Pathian Thimmi Nu
2026, March 25 (Van ralbawi Gabriel nih Bawinu Mary sin thawngthanhnak puai) Bupi nih nihin ni ah a kan tuah piak. Hi puai ni ah kan rel mi cathiang hna cu (Isaiah 7:10-14, 8:10) tiang asi. (Sam 39:7-11) a voihnih Bible relnak (Hebrew 10:4-10), Gospel thawngṭha bia (Lk 1:26-38) hna hi an si. Nihin van ralbawi Gabriel nih Bawinu Mary sin thawngthanhnak puai ni i kan relmi hna cathiang hna chung in tawi tein thlarau thazaang i lak ṭi hna u sih. Ruat ṭi hna u sih.
“Zei ruangah dah Bawipa Pathian nih van ralbawi Gabriel kha Mary sin ah a thlah i khamhtu Jesuh a chùa lai nak kong kha a chimhter hnga?” Mary nih vanmi i thawngthanhnak a theih tikah a thin phang, a lau i a khuaruah a har. Sihmanhsehlaw, Mary nih thin phan, thlalau le khuaruahhar in a um lio ah a chim rel mi bia hna, ruahnak hna hi pingpa lo in a chimmi bia an si maw? timi kan zoh tikah pingpalo in a chim mi silo. Zei tluk hmanh in thinphang thla lau in um hmanh sehlaw a zumh mi Pathian, a nu/pa sin in, a pawngkam i um mi Pathian bia a cawnpiak zungzal tu hna sin in a theih zungzal mi Pathian sin in Pathian bia asi caah thawngthanhnak bia cu a zumh i cu a zumhnak cungah cun “Kei cu Bawipa sal nu ka si, na bia bangin ka cung ah si ko seh” tiah ati. Bawipa Pathian i thawngthanhnak kha a rak cohlan.
Dawtmi ule nau hna nang le kei zong nihin ni ah Khrihfa kan si, Pathian rian ṭuan tu kan si, Bawipa hnu zultu kan sinak ah khuaruahhar in kan um ve maw? Pawngkam ah hi vawlei sining in taksa sining in khuaruahhar nak thinphan thlalau nak kan ton tikah kan bia chimmi kan ruahning hna hi pingpalo in a chim sual i a ruat sual mi kan si tawn maw? Pathian sinin a ra mi bia kha Mary nih a zumh bantuk in kan nih hna zongnih “Nanmah sinah zungzal in ka um lai” tiah bia a kan kamhtu Pathian bia theih in vancung lei panh in khual tlawn nak ah kan ruahnak siseh, kan chimrel nak siseh pingpalo in ruat hna hlah u sih. Chimrel hlah u sih. A kan bawm tu Thiangthlarau a um, kan mah sinah zungzal in a ummi Pathian (Jesuh) a um ko timi zumhnak he ṭhawng ngai in kal zungzal hna u sih. Vawlei ral, taksa ral, thlarau ral a kan tei piak kho tu ding cu Jesuh Khrih pakhat lawng lawng hi asi.
Mary nih vanmi bia a theih tikah a lau. Sihmanhsehlaw, a bia chim relnak abia lehnak hna hi dik ngai le hman ngai in a leh khawh bantuk in kan nih hna zong taksa lei in thinphannak thlalau nak kan ton tikah Pathian zumhnak he kan ruah nak hi zeitik hmanh ah pingpalo in kal ter hna hlah u sih. Pathian nih a kan bawmh zungzal lai, Pathian nih a kan khamh zungzal ko lai timi zumhnak kha ngeih in Pathian kan zumhnak zong kha zeitik hmanh ah ṭhlau hna hlah u sih. Vawlei thil nuam nuam le thil tikhawhnak hna cungah khan kan lung kha kal ter sual lo in Pathian bia, Pathian cawnpiak nak cung tu ah khan kan lungthin kha hmunhter zungzal ko hna u sih. Zeitik hmanh ah kan palh lai lo. Mary cu a lau, sihmanhsehlaw thil dik thil hman ngai in Pathian bia a leh “Kei cu Bawipa sal nu ka si, na bia bangin ka cungah si ko seh” tiah a leh. Kannih hna zong “Maw Bawipa kannih hna cu nangmah na khamhmi, nangmah na hnuzul kan si. Na duhning bangin si ko seh. Tuah hna seh na kan duh bantuk in khan kan nih hna zong nih tuahkhawh nak thazaang runkan pe ko sawh, zumhnak run kan pe ko sawh, thlua run kan chuah ko sawh” tiin a sin ah thlacam hna u sih tiin pakhat nak bik ah vun chim ka duh.
Apahnih nak ah Mary cu Pathian nih special in a thim mi nu asi. Minung sinak ah pakhat khat he pehtlaihnak kan duh tikah an sin in thil pakhat khat upat nak kan ngeih ruangah maw asilo ah duhnak lungthin kan ngeih ruangah maw. Cu lawng in an mah hna he pehtlaihnak tuah kan duh asi. Pathian nih Mary he a rak pehtlaih tikah Mary sin in a duhmi thil a um. Cucu vawlei ṭlanh tu fapa Jesuh Khrih kha him tein a cawmtu si ding le zoh khenhtu siding caah asi. A upat caah a thim i, a thim minu kha rian a pek i, a thim mi nu zongnih a pek mi rian kha a nun dih tiangin, fel tein, zumhtlak tein a rak ṭuan mi nu asi.
Cucaah Pathian hmanh nih a upat mi nu, special in a thim mi nu kha kan nih hna zong nih upat thiam ve hna u sih. I bochan hna u sih. Pathian nih Fapa caah khamhtu caah tiin bochan nak lungthin he a thim i rian a pek bantuk in kan nih hna zong taksa lei in ral phun za kip kar lak khual kan tlawnnak ah him tein a kan chia kho tu hnga dingmi cu Mary hi asi. Amah sinah i ap ve hna u sih. “Maw Bawinu run kan bawm ko sawh, him tein vanram kan phak tiangin ra kan hruai ko sawh” tiin bawmhnak hal hna u sih.
Jesuh Khrih kha ral phun kip in a luatnak hnga ding caah a rak bawmh bantukin kan nih hna zong a kan bawmh lai i kan ral phun zakip kar lak in himnak hmun ah a kan phakpi ko lai. Amah cungah upat nak i bochannak lungthin ngei zungzal hna u sih. A ngai tu nan dihlak cungah Bawipa nih thluachuah in pe ko hna seh.