Dawtnak ngeitu cu tei tu an si

2026, March 13 nihin ni i bupi nih rel awk in a kan timh piak mi (Mark 12:28-34) chung asi lai. Nihin kan rel mi thawngṭha chung ah kan hmuhkhawh mi cu “Frasi phungbia cawng piak tu saya pa nih ‘nawlbia chungah hin zei nawl bia hi dah a herh bik’ tiah Jesuh kha a hal tikah, Bawipa Jesuh nih cun a leh mi cu ‘Bawipa na Pathian cu nan lungthin dihlak, nan nunnak dihlak, nan ruatnak dihlak le nan thazaang dihlak in nan dawt lai tihi a biapi bik cu asi. Cun a pahinhnak ah na inn pa kha nang mah na dawt bantuk in na dawt lai. Hi pahinh nak in a biapi deuh nawlbia dang zeihmah a um ti lo’ tiah a leh. (Mt 22:40) ah cun Moses nawlbia vialte le Profet hna cawnpiak nak vialte cu hi nawlbia pahinh chungah hin an i khumhdih tiah a ti.

Nihin thawngṭha kan i hrawm ṭi hna dingmi tlangtar ka duhmi cu “Dawtnak ngeitu cu tei tu an si” ti asi lai. Sermi minung hna nih sertu Pathian cu dawt theng loin leng lang zohdawh men sawhsawh in a nawlbia cu zeimawzat a zulhlai nain cubantuk a nawlbia zulh cu dawtnak kha a hrampi ah a thlak lo caah, cherhchan ah ai lak lo caah sau a nguhlo. Sihmanhsehlaw, Pathian dawtnak a hngal taktak mi hna cah cun (1Johan 4:10) ah “Dawtnak cu Pathian kan rak dawt hi asilo. Amah nih a kan dawt i kan sual ngeihthiam nak caah a Fapa kan sin a run thlah a si” tiah ati. Pathian kan dawt hmasa lo i a mah nih a kan dawt hmasa, Fapa Jesuh Khrih cu kan caah a thlah ti a hngal i Pathian dawtnak a hngal i a tep cangmi hna caah cun an thinlung tak tein Pathian cu an lawmh i, an dawt i a nawlbia cu an zulh. Pathian dawtnak chungah an i lawm i a nawlbia zulhnak ah an di a riam i an i nuam. Psalm caṭial tu pa nih a timi cu, Sam hla fung 119, caang 47 nak ah “na nawlbia cu ka duh hna caah, na nawlbia zulh cu ka caah a nuam” tiah a ti. Pathian a daw mi hna caah cun Pathian nawlbia zulh cu a nuam mi asi i a thangṭhat nak hla sak cu an caah a thlum a al i amah Pathian a thawngṭha theih cu an caah thazaang asi i an lung a hmui i an di a riam. (Johan 15:10) chungah Jesuh nih a timi cu “Ka Pa nawl kha ka ngai i a dawtnak chungah ka um bantuk tein ka nawlbia nan ngeih ah cun ka dawtnak hna chungah nan um ve lai” tiah Jesuh Khrih nih a kan ti. Pa Pathian cu Fapa Pathian nih a dawt i a bia kha a ngai i a nawl kha a zulh. Cu a nawl a zulhnak ah vailam cung thihnak tiang in Pa nawl ngai in kan Bawipa Jesuh Khrih cu a um. (1Johan 5:3) ah Pathian kan dawt ti cu a nawl kan zulh tinak asi ko e tiah a ti. A nawl kan zulhnak nihhin Pathian kan dawtnak cu a langhter si. Kan Bawipa Jesuh Khrih vailam cung a thihnak a ruang cu kan mah a kan dawtnak langhter awk ah vailam cungah a nun in a langh a si. (Johan 4:34) chungah “Jesuh nih kei i ka rawl cu a ka thlah tu duhnak zulh le a ka fial mi rian lim kha asi e” tiah a ti. Kan Bawipa Jesuh Khrih nih Pa Pathian a dawtnak ah a nawlbia a zul i cu a zulhmi khinhmi rian cu a caah rawl thaw bik, a caah rawl asi tiah ati.

(1Tim 2:3) chung kan hmuh khawh mi cu “mi vialte nih khamhnak hi hmu hna sehlaw biatak kha hngal hna seh law ti a duhtu Pathian kan khamh tu nih hi thil ṭha hi a duh” tiah a ti. Pathian nih a kan dawt i a Fapa Jesuh Khrih a kan pek caah mi vialte kha khamhnak hmu hna seh ti hi kan khamh tu Pathian nih a duhmi asi. Asisiah cun kan innpa hna dawt cu mi vialte nih hmasa bikah khamhnak hmu hnaseh, biatak hai hngal hnaseh tihi thil vialte lakah kan duhsak piak bikmi hna asi i kan dawt hna asi ah cun cucu khamhnak thawngṭha cu kan innpa hna sinah kan phuan a herh. Lamkaltu hna le Pathian rian a rak ṭuanmi hna nih an nunnak pek tiang in kan Bawipa Jesuh Khrih rian cu har riangmang in an ṭuan i an ruahnak dihlak, an thazaang dihlak, an nunnak dihlak in Pathian rian, kan Bawipa Jesuh Khrih rian cu an rak ṭuan. (1Johan 4:10) chungah “Pathian nih a kan dawt i kan sualnak ngeihthiam nak caah a Fapa kan sihah a rak thlah asi ah cun kan nih zong pakhat le pakhat kan i dawt awk asi” tiah a ti. Pathian nih a kan dawtnak cu kan innpa hna sin kan langhter i kan innpa hna zong kan dawt hna ding asi. A sal ṭha simi Mithing Pual nih “Jesuh Khrih a dawt i Pa Pathian a dawt i a rian a ṭuannak ah harnak tampi a tong. Sihmanhsehlaw, Jesuh Khrih he kan i dawtnak ah cun zeihmah nih a kan ṭhen kho lai lo e” tiah (Rom 8:35) chungah “Khrih dawtnak he cu harnak nih maw, temh in nak nih maw, hramnak nih maw, rawlṭamnak nih maw, pamnak nih maw, thil ṭihnung nih maw, thihnak nih maw zei tal nih a kan ṭhen kho hnga maw?” A hme (37) ah “zeihmah nih a kan ṭhen kho lai lo e” tiah mithiang Pual nih a ti.

Pathian kan dawt i a nawlbia zulh in kar kan hlannak ah tlamtlin lonak tampi kan ngei lai nain nihin kan relmi Bible pakhat nak (Hosea 14:2) ah “Ka sualnak cu ka ngaithiam law ka thlachamnak cu ka cohlan piak tuah” tiah kan hmuh bantuk in Pathian kan duh kan dawtnak ah zumhnak ah kar kan hlannak ah, a nawlbia kan zulhnak ah kan tlamtlin lo nak tampi um mi kha i hngalh u sih law Pathian sinah ngeihthiamnak hal zong hi Pathian nih a duhmi raithawi nak asi. Kan tlamtlin lonak, kan chambaunak, kan sualnak kan palhnak ti kha i hngal in Bawipa sinah ngeihthiam hal in a mah bochan bu tein a mah nawlbia zulh chuahmah in tlamtlin nak hmun kha phak khawh i zuam i zuamnak he kar hlan hi Bawipa nih a duhmi asi. (Rom 8:37) chungah “Harnak thil vialte hna chung hin a kan daw tu thawng in kan nih cu tei tu nak in tei tu kan si deuh e” tiah ati. Harnak nih kan deng ko hmanh seh Pa Pathian he kan i dawtnak le innpa chak ṭhlang kan dawtnak he pehtlai in zeihmah nih kan dawn hlah seh, zeihmah nih kan tei hlah seh. Kan mah tu kha tei tu kan si peng a hau. (1Korin 13:7) ah “Dawtnak cu a lung a dong bal lo. Zumhnak a ngei i ruah channak a ngei, a lung a sau i a thin a fual” a ti bangin a kan daw tu Pathian kan zumh i a ro co dingah kan i ruahchan bantuk in lungsau thin fual tein a nawlbia kha zul u sih law Pathian nih a dawtmi kan innpa hna kha philh thlau lo tein zawn tuahnak he, dawtnak lungthin he kan mah kan i dawt bantuk in daw hna u sih law tei tu si i zuam ko hna u sih tiah sawm kan duh hna.