Nawlbia pek kan si mi cu Lam dingin kan nun khawhnak hnga caah a si
Bawi Khrih ah Dawtmi zumtu u le nau, nu le pa vialte hna nan um nak hmun kip cio ah Bawipa nih deihnak in pe cio ko hna seh. Hi batuk in Pathian nih a kan pek mi nithar, caan thar chungah damnak te he Pathian nih a kan phak ter i a bia chim phuang ko dingin caan ṭha ka humh ve tikah, kan biak mi Pathian cungah lunglawmhnak tampi ka ngei. Hi bantukin caan a kan pe tu ṭuanvo ngei tu kan Father pa cung zong ah lunglawmhnak tampi ka ngei timi kha a hmaisa bikah chim ka duh.
2026, March (11) calender chungah kan humh mi Gospal chungah, kan Bawipa Jesuh Khrih nih a kan cawnpiak mi bia he pehtlai in a tawite in ruat ṭi hna u sih. Kan Bawipa Jesuh Khrih nih “Moses nawl bia hna le Judah mi cawnpiak nak hna kha hrawh awk ah a ra tiah ka ruat hlah uh. An nih kha hrawh awk ah siloin tlin ter awk tu ah ka ra” tiah ati. A peh chap rih mi cu “Hi nawlbia, phung biachung i a hme bik te hmanh kha a zul lo i midang zong cuticun a cawnpiak mi hna cu vancung pennak chungah a hme bik an si lai i nawlbia le phungbia kha a zulh i midang zong kha zulh awk tiin a cawnpiak mi hna cu vancung pennak ah mingan an si lai” tiah kan Bawipa Jesuh Khrih nih a timi kha fiang tein kan hmuh.
Tuchan Khrihfa minung tampi a hlei in kan Laitlang biaknak kan zoh tikah, Khrihfa unau biaknak dang kan zoh tikah ‘nawlbia hi a herh ti lo, Pathian nawlbia zong hi a herh ti lo, zumhnak lawnglawng in Pathian he remnak kan hmu, zumhnak lawnglawng in khamhnak kan hmu’ tiin nawlbia (10) zong a herh ti lo timi minung tampi an um cang. Nawlbia kan timi hi Pathian nih minung sinah a kan pek tikah Sinai tlang ah Moses nawlbia (10) a pek tikah hin, Pathian nih minung hi ṭemṭawn tu ding le namneh tu ding caah nawlbia hi a kan pek siloin biakamhlun chung kan zoh tikah cun Judah mi hna kha (Israel) miphun kha ningcang tein an nunnak hnga ding caah le ningcang tein an ṭhutdir khawhnak hnga ding caah Pathian nih a pek mi hna kha a si.
Cu bantuk in kannih hna zong van Kanaan panh in kan kal cuahmah lio ah hin ningcang tein keh-awrh ah kan pial sualnak hnga lo caah, sualnak chungah kan pial sual nak hnga lo caah Pathian nih a nawlbia hi zulh awk ah a kan pek mi kha asi. Adang kan unau hna Khrihfa kan uana hna timi bantuk in nawlbia a herh ti lo, Pathian nawlbia a herh ti lo, zumhnak lawnglawng in kan ti asi ah cun Pathian nih a ti mi cu “Van le vawlei hi rawk hmanh sehlaw ka bia a rawk lai lo” tiah a kan ti i fiang tein Pathian nih a nawlbia a kan pek mi hi zeitik hmanh ah a dong lo ding zumtu hna kan zulhding si timi kha fiang tein a kan hmuhmi kha asi.
Tahchuhnak pakhat lak ka duhmi cu, tilam kan cawh tikah tii kha tlawt-tlau lo tein kan i tinhnak hmun lei ah lut seh ti kan duh caah tilam kan cawh i cubantuk tein ti nih tilam te kha a zulh i tlaw-tlau lo tein kan i tinhnak hmun a phak nak kha tlamtling tein ti nih a zulh bantuk tein kan nih hna zongnih nawlbia kan timi cu keh-awrh sualnak ah kan tlak tlau nak hnga lo ding caah Pathian nawlbia hi tilam bantuk in, tilak nak bantuk in a kan hruai tu asi timi kha fiangtein kan hmuhmi asi.