CATHIANG CHUNG I AA TEL MI HNA
Lamkaltu hna he aa pehtlaimi Phungbia in Bupi nih, zeibantuk cauk hna hi Cathiang cazin chungah khumh awk an si ti kha a rak thleidan. Hi a tlingmi cazin hi “Bible Chungtel Cauk” ti cu an si. Biakam Hlun chungah (46), Jeremiah le Ṭ ahnak kha kan fonh ahcun (45) le Biakam Thar ah (27) hna hi an si.
Biakam Hlun
Biakam Hlun hi cathiang ah a um lo ah a si kho lomi cheubang pakhat a si. A cauk hna cu Pathian thawkhumh an si i zungzal in man a ngei. Zeicahtiah Biakam Hlun cu zeitikhmanh ah hnawn a rak si bal lo. Biakam Hlun nih mi vialte khamhtu Khrih a rak lainak kha a timhtuah piak i Profet bia in a chimchung. Biakam Hlun ah khamhnak tling kha hmuh sihlah hmanhsehlaw Pathian dawtnak kong kha tehte a khan i, Pathian kongah a sang ngaimi cawnpiaknak le minung nunnak caah fimnak taktak kha a ngei, thlacamnak caah khuaruahhar awk thilsung a si. Biakam Hlun chungah kanmah khamhnak kong biathuk hi a thilthup in a um. Khrihfa mi nih Biakam Hlun kha Pathian bia tiin an upat. Bupi nih Biakam Hlun hi Biakam Thar nih a hrawh cang timi ruahnak kha a al zungzal. (Marcionism – Marcion cawnpiaknak).
Biakam Thar
Zumhnak a ngeimi hna khamhnak caah Pathian ṭhawnnak a simi Pathian bia hi Biakam Thar ṭialnak chungah khuaruahhar awk in a ṭhawnnak hmual kha a langhter. (Rom. 1:16). Biakam Thar a chung muru cu Jesuh Khrih, Pathian Fapa, minung a cangmi kha a si. A tuahsernak, a cawnpiaknak, a temhinnak le thangṭhat a hmuhnak le Thiang Thlarau hruainak in Bupi aa thawhkehnak kong kha a chim. Thangṭhabia hna hi Cathiang hna i an thinlung a si. Zeicahtiah annih cu minung a cangmi Bia, a kan khamhtu a nunnak le a cawnpiaknak kan laknak hram an si. Thangṭhabia chuahnak ca dotthum a um kha kan hngalh khawh.
1. Bawi Jesuh nunnak le cawnpiaknak; Bupi nih Thangṭhabia pali hna kha, Pathian Fapa a nun lio caan in Vancung a kai tiang, khamhnak hmuh awk caah a tuahmi le a cawnpiakmi an si, tiah fek tein aa tlaih (Lam 1:1-2).
2. Kaa in cawnpiaknak; Bawipa Vancung a kai hnuah Lamkaltu hna nih an chimmi le an tuahmi vialte hna kha an bia a ngaimi hna sinah a chimchin hna. Khi tikah annih nih Khrih a sunparnak le Biatak Thlarau ceuhnak thawngin tling deuh in an rak theihthiam (Bible ṭial hlan cawnpiaknak kha a si).
3. Ṭ ialmi Thawngṭhabia; Cathiang ṭialtu hna nih kaa in siseh, caṭialnak in siseh an rak i chanhchinmi thil tampi lakin a cheu kha thim in Thawngṭhabia pali cu an rak ṭial. Sihmanhsehlaw phungchim phun in an ṭialmi nih khan Jesuh Khrih kong biatak kha a kan chimh. Thawngṭhabia pali hna hi Bupi chungah upat khun an si.
Biakam Hlun Le Biakam Thar an i kawmhnak
Bupi nih Lamkaltu hna chan thawkin Pupa cawnpiaknak bangin Biakam pahnih hna pumkhat an sinak kha a sawhpiak zungzal. (ICor. 10:6, 11 / Heb. 10:1 / IPet. 3:21). Biakam Hlun chung i a muithlam a langmi kha a caan a tlin tikah minung cannak a lami Fapa cungah a rak tling dih.
Khrihfa mi nih Biakam Hlun kha vailam an ta hi a thoṭhanmi Khrih ceunak chung khan an rel. Cu bantukin an rel tikah Biakam Hlun chung i a ummi bia sullam hna hi a dih kho loin an hmuh. Sihmanhsehlaw kha bantukin an rel tikah Biakam Hlun hi amah tein man a ngeihnak kha philh awk a si lo. Bawipa Jesuh hrimhrim nih a fehter mi a si. (Mk. 12:29-31). Biakam Thar ceunak chungin rel awk a si. Hlanlio Khrihfa hna nih Pathian bia cawnnak ah Biakam Hlun kha an rel zungzal. (ICor. 5:6-8, 10:1-11). Phungbia an rak chim tawn bangtin “Biakam Thar cu Biakam Hlun chungah aa thup i Biakam Hlun cu Biakam Thar ah aa hung” (St. Augustine). Biakam Hlun le Biakam Thar an i kawmhnak nih hin “Pathian cu mibip caah zeizong vialte a si te lai” timi bia a tlinnak lei kha a sawh. (ICor. 15:28). Cun hlanlio pupa hna auhnak le Izipt ram in an chuahnak zong hi karlak thil an sti tiah Pathian tinhnak chungah man a ngeihnak a thlau hlei lo.