Dawtu maw kan si hua tu dah?
သူတပါးတို့အားအထင်သေးခြင်းသည် ဘုရားသခင်၏ကျေးဇူးတော်ကို လက်မခံခြင်းဖြစ်သည်။ Judah mi nih Jeremiah cu zei ah an rel lomi asi. Profet Jeremiah cu Pathian nih lungkhongmi Judah mi hna sinah a thlah. Jeremiah nih Judah mi hna cu “nan umtu ning le nan thil tuahmi kha i remh uh; pakhat le pakhat thil ṭha lo in a ti hlah u law ngakṭah le nu hmei kha hleng hna hlah uh law a sual lomi thisen kha chuah hlah uh. Pathian dantat nak nan ing lai” tiah a ti hna. (Jeremiah 7:1-5) ah kan hmuh. Cu ruangah nihin kan relmi (Jeremiah 11:18-19) ah “Judah lungkhongmi hna nih Jeremiah cu thah dingin khua an khan” timi kha kan hmuh.
Thawngṭha bia kan relmi (Johan 7:40-52) chung zongah kan Bawipa Jesuh nih Biakin chungah mizapi cu a cawn piak hna. (Johan 7:27-28) ah “A ti a hal mi pawl cu ka sin ah ra u law ra ding uh. Keimah a ka zummi paoh cu an lung chung in tiva nung a put lai” tiah a ti. Cu bia cu an theih tikah “Hipa hi profet a si hrimhrim ko an ti, a dang nih Messiah a si ko an ti.” Judah upa lungkhong mi hna le Frasi mi hna nih cun an zum lo. Kan tlaih lai i kan thah lai” an ti. Sihmanhsehlaw, an tlai kho lo timi kha nihin thawngṭha bia chungah kan hmuh.
Nang le kei tah a daw tu maw kan si a hau tu dah? Thawngṭhabia aupi nak (Lk 8:15) ah “Vawlei ṭha ah a tla mi thlaici” timi kan hmuh. Thlaici cu Pathian bia asi. Pathian bia kha a thei i a cohlangmi kan si. (Lamkaltu 13:41-48)chungah “Pual le Barnabas nih Judah mi hna kha Jesuh Khrih kong an cawnpiak hna. A cheu nih an zumh a cheu nih an zumlo. Pual nih a chimhmi kha an al, an nih sawh. Pual le Barnabas cu ralṭha chinchin in an chim. ‘Nan sin i Pathian bia chim hmasa hi a herh taktak mi asi. Sihmanhsehlaw, nannih nih nanduh lo caah nannih cu kan in kaltak hna lai i Gentel mi sinah kankal cang lai’ an ti hna. Cu bia cu Gentel mi hna nih an theih tikah an i lawm tuk i Bawipa cu an thangṭhat.
Pathian bia nih a kal tak mi siloin Pathian bia nih lam a hruai mi, Pathian bia in a nungmi zumtu ṭha si kha nihin Pathian bia nih a kan chimh. Daw tu maw kan si hua tu dah? Angai tu nan dihlak cungah lunglawmhnak tampi ka ngei. Pathian nih thlachuah in peko hna seh. Kaa lawm.