Pathian tinhmi Bia Thli

Nihin ni i Bupi nih thawngṭha bia rel ding a kan pek mi (Johan 7:1-2,10,25-30) tiang asi. A tawi nak in kan rel lai. “Jerusalem khua mi a cheukhat nih cun an i thawh i ‘thah in zalh mi pa kha hipa hi asi lo maw? Asinain zoh hmanh uh, langhla in bia a chim leng ko i a hohmanh nih zei an ti fawn tunglo. Kan upa pawl nih anih hi Messiah cu asiko ti kha an hngalh taktak cang caah sihnga maw. Sihmanhsehlaw, Messiah cu a rat tikah cun khawzei in dah a rat tikha a hohmanh nih an hngalh tung lai lo! Hipa cu khawzei in dah a rat tikha kan dihlak nih kan hngalh fawn tung’ an ti. Jesuh nih biakin chungah a cawn piak hna ah cun aww thang pi in ‘keimah cu nan ka hngalh taktak i khawzei in dah ka rat kha nan hngalh taktak. Sihmanhsehlaw, kei cu kei mah nawl in a ra mi ka silo. A ka thlah tu cu a hmaan taktak mi kha asi i a mah cu nan hngal lo. Kei nih cun ka hngalh. Zeicah tiah kei cu a sin in a ra mi ka si i a ka thlah tu cu amah kha asi’ tiah a ti hna.”

Nihin kan relmi (Wisdom 2:22) zawnah “Annih nih cun Pathian tinhmi biathli kha an hngal lo” timi kha kan hmuh khawh. Nihin ni ah thawngṭha i hrawm ṭi ding in ka duhmi cu “Pathian tinhmi bia thli” timi kong asi lai. Israel miphun cu Pathian i a innchung khar, a miphun an si i Pathian nih kilven mi Pathian nih hruai mi hna a miphun an rak si. Dingṭhlulairel Pathian ralkap bu Bawipa, David Pathian cu a rak hngal hmasa bik asi i a rak bia hmasa bik miphun cu Israel miphun an si. Pathian nih kamhmi ram (Kaanan ram) zong a co tu an si i vawlei taksa pum in an cawlcang i taksa pum in ral an do i Pathian nih a kamh mi hna Kaanan ram cu taksa pum in an co taktak. Sihmanhsehlaw, hithil vialte hi thlarau nun ram i mui thlam asi tikha an i fianglo, an rak hngal kho lo. Kanmah vialte a kan khamh i, kanmah vialte a kan hruai i thlarau nun ram ah a kan kalpi tuding khamh tu pa Messiah (Jesuh Khrih) cu an rak hngah na tein an rak hngal lo. An nganh. 

Nihin kan relmi thawngṭha chungah Jesuh Khrih cu kan cah a ra ti an rak hngal lo i Pathian biathli an rak hngalh lo caah Jesuh Khrih cu thah ding lawng kha khua an khang. (Phungthlukbia 25:2) zawn ah “Pathian nih thil a thuh hi a sunparnak caah asi e” tiah ati. Siangpahrang hna i an sunparnak cu thil fianter kha asi e ati. Biakamhlun chungah Pathian i program vialte hi thil ṭha cang hnga dingmi biakamthar i mui thlam a rak si i biakamhlun chan ah cun cucu Pathian nih a program vialte cu biathli ah a rak chiah. (Efesa 3:6) ah “Cu biathli cu hihi a si. Thawngṭha thawngin Gantle mi hna nih Judah mi hna sin ah khan Pathian thlachuah an co ve cang. Annih cu pumkhat chung ngekhat an si cang i Khrih Jesuh in Pathian nih biakamnak a tuahmi ah khan tinvo an ngei ve cang timi asi. Cucu Pathian khamhnak chungah Judah miphun lawng, Israel miphun lawng siloin vawlei cungmi vialte tampi lak ah biakamhlun ah Judah phun phunkhat lawng, Israel miphun phunkhat lawng rak thim asi i Judah biaknak pakhat lawng Pathian nih cohlan asi naa te in Fapa Jesuh Khrih chan ah cun miphun vialte i funtom in pakhat asi mi Khrihfa Bupi chungah zapi te i funtom ding kha Pathian nih a duhmi cu asi. Cuchungah cun miphun thleidan nak umloin Jesuh Khrih a khamhnak chungah, Pathian nih timhpiak mi chungah codingmi ro kan ngei ve ti cu a langhter asi.

Jesuh Khrih nih thawngṭha a chim lengmang i mi a cawnpiak lengmang lio ah lamkaltu pawl kha an khuaruah a har i “Bawipa, zei ruangah dah mi na cawnpiak hna ah hin bianabia hi na hmaan zungzal” tiah (Mt 13:11) ah kan hmuh khawh. Annih cu a leh hna i “Vancung pennak kong biathli hngalhnak cu nan nih cu pek nan si cang. Sihmahsehlaw, hi hna hi cu pek an si lo e” tiah Jesuh Khrih nih a leh hna. Biathli hngalh kan timi cu fimnak asilo i thiamnak nih a ti khawh mi asilo i Pathian nih a tinhmi, Pathian i a program kha minung cungah a phuan a si. “Bawipa nangmah cu minih Elaiah na si, a dang nih profet pakhatkhat na si” tiah an ti tikah Jesuh nih a lamkaltu pawl hna cu (Mt 16) chungah a hal mi hna cu “Asiah cun nan nih tah a ho na si tiah nan ka ti dah” tiah a hal hna. Simon Peter nih “Anung mi Pathian fapa Messiah na si” tiah a leh. Jesuh nih a ti ṭhan mi cu “Johan fapa Simon, mi van ṭha ngai ngai na si. Zeicahtiah hi biatak cu minung sin in na hngalhmi asilo i vancung i a um mi kapa nih an pek mi asi” tiah ati. Cu biathli biatak cu minung fimthiamnak nih, thil tikhawhnak nih hngalhter mi asi lo i Pathian thimmi chungin Pathian nih vancung in hngalhter mi a rak si. Asiahcun cu biathli cu zeithawng dah hngalh si tiah kan ti si ah cun (Efesa 3:10) ah “Cuti a rak thuh cu Khrihfa bu thawnghin vancung khua uk tu vanmi hna nih hin Pathian fimnak a phunphun cu atu caan ah hin hngal hna seh ti a duh caah asi e” tiah a ti. “Cu biathli cu Khrih asi mi a pum, cu a pum chungah miphun vialte ai funtom mi hna caah cun cu a pum thawng asi mi a Khrihfa bu thawng in cu biathli cu a phun e” ati.

Cucaah cun duh dawtmi ule nau nu le pa hna Pathian nih thil a thuh i a biathli a thuhmi hngalh khawhnak cu thlacam khawh ruangah silo, thil ti khawh ruangah silo, Bible rel khawh tuk ruangah asi hlei lo, thil ṭha tuah khawh tuk ruangah asi hlei lo. Pathian nih a thim i cu a thim mi Khrihfa Bupi ah cun a biatak a biathli cu a phuan asi. (Lamkaltu 2:47) chungah “Pathian kha an thangṭhat i mi vialte nih an hmai zah hna. Cun khamh asi lo mi hna cu Bawipa nih nifa tein a bu chungah khan a lutter lengmang hna” tiah a ti i cu Jesuh Khrih pum asi mi Khrihfa Bupi chung i a lut lengmang mi cu khamh an si tikha nihin ni ah a kan cawnpiak. (1Timore 3:16) chungah “Kan biaknak phungchung i aa thup mi biathli hi zeitluk in dah a ngan tikha a hohmanh nih an al kho lo e” tiah ati.

Duh dawtmi ule nau nu le pa hna nihin ni ah Khrihfa, Fapa chan in ThiangThlarau chan zongah Pathian nih a biathli cu a thuh rih. Cucu a thuh rih mi cu a Khrihfa bu lawngin a phun i cu a Khrihfa bu chung i a ummi hna lawng nih kan Bawipa Jesuh Khrih zumhning le kan Bawipa Jesuh Khrih pekmi khamhnak kan co ning kan hngalh khawhnak cu kan Bawipa Jesuh Khrih sin a rak luangliam mi a sacrament thawng lawnglawng in kan hngalh khawh asi. Cucah cun duh dawtmi ule nau nu le pa hna cu a Khrihfa Bupi chung i kan biaknak phungnih ai thup mi a biathli kha kannih a hngal mi kan si i khamh kan co kan tinak cu amah i pek mi sacrament thawng in asi. Thawngṭha a rak ngai tu nan zapi te Pathian nih thlachuah in peko hna seh.