Pathian Biakinn thiang ah aa lawm kho mi na si ve cang maw?

Khrih ah dawtmi ule nau hna nan dihlak cungah Bawipa nih daihnak, hna ngamnak, lawmhnak in pe cio hna seh tiah thla kan cam piak hna. Nihin kan nu Bupi nih Mithiang Joseph puai sunglawi ngai in a kan tuah piak mi asi.

Mithiang Joseph hi a nunnak kan zoh tikah cawn awk tlak tampi a um. Atuan bia kan zoh tikah hin lungthin thiang a ngei mi Pathian nawl a ngei mi toidornak nun a ngei mi miding mifel asi nak hi kan hmuh khawh mi asi. Cucaah Bupi nih kan nu Bupi a zohkhenh tu le chungkhar hna a zohkhenh tu ‘Pa’ ah a cawisan mi Mithiang pakhat asi tihi a tuanbia kan zoh tikah kan hmuh khawh mi asi. Cucaah Mithiang Joseph a nunnak zong hi lungthin thiannak a ngei mi siseh, toidornak nun a ngei mi siseh, Pathian nawl ngai in a ummi miding mifel a sinak hi i cawng cio u sih tiah hmasa ah chim ka duh.

Avoikhatnak Nihin kan relmi (2 Samuel 7:4-5,12-14,16) chungah zeidah kan hmuh ti si ah cun Pathian nih Siangpahrang David sinah biakam a ser mi kha kan hmuh i cu biakamnak a ser mi cu Siang pahrang David ci ruang chungin Siangpahrang pakhat a chuak lai nak, a Pennak siseh, a bawi ṭhutdan siseh, zungzal in a hmunh lai nak kong kha kan hmuh i, cun a um lai nak ding caah zongah Siangpahrang David sinah profet Nathan hmang in a va chimhter nak kha kan hmuh mi asi. “Siangpahrang David sinah va kal law ka umnak ding caah inn pakhat na ka ser piak lai maw? Israel mi hna Izipt ram in ka chuahpi hna ni in nihin tiang ah hin, umnak ding ka ngei lo, inn chungah ka um rih lo, puan thlam chungin ka um i, cu ka hmun cun kan zoh khenh hna. Cucaah umnak pakhat inn ka ser piak seh law” va ti law tiah profet Nathan hmang in Siangpahrang David sin ah a va chimhter mi kha kan hmuh khawh mi asi.

Avoihnih nak Bible (Rom 4:13,16-18,22) chungah Pathian le Abraham biakamnak kha kan hmuh khawhmi asi. Pathian nih Abraham sinah “Van arfi zat, vawlei thetse zat in tefa kan pek hna lai” a ti mi kha kan hmuh i cucu Abraham zumhnak in a cohlan i lungdong lo tein a zumhnak ruangah Pathian nih a pek tak tak i cu a zumhnak thawng cun Pathian nih miding a cohlan mi zong kha a voihnih nak Bible chungah kan hmuh khawh mi asi. 

Cun Saam chungah, thawngṭha bia aupi nak chungah (Saam 84:4-5) chungah “Na biakinn chungah a um mi cu zeitluk in dah an i lawmh, nangmah thangṭhat nak hla a sa zungzal mi hna cu zeitluk in dah an tha a nuamh? Nangmah sin thazaang a hmu mi hna cu zeitluk in dah an i lawmh” timi kha kan hmuh. Pathian dawtnak a thei mi hna, Pathian dawtnak a fiangmi hna nih an nunnak ram ah Bawipa biakinn chungin a thangṭhatnak hla an sak tikah an i lawmhnak le an tha a numh zia kha kan hmuh khawh mi asi. Cun ahme (10) chungah “Na biakinn chungah nikhat um cu hmun dang i nithong khat um nak in a ṭha deuh” a ti rih. 

Dawtmi ule nau hna khoi ka dah kan i lawmh deuh? Leng i kan um tikah maw kan i lawmh deuh, Bawipa biakinnn chung i nikhat kan um tikah hin maw kan i lawmh deuh tihi kan nunnak ah i chek ṭhan cio u sih. 

Bawipa biakinnn chung i nikhat um i ailawm deuh mi hna nih zeiruang ah cu tluk an i lawmh ti asi ah cun kan Bawipa Jesuh Khrih nih Gospel nihin kan rel mi (Lk 2:41-52) chungah zeidah kan hmuh ti si ah cun “Bawi Jesuh a nu le a pa nih kum fate in Jerusalem ah lanhtak puai an zawh tikah an fapa Bawi Jesuh zong kum 12 asi tik an kal pi i, cutin an kir tikah an fapa Jesuh cu kir ve lo in Jerusalem ah a tang. Anu le pa nih cun a hawi le sinah siseh, a rualchan hna sinah siseh a kir ve lai ti an ruah tikah inn an tlun i an vakawl tikah an hmu tilo. Jerusalem biakinn ah cun an vakal ṭhan i a nithumnak ni ah cu biakinn ah cun phungbia cawnpiak tu saya hna he bia an i ruah i bia an i hal lengmang kha an vahmuh tikah a Nu Mary nih “ka fa, zeiruangah dah hi bantuk in na kan tuah. Na nu le na pa cu awlawk chawng in pei kan um ko cu, kan lungre a thei tuk ko cu” tiah a ti tikah Bawi Jesuh nih zeitin dah a leh ti si ah cun “zeicah dah nan ka kawl, ka pa inn ah ka um awk si ti kha nan hngal lo maw” a ti hna. Kha bia vialte kha a nu mary a lungchung ah ai cinken dih a ti. Cun Bawi Jesuh cu a nu le pa kha a zulh hna i an kut tang ah nawl ngai ngai in a um i pumlei in siseh, fimnak lei in siseh a ṭhang i Pathian thlachuah nak kha a hmu i Pathian hmai le minung hmai ah mithmai ṭha a hmu ti kha Gospel chungah kan hmuh khawh mi asi.

Cuka ah thazaang lak ṭi kan duhmi hna cu zeidah si ti si ah cun dawtmi ule nau hna nihin ah nule pa nih kan fa le hi khoi ka dah kan hmuh hna tihi ruat cio tuah u sih. Bawi Jesuh a nu Mary le pa Joseph tu nih cun an fapa kha biakinn chungah an hmuh tihi kan hmuh khawh mi asi. Nang le kei tah kan fa le hi khoi ka hmun ah an tlau i khoi ka hmun kan hmuh hna. Biakinn ah kan hmu hna maw? Biakinn ah an tlau i biakinn ah kan hmu hna maw? Pathian fanu fapa taktak Pathian dawtnak a thei mi hna an nunnak ram ah Bawipa biakinn chung i um i Bawipa a ṭhatnak, a dawtnak, a sunpar lianngannak thangṭhat i Bawipa biakinn chung tu ah an ii lawmhnak tu kha a um tihi kan hmuh khawh mi asi. 

Dawtmi ule nau hna nang le kei tah fanu fapa lawng siloin a ngai tu kan dihlak nu le pa zongnih kan i lawmhnak hi khoi ka hmun ah dah asi i khoi ka hmun ah dah kan um awk asi tihi zumtu Khrihfa hna nih i fiang hna u sih. Kan Bawipa Jesuh Khrih bangin biakinn chungah um i biakinn chungah kan i lawmhnak hi si sehlaw biakinn chungah hin Bawipa a um nak hmun chungah hin a mah sunpar lianngannak hi thangṭhat i amah he hmunkhat in a sunpar lingngannak a thangṭhat mi kan thlarau nunnak ramah amah sinah aa lawm mi fanu fapa kan si cio nak hnga thazaang i lak ṭi hna u sih. Kan theih mi kan relmi kan chimmi a thawngṭha bia a ngai tu nan dihlak cungah Bawipa nih a thar in thlachuahnak in peko hna seh. Amen.