Lebanon nih an ram thlanglei Khuate lei Khrihfa hna kilven dingin Vatican sinah bawmhnak a hal

Lebanon nih Vatican cu an ram thlanglei Khrihfa khuate hna he dirpi ṭi dingin a nawl hna. Hi khuami hna nih an khua ram kal tak loin an khua te ah um dingin lungkhiahnak an ngeihmi cungah Lebanon rammi hna le ramkip um thawngzamhphu hna i thangṭhat nak zong tampi langhter an si. Hezbollah ralkap hna luhhnawhnak le Israel ralkap hna tukdohnak karlak ah aa taap mi an si ko nain, cu khuami hna nih cun kan pupa hna ram cu kan chuah tak lai lo tiin an khua hna ah um dingin lungkhiahnak an tuah. 

Lebanon vuanci, Youssef Raggi nih, Nihnihni ah an ram thil sining kong he pehtlai in Vatican (Holy See) he faakdeuh in pehtlaihnak ka tuah lai tiah a chim. Raggi cu Vatican Secretary for Relations for States Archbishop Paul Gallagher he phone in an i chawn i ‘Lebanon ram ah a thar in thil a cangmi hna le an ram thlang lei ramri khuate lei a ummi hna nih an ton lio mi harnak sining kong hna’ kha a chimh.

Cun, cu khuate lei um mi Khrihfa hna bawmhchanh awk le kilven awkah Vatican ṭuanvo ngeitu hna nih daihnak caah cawlcangh cio ve dingin a hal hna i, khuate lei mi hna nih Lebanon ram le an cozah hruainak hna cungah a dirpi tu an si zungzal nak kong zong a chim chih. 

Gallagher nih, Vatican lei kap in Lebanon nih a ton chuahmah mi ramchung buaibainak hna a ran khawh chungin ngol a si nak hnga, a herhmi ramkhel pehtlainak hna zong a tuah cuahmah ko tiah a ti. Cun Pope Leo thlacamnak zongah ‘Lebanon mi hna philh an si hrimhrim lo’ tiah a chimchap.

Lebanon thlanglei Khrihfa khuate hna caah a zual chin lengmangmi harnak

Ramdang lei he pehtlaihnak ṭuanvo ngeitu vuanci nih nawlnak a tuahmcu ramri um khuate lei Khrihfa hna dirhmun a chiat chin lengmang ruangah a si.

Nikhat ni ah Israel ralkap hna nih Khrihfa khua pakhat a simi Qlayaa khua an kah ruangah Father Pierre Rahi zong a nunnak a liam. Tual chung thawngpang nih a chim ning ahcun, Hezabollah ralhrang hna khuachung an rak luh ruangah kah an si tiah a ti. Khuami hna nih Father Rahi cu ralrinak an pek ko. Sihmahsehlaw, Father Rahi cu hriamtlai phu pawl an khua in chuah dingin a nawl hna lio ah amah zong kah chih a si tiah an ti.

A thihnak nih Lebanon mi hna cu an khuaruah a harter hna hlei ah vawleicung um Catholic hna lungthin zong a tongh ngai. Ṭinung ral um hmanhsehlaw, Father pa cu khuami hna kal tak loin hmunkhat a um ṭ . Mipi nih amah cu mi ralṭha le tuukhal ṭha pakhat a si tiah an thangṭhat ngai.

Hi bantuk ngaihchiatnak hi voi(1)nak lawng a si ti lo. Alma al-Shaab khua um lo thlo pakhat a simi Youssef Al-Ghafri zong mah bantukin thihnak a rak tong bal cang.  

Nihnihni ah khan, UNIFIL  in United Nations daihnak sertu phu hna nih Alma al-Shaab khuami hna cu a himnak hmun ah an chuah pi hna. Khuami hna nih cun Lebanon ralkap pawl nih an kilven ko hna lai i khuachung ah an um kho ko lai tiah an rak ruah. Sihmanhsehlaw an ruah ning in siloin, an khua chuah tak ding tuin nawl-forhnak an tuah hna.  

Ramri pawng i a ummi Khrihfa khua dang hna zong, mah bantuk thil an tong ve sual lai timi phannak a karh chin lengmang fawn. Rmeish khuabawi cu Israel bawi pakhat sin in ralrin peknak phone chawnhnak a ngei i, ‘an khua hna cu kah dingah timh cu a si lo na in, Hezbollah ralhrang pawl an luh a si ahcun kah ding zongah a cang kho mi a si’ tiah an ti. 

Khuami hna nih an chimmi cu ‘khuate lei ah Lebanoan ralkap pawl an um lo caah Hezabollah ralhrang pawl lut i khuachung um mibu hna caah thil sining a har tuk’ tiah an ti. 

Israel le Hezbollah ralkap hna tukdohnak  karlak ah, Khrihfa khuami hna nih harnak tampi an ton sual lai ti zong thin phannak a um.

An-Nahar thawngzamh ning ahcun, Lebanon ram caah Apostolic Nuncio a simi, Archbishop Paolo Borgia cu a ra lai mi Ningani ah ramri um khuate lei Khrihfa hna he lungthin khat sinak langhternak ah va tlawn hna dingin caan-khiah timhtuahnak a ngei tiah a ti. Ṭih phannak um ko hmanhsehlaw, hi khualtlawnnak thawngin khuami hna zong nih inn lo kal tak loin um ngamnak thazang a ngeihter chin hna lai tiah ruah a si.  Cun, MTV Lebanon thawngzamhnak nih, ‘US cu Israel he i bawm in, Lebanon thlanglei Khrihfa khuate pawl kilvennak caah bawmhnak pek a timh ko.’ Sihmanhsehlaw, tual chungmi hna chim ning ahcun, ‘Hezbollah ralhrang pawl khuate lei luh khawh lo dingin a khamtu ding Lebanon ralkap an um lo caah timhtuah ding zong a har ngai lai’ tiah a langher ve.