hau

Pope Leo XIV nih Castel Gandolfo khua i thawngzamhtu hna sin ah bia tawite a chim i “hriamnam hman si loin daihnak caah rianṭuan ding” tiah a nawlnak a thar in a chim. Cun huatnak, thahnawnnak le thihnak a karh chin lengmangmi kong zong kha a mawhchiat.

” Hriamnam hman siloin mi vialte caah kahdaihnak a phichuah dingin daihnak caah biaruah ṭi nak tuah ding in a thar in nawlnak tuah ka duh ko” tiah Pope Leo nih a ti. 

Pope Leo XIV nih a umnak Castel Gandolfo Villa Barberini ah lengin a hngakmi thawngzamhtu phu hna sin ah dainak kong he pehtlai in nawlnak kong cu bia tawite in a thar in a chim ṭhan.

Ramkip dirhmun ruah ṭhan le zoh in, Pope nih, “Huatnak a karh, thahnawnnak a zual chin lengmang, minung nuai khat leng har an tong, a thimi an tam cang,” tiah a ti.

“Remdaihnak caah thlacam kan duh. Asinain nawlngeitu vialte hna zong nih buaibainak hna remh khawhnak ding caah biaruahnak ṭi nak in riantuan taktak ding zong forh kan duh hna,” tiah Pope nih a chimchap.

Zarhpi ni Angelus thlacam dih caan biachimnak ah, Pope Leo XIV nih Middle East le vawleicung hmun dangdang “ral le thahnawnnak nih a hrawhmi” dirhmun kong he pehtlai in  “a ngaihchiatnak” zong a rak langhter bal.             .

“Hi buainak ruangah harnak a ingtuarmi mi tampi hna hmai ah dai tein kan um kho lo,” tiah cu lio caan ah cun Pope nih a chim. “Anmah hna sinah fahnak le harsatnak an pek mi hna nih minung vialte fahnak le harsatnak a pek hna. Hi ral hna nih a chuahpimi thihnak le fahnak cu minung chungkhar dihlak caah ningzahnak taktak a si i Pathian hmai ah thang ngai in aunak- hramnak aw a si!” tiah a ti.

Pope Leo nih a peh rihmi cu, ” Raltuk nak hna ngol in daihnak lam aa hun khawhnak hnga ding caah; cun minung pakhat cio cungah upat nak taktak ngeih in lungtak tein biaruah ṭinak a um khawh nak hnga caah fak pi in thlacamnak ding in a thar in nawl kan duh hna” tiah a ti.