Keimah a kan ṭanh lomi cu a ka dohtu an si; pumh a ka bawm lomi cu ṭhektu an si
Nihin kan Bupi nih a kan thim piakmi (Lk 11:23) “Keimah a kan ṭanh lomi cu a ka dohtu an si; pumh a ka bawm lomi cu ṭhektu an si,” timi tlangtar in tlawmpal ruah ṭi kan duh hna. A voikhatnak Bible chungah zeidah kan hmuh ti a si ahcun (Jer 7:23) “Nawl ka pekmi hna cu mah hi pei a si ko cu: Ka bia nan ngaih ahcun nan Pathian ka si lai i ka mi nan si lai. Cun khuaawng pemh nan duh ahcun, ka nawlbia kha zul hna u” tiah a kan ti.
Bawipa a bia ngaih ding le a nawl zulh ding, amah bia kan ngai ahcun a mi kan si lai i kan Pathian a si ve lai, khuaawng pemh kan duh a si ahcun cucu tuah uh, tuah hlah uh a kan timi a nawlbia kha kan zulh a si ahcun khuaawng kan pemh lai, thluahchuah kan hmu lai timi kha a voikhatnak Bible ah kan hmuh khawhmi a si. Palm hla chung zongah zeidah kan hmuh ti a si ahcun (Ps 95:6-7) “Ra tuah u, kun u si law bia u sih; a kan Sertu Bawipa hmaiah cun kan khuk i bil u sih! Amah cu kan Pathian a si, kannih cu a kan zohkhenhmi kan si, a kan cawmmi tuurun kan si” tiah a ti. Cucaah “A chimmi kha nihin cu ngai tuah u” tiah a ti, cucu zeidah a si “Nan pupa hna kha Meribah ah lung hak in an rak um bang khan nannih cu um hlah u” a kan timi kha kan hmuh khawhmi cu a si. Thawngṭhabia aupinak chungah zeidah kan hmuh (Joel 2:12-13) “Atu zong hmanh ah hin, nan lung tak tein i ngaihchih u law, rawl kha ul u law ṭap u law nan ṭang i cum tuah u. Nan puan si loin nan lung tu kha tlek tuah u,” tiah Bawipa nih a ti” tiah Profet Joesl a miphun hna sual ngaihchihnak a fialmi kha kan hmuh khawhmi a si. Bawipa hrimhrim a chimmi kha kan hmuh khawhmi a si.
Cucaah dawtmi u le nau hna Bawipa kan Pathian duhning in kan nun lomi kan doh sualmi kan sualnak vialte Lent caan a si bantuk in i ngaihchih in amah sinah hin kir usih, Bawipa nih a kan zaangfah lai i Bawipa nih kan sualnak vialte cu a kan ngaithiam hrimhrim lai. “A bia hi nihin cu ngai tuah u sih, Nan pupa hna kha Meribah ah lung hak in an rak um bang khan nannih cu um hlah u” a kan ti.
Meribah a timi sullam cu zeidah a si ti a si ahcun “i siknak hmun, i siknak” ti sullam a ngeimi a si. Kan Pathian nih a miphun Israel mi hna Izipt ram in Moses hmangin a chuahpi hna tikah hin Moses nih Sin ramcar chungah a hruai hna. Sin ramcar chungah hmunkhat hnu hmunkhat in riahnak kha an i thawn. Refadim timi an phak tikah hin din awk zeihmanh an ngei ti lo, a ti a hal, a dang a car. Cutikah Moses kha an zai hnawh cang. Din awk kan ngei ti lo zeitindah na kan tuah lai, zei ruangahdah Izipt ram chung in na kan chuahpi, hika hmun ah hin maw thihter na kan duh” tiah Moses kha an zai hnawh. Moses zong thah an zalh. A phunphun in Pathian sinah siseh, Moses sinah siseh an zawihnawh tikah Moses nih Bawipa Pathian sinah thla a cam tikah Bawipa Pathian nih “Asi ahcun nan miphun hna chungkhan upa hna i thim law Horeb tlangah ra uh” a ti hna.
Horeb tlangah Bawipa nih Moses kha Rili sen na tuknak ṭhiangṭhunh kha i ken law ra u a ti bantuk in Horeb tlang ah khan Moses le upa hna cu an kal i cuka ahcun Bawipa kan Pathian i a miphun hna kha a cawmmi, a zohkhenhmi, a thimmi miphun hna kha cuka ahcun Moses hmangin ti kha a chuahter i din awk ti zong kha a pek hna ti kha kan hmuh khawhmi a si. Cuka ahcun cu hmun cu hneksaknak, i siknak tiah min an pek. Zeicahtiah Bawipa kan Pathian hi kan leiah a ṭang maw / a ṭang lo timi hneksaknak caah cuka hmun cu cu ti cun min an pek mi a si.
Dawtmi u le nau hna nifa kan nunnak ah hin kan duh ningin thil a can lo tikah Bawipa hi hneksak kan del sual maw? Bawipa cungah kan thin a hung sual maw? Nifate kan nunnak ah hin Bawipa nih a kan cawm peng ko ti hi philh hlah u sih, Bawipa nih a kan zohkhenh peng ko ti hi philh hlah usih. “Keimah leiah a ṭang lomi cu a ka dotu an si, pumh a ka bawm lomi cu ṭhektu an si” tiah a ti. Aho sinah dah a ṭang lai? Aho sin ah dah kan ṭang lai? timi hi kan nunnak ah i check usih. Bawipa sinah kan ṭan a si ahcun Bawipa nih a kan umpi lai i Bawipa nih nifa a kan cawm peng lai i kan nunnak ah Bawipa nih thluachuahnak a kan pek lai ti kha nihin ah ruah ṭi kan duh hna.